22 ఏళ్ల తర్వాత నాకౌట్‌ విజయం

• బోస్నియాపై 2-0తో ప్రీకార్టర్స్‌కు అమెరికా
• బెల్జియంతో పోరుకు సిద్ధమైన యూఎస్‌
• తొలిసారి నాకౌట్‌కు చేరినా కలిసిరాని అదృష్టం
• ఇంటిబాట పట్టిన బోస్నియా

US Vs Bosnia | ఫిపా ప్రపంచకప్‌లో అమెరికా జట్టు జోరు కొనసాగుతోంది. బుధవారం జరిగిన మ్యాచ్‌లో బోస్నియా అండ్ హెర్జెగోవినాపై 2-0 తేడాతో విజయం సాధించిన ఆతిథ్య అమెరికా ప్రీక్వార్టర్‌కు దూసుకెళ్లింది. చివరి దశలో 10 మంది ఆటగాళ్లతోనే ఆడాల్సి వచ్చినా.. పట్టుదలతో పోరాడి కీలక విజయాన్ని అందుకున్నది. ఫోలరిన్ బలోగన్ తొలి అర్ధభాగం చివరలో గోల్ చేసి అమెరికాకు ఆధిక్యం అందించాడు. 64వ నిమిషంలో అతడికి రెడ్ కార్డు పడడంతో అమెరికా ఇబ్బందుల్లో పడింది. కానీ, మాలిక్ టిల్మన్ చివర్లో అద్భుతమైన ఫ్రీకిక్‌తో మరో గోల్ సాధించి జట్టు విజయాన్ని ఖాయం చేశాడు. ఈ విజయంతో అమెరికా రౌండ్ ఆఫ్-16కు అర్హత సాధించింది. జూలై 6న సియాటిల్ వేదికగా బెల్జియంతో ప్రీక్వార్టర్ పోరుకు సిద్ధమైంది. 2002 ప్రపంచకప్‌లో క్వార్టర్ ఫైనల్ వరకు వెళ్లింది. మళ్లీ మరోసారి అద్భుత ప్రదర్శన చేసి ఫైనల్‌ వరకు చేరాలని అమెరికా భావిస్తోంది.

22 ఏళ్ల తర్వాత నాకౌట్ విజయం

ప్రపంచకప్ నాకౌట్ దశలో అమెరికాకు ఇది 2002 తర్వాత తొలి విజయం. అయితే ఈ మ్యాచ్ విజయం అంత సులభంగా ఏమీ దక్కలేదు. తొలి అర్ధభాగం ముగిసే ముందు బలోగన్ గోల్ చేసి జట్టుకు ఆధిక్యం తెచ్చినా.. రెండో అర్ధభాగంలో అతడికి రెడ్ కార్డు రావడంతో అమెరికా ఒత్తిడిలో పడింది. గోల్‌కీపర్ మ్యాట్ ఫ్రీజ్ అద్భుతంగా స్పందించాడు. మూడు కీలక సేవ్‌లతో బోస్నియాను అడ్డుకున్న అతను.. ఈ టోర్నీలో రెండోసారి క్లీన్‌షీట్ నమోదు చేశాడు. స్టేడియంలోని అభిమానుల మద్దతుతో అమెరికా చివరి వరకు ఆధిక్యాన్ని కాపాడుకుంది. ప్రపంచకప్ నాకౌట్ దశకు తొలిసారి చేరిన బోస్నియా ఆరంభంలో దూకుడుగా కనిపించింది. తొలి కార్నర్ తర్వాత ఎర్మెడిన్ డెమిరోవిచ్, కెరిమ్ అలాజ్‌బెగోవిచ్ చేసిన ప్రయత్నాలను ఫ్రీజ్ అడ్డుకోవాల్సి వచ్చింది. కొంత సమయం తర్వాత అమెరికా ఆటపై పట్టు సాధించింది. బంతిపై ఆధిపత్యం పెంచుకుంటూ ఎటాకింగ్‌ను కొనసాగించింది. అయితే, క్రిస్టియన్ పులిసిక్ 78వ నిమిషంలో చేసిన గోల్ ఆఫ్‌సైడ్ కారణంగా రద్దయింది. అంతకుముందే తొలి అర్ధభాగం అదనపు సమయంలో అమెరికా ఖాతా తెరిచింది. బోస్నియా డిఫె‌న్స్‌లో ఏర్పడిన గందరగోళాన్ని ఉపయోగించుకున్న బలోగన్, టారిక్ ముహరెమోవిచ్ నుంచి వచ్చిన బంతిని అందుకుని గోల్‌కీపర్‌ను మోసం చేస్తూ చక్కటి ఫినిషింగ్‌తో బంతిని నెట్‌లోకి పంపాడు. ఆ తర్వాత కొద్దిసేపటికే బలోగన్ మరో గోల్‌కు చేరువయ్యాడు. సెర్జినో డెస్ట్ ఇచ్చిన పాస్‌ను కొట్టిన షాట్ క్రాస్‌బార్‌ను తాకి వెళ్లింది.

