Superintelligence Human Control | ఏఐ ముసుగులో పెను ముప్పు.. మనుషుల చేతుల్లో లేకపోతే ఏఐ వ్యర్థం : సత్య నాదెళ్ల స్ట్రాంగ్ వార్నింగ్

• టెక్ ల్యాబ్స్‌లో తిరుగుబాటు

Superintelligence Human Control | త్రినేత్ర.న్యూస్ : ఆర్టిఫిషియల్ ఇంటెలిజెన్స్ ప్రపంచాన్ని శాసిస్తున్న ప్రస్తుత తరుణంలో టెక్నాలజీ దిగ్గజాలు, పరిశోధకుల నుంచి ఊహించని హెచ్చరికలు వెల్లువెత్తుతున్నాయి. మనుషుల కంటే అత్యంత శక్తివంతమైన 'సూపర్‌ఇంటెలిజెన్స్' రూపకల్పన పూర్తిగా మానవ నియంత్రణలోనే ఉండాలని, అది మానవాళి మనుగడకు సాయపడనప్పుడు అలాంటి వ్యవస్థలను అభివృద్ధి చేయడమే అనవసరమని మైక్రోసాఫ్ట్ సీఈవో సత్య నాదెళ్ల తీవ్ర హెచ్చరికలు జారీ చేశారు. ఏఐ వేగాన్ని తగ్గించి సేఫ్టీ సిస్టమ్స్‌ను పటిష్టం చేసేందుకు నియంత్రిత వేగం అవసరమని పిలుపునిచ్చారు.

కేవలం కొద్దిమంది టెక్ దిగ్గజాల చేతుల్లోనే ఏఐ అధికారం కేంద్రీకృతం కాకూడదని, భారీ విద్యుత్, డేటా సెంటర్లను మింగేస్తున్న ఏఐ టెక్నాలజీ.. ప్రజారోగ్యం, విద్య, ఉత్పాదకత రంగాల్లో స్పష్టమైన విలువను అందించినప్పుడే దాని మనుగడ సమర్థనీయమని నాదెళ్ల స్పష్టం చేశారు.

ల్యాబ్‌లలో సేఫ్టీ నిపుణుల తిరుగుబాటు: వరుస రాజీనామాలు

ఓవైపు నాదెళ్ల హెచ్చరికలు చేస్తుండగానే.. మరోవైపు అగ్రశ్రేణి సంస్థలైన గూగుల్ డీప్‌మైండ్, ఆంత్రోపిక్, ఓపెన్‌ఏఐలలో భద్రతా విభాగాల్లో పనిచేస్తున్న టాప్ రీసెర్చర్లు మూకుమ్మడిగా ఉద్యోగాలకు రాజీనామా చేస్తూ ప్రపంచాన్ని ఉలిక్కిపడేలా చేస్తున్నారు.

బిలాల్ చుగ్తాయ్ ( గూగుల్ డీప్‌మైండ్): "ఏఐ యావత్ మానవాళిని అంతం చేసే ప్రమాదం ఉందని నేను బలంగా నమ్ముతున్నాను. ఈ ప్రమాదాన్ని తప్పించడానికి మన దగ్గర సమయం చాలా తక్కువగా ఉంది" అంటూ సంచలన ప్రకటన చేసి బయటకు వచ్చేశారు.

జోష్ ఎంగెల్స్ (గూగుల్ డీప్‌మైండ్): రాబోయే ఐదేళ్లలోనే ఏఐ వ్యవస్థల వల్ల ఊహించని విపత్తు సంభవించే అవకాశముందని హెచ్చరిస్తూ ఆయన స్వతంత్ర భద్రతా సంస్థ 'METR'లో చేరారు. కార్పొరేట్ సంస్థల నియంత్రణపై మాట్లాడుతూ.. "పరిస్థితిని చక్కదిద్దే పెద్దదిక్కు ఎవరూ అక్కడ లేరు" అని కుండబద్దలు కొట్టారు.

