Primebook 3 Max | రూ.35,990కే ప్రైమ్‌బుక్‌ 3 మ్యాక్స్.. ఏఐ ఫీచర్లతో కొత్త ల్యాప్‌టాప్‌..

Primebook 3 Max | భారత్‌లో ప్రైమ్‌బుక్‌ అధికారికంగా తన మూడో తరం కంప్యూటింగ్‌ సిరీస్‌ను ప్రారంభించింది. ఇందులో భాగంగా ప్రైమ్‌బుక్‌ 3 మ్యాక్స్‌ ల్యాప్‌టాప్‌ను మార్కెట్‌లోకి తీసుకొచ్చింది. మూడో తరం సిరీస్‌లో మరో మోడల్‌ అయిన ప్రైమ్‌బుక్ 3 ప్రొ ను తర్వాత విడుదల చేయనున్నట్లు కంపెనీ వెల్లడించింది. ఇంతకుముందు ప్రైమ్‌బుక్‌ భారత్‌లో మూడో తరం ల్యాప్‌టాప్‌ సిరీస్‌ను ప్రారంభించేందుకు సిద్ధమైంది. ప్రైమ్‌బుక్‌ 3 మ్యాక్స్‌తో ప్రారంభించి, తర్వాత ప్రైమ్‌బుక్ 3 ప్రొ ను ఇదే సిరీస్‌లో చేర్చనున్నట్లు కంపెనీ తెలిపింది. కొత్త ప్రైమ్‌బుక్‌ 3 ల్యాప్‌టాప్‌లు మీడియాటెక్‌ జెనియో 720 ప్రాసెసర్‌కు అప్‌గ్రేడ్‌ అయ్యాయి. ఇందులోనే ప్రత్యేక న్యూరల్‌ ప్రాసెసింగ్‌ యూనిట్‌ ఉండడంతో ఏఐ పనులను పరికరంలోనే మరింత సమర్థంగా నిర్వహించవచ్చు. ఈ ప్రాసెసర్‌కు 8జీబీ ర్యామ్‌ను జత చేశారు. గత తరం ల్యాప్‌టాప్‌లలో ఎల్‌పీడీడీఆర్4ఎక్స్‌ మెమరీ ఉండేది. కొత్త కాంబినేషన్‌ గత తరంతో పోలిస్తే 40 శాతం వరకు అధిక పనితీరును అందిస్తుందని ప్రైమ్‌బుక్‌ చెబుతోంది.

మైక్రోసాఫ్ట్ ఆఫీస్‌కు పోటీగా ప్రైమ్ ఆఫీస్‌..

కొత్త ల్యాప్‌టాప్‌లలో ఉత్పాదకత, భద్రత, సాఫ్ట్‌వేర్‌ సపోర్ట్‌, ఏఐ సామర్థ్యాలను కంపెనీ విస్తరించింది. ప్రైమ్‌ఆఫీస్‌, ప్రైమ్‌సెక్యూరిటీ, ఎంపిక చేసిన లైనక్స్‌ అప్లికేషన్లకు యాక్సెస్‌, లైనక్స్‌ టెర్మినల్‌తోపాటు ప్రైమ్ ఏజీఎన్‌టీ అనే ఆపరేటర్‌ ఏఐ ఇందులో ఉన్నాయి. మైక్రోసాఫ్ట్‌ ఆఫీస్‌కు ప్రత్యామ్నాయంగా ప్రైమ్‌బుక్‌ ప్రైమ్‌ఆఫీస్‌ను రూపొందించింది. ఆండ్రాయిడ్‌లో ఎంఎస్‌ ఆఫీస్‌కు ఉన్న పరిమితులను దృష్టిలో ఉంచుకుని దీనిని అభివృద్ధి చేసినట్లు కంపెనీ చెబుతోంది. డాక్యుమెంట్లు, స్ప్రెడ్‌షీట్లు, ప్రజెంటేషన్లపై పనిచేసేందుకు ఎంఎస్‌ ఆఫీస్‌లోని 90 శాతానికి పైగా ఫంక్షనాలిటీని ప్రైమ్‌ఆఫీస్‌ అందిస్తుందని సంస్థ తెలిపింది. ఇది ఉచితంగా లభించే, ఆఫ్‌లైన్‌ ప్రాధాన్యత కలిగిన సూట్‌. ఇందులో ప్రైమ్‌డాక్స్‌, ప్రైమ్‌షీట్స్‌, ప్రైమ్‌ప్రెజెంట్‌ ఉన్నాయి. ప్రైమ్‌ఆఫీస్‌ ఇంటర్‌ఫేస్‌లో అవసరమైన టూల్స్‌ మెనూల్లో దాచకుండా సులభంగా అందుబాటులో ఉండేలా రూపొందించారు. ఇది తొలుత ప్రైమ్‌బుక్‌ 3 మ్యాక్స్‌లో అందుబాటులోకి వస్తుంది. రానున్న నెలల్లో ప్రైమ్‌బుక్‌ 2, ప్రైమ్‌బుక్ 3 ప్రొ వినియోగదారులకు కూడా దీని యాక్సెస్‌ లభిస్తుంది.

