Acer Aspire 5 | భారత్‌లో లాంచ్ అయిన ఏసర్ కొత్త ఏఐ ల్యాప్‌టాప్.. ఫీచర్లు, ధర చూస్తే షాకే!

Acer Aspire 5 | భారత‌ మార్కెట్‌లో ప్రముఖ టెక్ దిగ్గజం ఏసర్ (Acer) సరికొత్త ఆస్పైర్ 5 ఏఐ (Aspire 5 AI) ల్యాప్‌టాప్‌ను విడుదల చేసింది. వినియోగదారుల రోజువారీ ఉత్పాదకత, సమతుల్య పనితీరు , పోర్టబిలిటీని దృష్టిలో ఉంచుకుని, తన మెయిన్‌స్ట్రీమ్ లైనప్‌ను మరింత విస్తరిస్తూ ఈ ల్యాప్‌టాప్‌ను కంపెనీ ప్రవేశపెట్టింది. ఈ కొత్త ఏసర్ ఆస్పైర్ 5 ల్యాప్‌టాప్ ఇంటెల్ కోర్ అల్ట్రా 5, కోర్ అల్ట్రా 7 హెచ్-సిరీస్ ప్రాసెసర్లతో పనిచేస్తుంది. దీనికి తోడుగా 32 జీబీ వరకు ఎల్‌పీడీడీఆర్5 ర్యామ్, అలాగే 1 టీబీ వరకు ఎన్‌వీఎమ్ఈ ఎస్‌ఎస్‌డీ స్టోరేజ్ ఆప్షన్లను అందించారు. ఇందులో ఫుల్ హెచ్‌డీ ప్ల‌స్ రిజల్యూషన్ క‌లిగిన 14-ఇంచుల డబ్ల్యూయూఎక్స్‌జీఏ ఐపీఎస్ డిస్‌ప్లేను అమర్చారు. ఇది 16:10 యాస్పెక్ట్ రేషియోను కలిగి ఉంటుంది. అంతేకాకుండా, సుదీర్ఘ సమయం పాటు ల్యాప్‌టాప్‌ను ఉపయోగించినా కళ్లకు శ్రమ కలగకుండా ఉండేందుకు వీలుగా గ్లేర్‌ను తగ్గించే ఏసర్ కంఫీవ్యూ (Acer ComfyView) టెక్నాలజీని ఇందులో పొందుపరిచారు.

180-డిగ్రీల హింజ్ డిజైన్..

డిజైన్ విషయానికి వస్తే.. ఈ ల్యాప్‌టాప్ కేవలం 17.5 మిమీ స్లిమ్ ప్రొఫైల్‌తో, దాదాపు 1.2 కేజీల బరువుతో ఎంతో తేలికగా ఉంటుంది. విభిన్న కోణాల్లో సౌకర్యవంతంగా వాడుకునేందుకు వీలుగా 180-డిగ్రీల హింజ్ డిజైన్, బ్యాక్‌లిట్ కీబోర్డ్, వేర్వేరు లైటింగ్ పరిస్థితుల్లో సులభంగా ఆపరేట్ చేయడానికి ప్రెసిషన్ మల్టి-గెస్టర్ టచ్‌ప్యాడ్‌ను ఇందులో ఇచ్చారు. భద్రత కోసం ఫిజికల్ ప్రైవసీ షట్టర్‌తో కూడిన ఫుల్ హెచ్‌డీ వెబ్‌క్యామ్, డ్యూయల్ స్టీరియో స్పీకర్లు, విండోస్ 11 హోమ్ ఆపరేటింగ్ సిస్టమ్‌ను ముందే ఇన్‌స్టాల్ చేసి అందించారు. కనెక్టివిటీ పరంగా ఈ ల్యాప్‌టాప్‌లో ఛార్జింగ్, డేటా ట్రాన్స్‌ఫర్, డిస్‌ప్లే అవుట్‌పుట్‌కు సపోర్ట్ చేసే యూఎస్‌బీ టైప్-సి పోర్ట్, మల్టిపుల్ యూఎస్‌బీ పోర్ట్‌లు, హెచ్‌డీఎమ్‌ఐ అవుట్‌పుట్, ఎస్‌డీ కార్డ్ రీడర్, 3.5 మిమీ హెడ్‌ఫోన్ జాక్‌లను చేర్చారు. వీటితో పాటు వై-ఫై 6, బ్లూటూత్ 5.1 లేదా అంతకంటే ఎక్కువ వెర్షన్ కనెక్టివిటీ ఫీచర్లు ఉన్నాయి. పవర్ బ్యాకప్ కోసం 65 వాట్ల యూఎస్‌బీ-సి ఫాస్ట్ ఛార్జింగ్ సపోర్ట్‌తో కూడిన 54 డబ్ల్యూహెచ్ బ్యాటరీని అమర్చారు.

ధర..

భారత మార్కెట్లో ఏసర్ ఆస్పైర్ 5 ఏఐ ల్యాప్‌టాప్ ప్రారంభ ధరను రూ.79,999 గా నిర్ణయించారు. వినియోగదారులు దీనిని ఏసర్ ఎక్స్‌క్లూజివ్ స్టోర్స్, ఏసర్ ఈ-స్టోర్ తో పాటు అమెజాన్, క్రోమా, రిలయన్స్ డిజిటల్, విజయ్ సేల్స్ లలో కొనుగోలు చేయవచ్చు. ఈ లాంచ్ సందర్భంగా ఏసర్ ఇండియా చీఫ్ బిజినెస్ ఆఫీసర్ సుధీర్ గోయల్ మాట్లాడుతూ ఏసర్ సంస్థ ఎల్లప్పుడూ వినియోగదారుల మారుతున్న అవసరాలకు అనుగుణంగా, అత్యంత శక్తివంతమైన, ఉపయోగకరమైన సాంకేతికతను అందించడంపైనే దృష్టి పెడుతుంద‌న్నారు. ఆస్పైర్ 5 ల్యాప్‌టాప్ అద్భుతమైన పనితీరు, పోర్టబిలిటీ, ఆలోచనాత్మకమైన డిజైన్‌ల కలయికతో ఈ విధానాన్ని ప్రతిబింబిస్తోంద‌న్నారు. ఇంటెల్ కోర్ అల్ట్రా ప్రాసెసర్లు, హై-స్పీడ్ మెమరీ, అధునాతన స్టోరేజ్ హంగులతో కఠినమైన వర్క్‌లోడ్‌లను సైతం ఇది సులభంగా హ్యాండిల్ చేయగలద‌ని పేర్కొన్నారు.