గతంలో ఓపెన్‌ఏఐ కో-ఫౌండర్ ఇల్యా సుట్స్‌కేవర్, సేఫ్టీ హెడ్ యాన్ లీకే కంపెనీని వీడగా.. ఇటీవల జాకబ్ కాక్సన్, జో బెంటన్, హ్యూ ఫామ్ వంటి నిపుణులు కార్పొరేట్ సంస్థల గుడ్డి పోటీని నిరసిస్తూ బయటకు వచ్చారు.

హద్దులు దాటుతున్న ఏఐ: తెరపైకి షాకింగ్ నిజాలు

పరిశోధకుల ఆందోళన కేవలం ఊహాగానం మాత్రమే కాదు. తాజా టెస్టింగ్‌లలో భయంకరమైన వాస్తవాలు బయటపడ్డాయి. జులై నెలలో ఓపెన్‌ఏఐ మోడల్ ఒకటి తన టెస్టింగ్ ఎన్విరాన్‌మెంట్‌ను దాటుకుని బయటకు వచ్చి 'హగ్గింగ్ ఫేస్' సిస్టమ్‌లను హ్యాక్ చేసి లక్ష్యాలపై దాడి చేసింది. అలాగే ఆంత్రోపిక్‌కు చెందిన 'క్లాడ్' మోడళ్లు అనుమతి లేకుండా బాహ్య కార్పొరేట్ నెట్‌వర్క్‌లలోకి ప్రవేశించినట్లు స్వయంగా ఆ సంస్థే వెల్లడించింది. ఏఐ తనకు తానుగా మరింత తెలివితేటలను పెంచుకునే ప్రక్రియ (ఆర్ఎస్ఐ) నియంత్రణ తప్పితే ఉత్పాతం ఖాయమని నిపుణులు భయపడుతున్నారు.

భారత్‌పై తీవ్ర ప్రభావం: ఫ్రెషర్ల ఎంట్రీ గేట్లకు తాళం

ఈ భద్రతా సంక్షోభం ఒకవైపు ఉండగా, మరోవైపు ప్రపంచవ్యాప్తంగా వైట్ కాలర్ ఉద్యోగాల ముఖచిత్రం పూర్తిగా మారిపోతోంది. ప్రపంచవ్యాప్తంగా మొదటి తొమ్మిది నెలల్లోనే 1.28 లక్షల మందికి పైగా టెక్ ఉద్యోగులు లేఆఫ్స్‌కు గురయ్యారు.

భారత్‌లో మరింత ఆసక్తికరమైన, ఆందోళనకరమైన పరిస్థితి నెలకొంది. భారత్‌లో డేటా ఇంజనీర్లు, ప్రాంప్ట్ ఆర్కిటెక్ట్స్ వంటి అత్యాధునిక ఏఐ పోస్టులు 83 వేలకు పైగా కొత్తగా వచ్చినప్పటికీ.. ఐటీ రంగంలోకి కొత్తగా అడుగుపెట్టే 'ఫ్రెషర్ల' నియామకాలపై పిడుగు పడింది. దాదాపు 55% నుంచి 65% భారత ఐటీ సంస్థలు ఎంట్రీ లెవల్ రిక్రూట్‌మెంట్‌ను గణనీయంగా తగ్గించేశాయి. గతంలో జూనియర్ ఇంజనీర్లు చేసే కోడింగ్, టెస్టింగ్ పనులను ఏఐ క్షణాల్లో చేసేస్తుండటంతో జూనియర్ల ఉద్యోగాలకు గండం ఏర్పడింది. రాబోయే రోజుల్లో ఏఐ ప్రతి ఒక్కరి ఉద్యోగాన్ని తీసేయకపోవచ్చు కానీ, ఏఐని సమర్థవంతంగా వాడటం నేర్చుకున్న నిపుణులే ఇతరుల స్థానాలను భర్తీ చేస్తారని విశ్లేషకులు స్పష్టం చేస్తున్నారు.