లైన‌క్స్ అప్లికేష‌న్ల‌కు స‌పోర్ట్‌..

ప్రత్యేక సాఫ్ట్‌వేర్‌ అవసరమయ్యే వినియోగదారుల కోసం ప్రైమ్‌ఓఎస్‌ ఉచితంగా కొన్ని ప్రముఖ లైనక్స్‌ అప్లికేషన్లకు స్థానిక యాక్సెస్‌తోపాటు లైనక్స్‌ టెర్మినల్‌ను అందిస్తోంది. ఆపరేటింగ్‌ సిస్టమ్‌లో ఉపయోగించే అదే లైనక్స్‌ కర్నల్‌ను వినియోగించడం ద్వారా ఇది సాధ్యమవుతుంది. వీఎస్‌ కోడ్‌, జింప్‌, లిబ్రేఆఫీస్‌, ఫైర్‌ఫాక్స్‌, ఆర్డుయినో ఐడీఈ, డీబీవర్‌ సీఈ, టేబుల్‌ప్లస్‌, పోస్ట్‌మ్యాన్‌ వంటి అప్లికేషన్లకు సపోర్ట్‌ ఉంటుంది. ఈ సాఫ్ట్‌వేర్‌ సదుపాయాలతో ఆండ్రాయిడ్‌ అప్లికేషన్‌ ఎకోసిస్టమ్‌కు వెలుపల ఉన్న ప్రోగ్రామ్‌లను కూడా ఉపయోగించవచ్చు. ఇంజినీర్లు, భవిష్యత్‌ డెవలపర్లు, ప్రత్యేక సాఫ్ట్‌వేర్‌ అవసరమయ్యే వినియోగదారులకు ఇది ఉపయోగపడుతుందని ప్రైమ్‌బుక్‌ తెలిపింది. క్లాడ్‌ లేదా ఇలాంటి కమాండ్‌ లైన్‌ ఇంటర్‌ఫేస్‌ టూల్స్‌తో కూడా ప్రైమ్‌బుక్‌ 3 మ్యాక్స్‌లో బిల్డింగ్‌ పనులు చేయవచ్చని కంపెనీ పేర్కొంది.

ప్రైమ్ సెక్యూరిటీ యాప్‌..

ప్రైమ్‌ఓఎస్‌లో భాగంగా బిల్ట్‌ఇన్‌ టాస్క్‌ మేనేజర్‌, ప్రైమ్‌సెక్యూరిటీ యాప్‌ల ద్వారా పరికరం ఆరోగ్యాన్ని పర్యవేక్షించే సదుపాయం కూడా ఉంది. ప్రమాదకరమైన లేదా నకిలీ యాప్‌లను ప్రైమ్‌సెక్యూరిటీ స్కాన్‌ చేస్తుంది. యాప్‌ డెవలపర్‌ సిగ్నేచర్‌ అసలైనది కాదని గుర్తిస్తే వినియోగదారులను హెచ్చరిస్తుంది. బ్యాక్‌గ్రౌండ్‌లో పనిచేస్తున్న ప్రమాదకరమైన లేదా అధిక వనరులను వినియోగించే యాప్‌లను నిలిపివేయడం లేదా బ్లాక్‌ చేయడం కూడా సాధ్యమవుతుంది. టాస్క్‌ మేనేజర్‌ ద్వారా సీపీయూ, ర్యామ్‌ వినియోగాన్ని పర్యవేక్షించడంతోపాటు స్టార్టప్‌ యాప్‌లను నిర్వహించవచ్చు. పరికరం పనితీరులో సమస్యను ప్రైమ్‌ఓఎస్‌ గుర్తించినప్పుడు, తీసుకోవాల్సిన చర్యను సూచిస్తూ వినియోగదారుకు నోటిఫికేషన్‌ పంపుతుంది. ఆ చర్యను నేరుగా అక్కడి నుంచే అమలు చేయవచ్చు.

