Vinesh Phogat | వినేశ్‌ ఫొగాట్‌కు ఎదురుదెబ్బ.. ట్రయల్స్‌కు హైకోర్టు నో!

• వరల్డ్‌ చాంపియన్‌షిప్‌ సెలెక్షన్‌ ట్రయల్స్‌లో పాల్గొనేందుకు అనుమతి నిరాకరణ
• నిబంధనల నుంచి ప్రత్యేక మినహాయింపు ఇవ్వలేమన్న ఢిల్లీ హైకోర్టు
• మాతృత్వం, కెరీర్‌ మధ్య స‌మ‌తుల్య‌త‌ను ప‌రిశీలించ‌నున్న ధ‌ర్మాస‌నం

Vinesh Phogat | రెజ్లర్‌ వినేశ్‌ ఫొగాట్‌కు ఢిల్లీ హైకోర్టులో ఎదురుదెబ్బ తగిలింది. 2026 సీనియర్‌ వరల్డ్‌ చాంపియన్‌షిప్‌ సెలెక్షన్‌ ట్రయల్స్‌లో పాల్గొనేందుకు ఆమెకు అనుమతి ఇచ్చేందుకు కోర్టు నిరాకరించింది. సెప్టెంబర్‌ 14న జరగనున్న సెలెక్షన్‌ ట్రయల్స్‌కు హాజరయ్యేందుకు ప్రస్తుత నిబంధనల నుంచి వినేశ్‌కు ప్రత్యేక మినహాయింపు ఇవ్వలేమని జస్టిస్‌ స్వర్ణకాంత శర్మ మధ్యంతర ఉత్తర్వుల్లో స్పష్టం చేశారు. వినేశ్‌ ఫొగాట్‌ మాతృత్వం, స్పోర్ట్స్‌ కెరీర్‌కు సంబంధించిన కీలక అంశాన్ని పరిశీలించేందుకు హైకోర్టు అంగీకరించింది. తల్లులైన మహిళా క్రీడాకారులు తిరిగి క్రీడల్లోకి వస్తున్నప్పుడు వారికి ఎదురయ్యే పరిస్థితులు, పోటీలకు సంబంధించిన అర్హత నిబంధనల మధ్య సమతుల్యత ఎలా సాధించాలన్న అంశాన్ని కోర్టు పరిశీలించనుంది.

తల్లిగా ఉండాలా.. కెరీర్‌ కొనసాగించాలా?

మాతృత్వం కారణంగా మహిళా క్రీడాకారిణి తన క్రీడా కెరీర్‌ను కొనసాగించాలా.. లేక తల్లిగా ఉండటానికే పరిమితం కావాలా అనే పరిస్థితి తలెత్తకూడదన్న అంశాన్ని హైకోర్టు ప్రస్తావించింది. ‘నేను తల్లిగా ఉండటం, కెరీర్‌ కొనసాగించడం.. ఈ రెండింటిలో ఒకదాన్ని ఎంచుకోవాల్సిందేనా?’ అనే ప్రశ్నకు సంబంధించిన అంశం ప్రాధాన్యం ఉంద‌ని పేర్కొంది. దీనిపై తుది నిర్ణయం ఇంకా తీసుకోలేదని కోర్టు స్పష్టం చేసింది. తదుపరి విచారణల్లో ఈ అంశాన్ని సమగ్రంగా పరిశీలించనుంది.

అసలేం జరిగింది?

2026 సీనియర్‌ వరల్డ్‌ చాంపియన్‌షిప్‌ సెలెక్షన్‌ ట్రయల్స్‌కు సంబంధించి రెజ్లింగ్‌ ఫెడరేషన్‌ ఆఫ్‌ ఇండియా (WFI) సెప్టెంబర్‌ 7న అర్హత నిబంధనలను ప్రకటించింది. ఇందులో కొన్ని తప్పనిసరి ఈవెంట్లలో పాల్గొనడం కూడా ఉంది. నిర్దేశించిన తప్పనిసరి ఈవెంట్లలో పాల్గొనని రెజ్లర్లను సెలెక్షన్‌ ట్రయల్స్‌కు అర్హులుగా పరిగణించబోమని నిబంధనలు పేర్కొంటున్నాయి. ఈ నిబంధనలు అందరు క్రీడాకారులకు సమానంగా వర్తిస్తాయని హైకోర్టు పేర్కొంది. అందువల్ల ప్రస్తుత నిబంధనల నుంచి వినేశ్‌కు ప్రత్యేక మినహాయింపు ఇవ్వడం సాధ్యం కాదని స్పష్టం చేసింది.

మాతృత్వం కారణంగానే దూరం

వినేశ్‌ ఫొగాట్‌ 2025 జూలైలో తల్లి అయ్యారు. గర్భధారణ, ప్రసవం, ప్రసవానంతర కోలుకునే సమయంలో కొంతకాలం పోటీలకు దూరంగా ఉండాల్సి వచ్చిందని ఆమె హైకోర్టుకు తెలిపారు. అనంతరం మేటర్నిటీ లీవ్‌ నుంచి తిరిగి మ‌ళ్లీ బాక్సింగ్ రింగ్‌లోకి వ‌చ్చారు. తాను పోటీలకు దూరంగా ఉన్న కాలాన్ని పరిగణనలోకి తీసుకుని ప్రత్యేక మినహాయింపు ఇవ్వాలని, తద్వారా 2026 సీనియర్‌ వరల్డ్‌ చాంపియన్‌షిప్‌ సెలెక్షన్‌ ట్రయల్స్‌లో పాల్గొనే అవకాశం కల్పించాలని వినేశ్‌ కోర్టుకు విజ్ఞ‌ప్తి చేసింది. ప్రస్తుత అర్హత నిబంధనల నుంచి ప్రత్యేక మినహాయింపు ఇచ్చేందుకు హైకోర్టు నిరాకరించింది. దీంతో సెప్టెంబర్‌ 14న జరగనున్న సెలెక్షన్‌ ట్రయల్స్‌లో పాల్గొనాలన్న వినేశ్‌ ఆశలకు ప్రస్తుతానికి బ్రేక్ ప‌డిన‌ట్ల‌య్యింది.