రెడ్ కార్డుతో మారిన మ్యాచ్

64వ నిమిషంలో బలోగన్‌కు రెడ్ కార్డు పడడంతో మ్యాచ్ స్వరూపం మారిపోయింది. బోస్నియా ఆటగాడు ముహరెమోవిచ్‌పై చేసిన టాకిల్‌ను తొలుత రిఫరీ సాధారణ ఫౌల్‌గా భావించినా.. వీఏఆర్ పరిశీలన తర్వాత నిర్ణయాన్ని మార్చి నేరుగా రెడ్ కార్డు చూపించాడు. దీంతో మ్యాచ్ చివరి 25 నిమిషాలకుపైగా అమెరికా 10 మంది ఆటగాళ్లతో ఆడాల్సి వచ్చింది. బోస్నియా ఎటాక్‌ చేసినా అమెరికా డిఫెన్స్‌ ప్రత్యర్థికి అవకాశాలు ఇవ్వలేదు. బోస్నియా కెప్టెన్ ఎడిన్ జెకో కూడా పూర్తి మ్యాచ్ ఆడలేకపోయాడు. రెండో అర్ధభాగంలో కాలి గాయం కారణంగా అతడు మైదానం వీడాల్సి వచ్చింది. మ్యాచ్ ముగిసే సమయానికి ఉత్కంఠ నెలకొన్న వేళ 82వ నిమిషంలో మాలిక్ టిల్మన్ అమెరికా అభిమానులకు ఊపిరి పీల్చుకునే అవకాశం ఇచ్చాడు. బాక్స్ వెలుపల సెర్జినో డెస్ట్‌ను అడ్డుకోవడంతో అమెరికాకు ఫ్రీకిక్ లభించింది. టిల్మన్ అద్భుతమైన కిక్‌తో బంతిని నేరుగా గోల్‌పోస్ట్ మూలలోకి పంపాడు. ఆ గోల్‌తో అమెరికా ఆధిక్యం 2-0కు పెరిగి విజయం ఖాయమైంది. అమెరికా కోచ్ మౌరిసియో పోచెట్టినో గత మ్యాచ్‌లో పరాగ్వేపై 4-1 విజయాన్ని అందించిన అదే జట్టును కొనసాగించాడు. గాయం నుంచి కోలుకున్న పులిసిక్‌కు కూడా తుది జట్టులో చోటు లభించింది. తాజాగా అమెరికా ముందు మరో పెద్ద సవాల్ ఎదురుకానుంది. ప్రీక్వార్టర్‌లో బెల్జియంతో తలపడనుంది. ఈ కీలక పోరులో బలోగన్ సేవలు అందుబాటులో ఉండే అవకాశం లేదు. అయినా, 10 మంది ఆటగాళ్లతో సాధించిన కీలక మ్యాచ్‌లో ఆతిథ్య జట్టులో కొత్త ఉత్సాహాన్ని నింపింది.