టైప్ సి పోర్టు ద్వారా చార్జింగ్‌..

15.6 ఇంచుల ప్రైమ్‌బుక్‌ 3 మ్యాక్స్‌ మెటాలిక్‌ బాడీ, సన్నని డిజైన్‌, మ్యాట్‌ ఫినిష్‌తో వస్తుంది. వైఫై 6, బ్లూటూత్‌ 5.3కు సపోర్ట్‌ ఉంటుంది. వైర్డ్‌ కనెక్టివిటీ కోసం పూర్తి ఫంక్షన్‌ యూఎస్‌బీ 3.2 టైప్ సి పోర్ట్‌ను అందించారు. దీని ద్వారా ఛార్జింగ్‌, ఓటీజీ, టైప్‌-సి నుంచి హెచ్‌డీఎంఐ కేబుల్‌ ద్వారా డిస్‌ప్లే అవుట్‌పుట్‌, ఇతర యాక్సెసరీలను కనెక్ట్‌ చేయడం వంటి పనులు చేయవచ్చు. దీనితోపాటు యూఎస్‌బీ 3.2 టైప్ ఎ, యూఎస్‌బీ 2.0 టైప్ ఎ, పెరిఫెరల్స్‌ కోసం యూఎస్‌బీ 2.0 టైప్ సి, 3.5ఎంఎం స్టీరియో ఆడియో జాక్‌ ఉన్నాయి. వీడియో కాల్స్‌, ఆన్‌లైన్‌ సహకారం కోసం 5 మెగాపిక్స‌ల్‌ వెబ్‌క్యామ్‌ను అందించారు. ఇది సెకనుకు 30 ఫ్రేమ్‌ల వేగంతో 1440పి వీడియోను రికార్డ్ చేస్తుంది. డ్యుయల్‌ మైక్రోఫోన్లు, సాఫ్ట్‌వేర్‌ ఆధారిత నాయిస్‌ క్యాన్సిలేషన్‌ కూడా ఉన్నాయి. డ్యుయల్‌ స్టీరియో స్పీకర్లు లభిస్తాయి. ప్రైమ్‌బుక్‌ 3 మ్యాక్స్‌లో మూడు స్థాయిల్లో బ్రైట్‌నెస్‌ను సర్దుబాటు చేసుకునే బ్యాక్‌లిట్‌ కీబోర్డ్‌, మల్టీ ఫింగర్‌ జెస్చర్‌లకు సపోర్ట్‌ చేసే టచ్‌ప్యాడ్‌ ఉన్నాయి.

బ్యాట‌రీ బ్యాక‌ప్ ఎక్కువే..

ప్రైమ్‌బుక్‌ జనరేషన్‌ 3లో ప్రైమ్‌ఓఎస్‌ ఆపరేటింగ్‌ సిస్టమ్‌ను ఉపయోగించారు. మీడియాటెక్‌ జెనియో 720 ఆక్టాకోర్‌ ప్రాసెసర్‌లో 2.6 గిగాహెడ్జ్‌ వేగంతో పనిచేసే రెండు ఎ78 కోర్లు, 2.0 గిగాహెడ్జ్ వేగంతో పనిచేసే ఆరు ఎ55 కోర్లు ఉన్నాయి. గ్రాఫిక్స్‌ కోసం 1.1 గిగాహెడ్జ్‌ వేగంతో పనిచేసే మాలీ జీ57 ఎంసీ2 జీపీయూ ఉంది. ర్యామ్‌ 8జీబీ కాగా, స్టోరేజ్‌ 128జీబీ యూఎఫ్‌ఎస్‌. దీన్ని మైక్రోఎస్‌డీ ద్వారా 1టీబీ వరకు విస్తరించుకోవచ్చు. డిస్‌ప్లే పరంగా 15.6, 14.1 ఇంచుల ఫుల్‌ హెచ్‌డీ ఐపీఎస్‌ వేరియంట్లు ఉన్నాయి. 1920 * 1080 పిక్స‌ల్‌ రిజల్యూషన్‌, గరిష్ఠంగా 250 నిట్స్‌ బ్రైట్‌నెస్‌, మ్యాట్‌ యాంటీ రిఫ్లెక్టివ్‌ ఫినిష్‌ లభిస్తాయి. 5 మెగాపిక్స‌ల్‌ వెబ్‌క్యామ్‌ 1440పి వీడియోను సెకనుకు 30 ఫ్రేమ్‌లతో రికార్డ్‌ చేస్తుంది. డ్యుయ‌ల్‌ స్టీరియో స్పీకర్లు, వైఫై 6, బ్లూటూత్‌ 5.3 ఉన్నాయి. 60.3 వాట్ అవర్‌ బ్యాటరీతో 12 నుంచి 14 గంటల వరకు బ్యాటరీ బ్యాకప్‌ లభిస్తుందని కంపెనీ చెబుతోంది. టైప్ సి పోర్టు ద్వారా 36 వాట్ల ఫాస్ట్‌ ఛార్జింగ్‌ సపోర్ట్‌ ఉంటుంది.

ధ‌ర ఎంతంటే..

పోర్టుల విషయానికి వస్తే ఒక యూఎస్‌బీ ఎ 3.2, ఒక యూఎస్‌బీ ఎ 2.0, ఒక యూఎస్‌బీ సి 3.2, ఒక యూఎస్‌బీ సి 2.0, 3.5ఎంఎం ఆడియో జాక్‌, మైక్రోఎస్‌డీ కార్డ్‌ స్లాట్‌ ఉన్నాయి. బ్యాక్‌లిట్‌ కీబోర్డ్‌ ఉంటుంది. 15.6 ఇంచుల మోడల్‌ బరువు 1.597 కిలోలు కాగా, 14.1 ఇంచుల మోడల్‌ బరువు 1.35 కిలోలు. స్పేస్‌ గ్రే, బ్లాక్‌ రంగుల్లో లభిస్తుంది. ప్రైమ్‌ఆఫీస్‌ సూట్‌, ప్రైమ్ లైనక్స్‌ ఉచితంగా లభిస్తాయి. ప్రైమ్‌ఎక్స్‌ క్లౌడ్‌ పీసీ, ప్రైమ్‌ఏజీఎన్‌టీ ఆపరేటర్ ఏఐల‌ను విలువ ఆధారిత సేవలుగా అందిస్తున్నారు. భారత్‌లో ప్రైమ్‌బుక్‌ 3 మ్యాక్స్‌ ప్రారంభ ధరను రూ.35,990గా నిర్ణయించారు. అమెజాన్‌, ఫ్లిప్‌కార్ట్‌, ప్రైమ్‌బుక్‌ అధికారిక వెబ్‌సైట్‌తోపాటు ఢిల్లీ-ఎన్‌సీఆర్‌, బెంగళూరులోని బజాజ్‌ ఎలక్ట్రానిక్స్‌ స్టోర్లలో ఇది లభిస్తుంది. తెలంగాణ, ఆంధ్రప్రదేశ్‌లోని సంగీత మొబైల్స్‌ స్టోర్లు, పై ఇంటర్నేషనల్‌ స్టోర్లలో కూడా కొనుగోలు చేయవచ్చు.

డిస్కౌంట్లు సైతం..

ఆన్‌లైన్‌ మార్కెట్‌ప్లేస్‌ల ద్వారా ప్రైమ్‌బుక్‌ 3 మ్యాక్స్‌ను కొనుగోలు చేసే వినియోగదారులకు నో కాస్ట్‌ ఈఎంఐ, తక్షణ బ్యాంక్‌ డిస్కౌంట్లు కూడా లభిస్తాయి. ల్యాప్‌టాప్‌కు ఒక సంవత్సరం వారంటీ ఉంటుంది. ఫ్లిప్‌కార్ట్‌ బిగ్‌ బిలియన్‌ డేస్‌, అమెజాన్‌ గ్రేట్‌ ఇండియన్‌ ఫెస్టివల్‌ 2026 సమయంలో ప్రత్యేక ఆఫర్లతో దీని ప్రభావిత ధర రూ.33,490 నుంచి రూ.33,990 మధ్యకు తగ్గుతుంది. ప్లాట్‌ఫామ్‌ డిస్కౌంట్ల ద్వారా రూ.2వేల నుంచి రూ.2,500 వరకు తగ్గింపు లభిస్తుంది. అదనంగా ఫ్లిప్‌కార్ట్‌లో రూ.1,500 నుంచి రూ.2వేల వరకు, అమెజాన్‌లో రూ.2,250 నుంచి రూ.2,500 వరకు తక్షణ బ్యాంక్‌ డిస్కౌంట్లు లభిస్తాయి. నో కాస్ట్‌ ఈఎంఐ సదుపాయం కూడా ఉంటుంది. డివైస్‌ల‌కు ఒక సంవత్సరం స్టాండర్డ్‌ వారంటీ అందిస్తున్నారు.