త్రినేత్ర News Logo
DIGITAL-NEWS

IND VS NZ | టెస్టు క్రికెట్‌లో టీమిండియా చరిత్రాత్మక రికార్డు.. 150 ఏళ్ల చరిత్రలో తొలిసారి ఘనత!

IND VS NZ | న్యూజిలాండ్‌ గడ్డపై టీమిండియా పరుగుల సునామీ సృష్టించింది. బేసిన్‌ రిజర్వ్‌ మైదానంలో ఆతిథ్య జట్టుతో జరుగుతున్న టెస్టులో భారత బ్యాటర్లు ఆకాశమే హద్దుగా చెలరేగారు. తొలి ఇన్నింగ్స్‌లో 9 వికెట్ల నష్టానికి ఏకంగా 720 పరుగులు సాధించి న్యూజిలాండ్‌ను కష్టాల్లోకి నెట్టారు.

P

Sports | Published On Nov 22, 2026, 8.28 am IST

IND VS NZ | టెస్టు క్రికెట్‌లో టీమిండియా చరిత్రాత్మక రికార్డు.. 150 ఏళ్ల చరిత్రలో తొలిసారి ఘనత!
Advertisement

IND VS NZ | న్యూజిలాండ్‌ గడ్డపై టీమిండియా పరుగుల సునామీ సృష్టించింది. బేసిన్‌ రిజర్వ్‌ మైదానంలో ఆతిథ్య జట్టుతో జరుగుతున్న టెస్టులో భారత బ్యాటర్లు ఆకాశమే హద్దుగా చెలరేగారు. తొలి ఇన్నింగ్స్‌లో 9 వికెట్ల నష్టానికి ఏకంగా 720 పరుగులు సాధించి న్యూజిలాండ్‌ను కష్టాల్లోకి నెట్టారు. అంతకుముందు కివీస్‌ తమ తొలి ఇన్నింగ్స్‌లో 368 పరుగులు చేయగా.. భారత్‌కు 352 పరుగుల భారీ ఆధిక్యం లభించింది. ఈ క్రమంలో టీమిండియా పలు అరుదైన రికార్డులను తన ఖాతాలో వేసుకుంది. ముఖ్యంగా టెస్టు క్రికెట్‌ దాదాపు 150 ఏళ్ల చరిత్రలో ఇప్పటివరకు ఏ జట్టుకూ సాధ్యం కాని ఘనతను భారత ఆటగాళ్లు నమోదు చేశారు.

150 ఏళ్ల టెస్టు చరిత్రలో తొలిసారి..

భారత తొలి ఇన్నింగ్స్‌లో మొదటి వికెట్‌ నుంచి ఏడో వికెట్‌ వరకు ప్రతి వికెట్‌కు 50కిపైగా పరుగుల భాగస్వామ్యం నమోదుకావ‌డం విశేషం. టెస్టు క్రికెట్‌ చరిత్రలో ఒక ఇన్నింగ్స్‌లో తొలి ఏడు వికెట్లకు 50కి పైగా పరుగుల భాగస్వామ్యాలు నమోదు కావడం ఇదే తొలిసారి. 1877 మార్చి 15న ఆస్ట్రేలియా-ఇంగ్లండ్‌ మధ్య తొలి టెస్టు ప్రారంభమైంది. అప్పటి నుంచి దాదాపు 150 ఏళ్లుగా కొనసాగుతున్న ఈ ఫార్మాట్‌లో భారత జట్టు ఈ అరుదైన రికార్డును సొంతం చేసుకుంది. ఈ ఇన్నింగ్స్‌లో రెండో వికెట్‌కు కేఎల్‌ రాహుల్‌-దేవదత్‌ పడిక్కల్‌ జోడీ అత్యధికంగా 165 పరుగులు జోడించింది. తొలి వికెట్‌కు యశస్వి జైస్వాల్‌-రాహుల్‌ 130 పరుగులు సాధించారు. మూడో వికెట్‌కు రాహుల్‌-శుభ్‌మన్‌ గిల్‌ 91 పరుగులు జోడించగా.. నాలుగో వికెట్‌కు గిల్‌-రిషభ్‌ పంత్‌ జోడీ 100 పరుగులు చేసింది. ఐదో వికెట్‌కు పంత్‌-అన్షుల్‌ కాంబోజ్‌ 68, ఆరో వికెట్‌కు పంత్‌-ధ్రువ్‌ జురెల్‌ 75 పరుగులు జోడించారు. ఏడో వికెట్‌కు జురెల్‌-వాషింగ్టన్‌ సుందర్‌ 54 పరుగులు సాధించారు. ఇలా వరుసగా ఏడు వికెట్లకు అర్ధసెంచరీ భాగస్వామ్యాలు నమోదు కావడం విశేషం.

ఒకే ఇన్నింగ్స్‌లో అత్యధిక 50+ భాగస్వామ్యాల రికార్డు

భారత ఇన్నింగ్స్‌లో మొత్తం ఏడు 50కి పైగా పరుగుల భాగస్వామ్యాలు నమోదయ్యాయి. అయితే, టెస్టుల్లో ఒక ఇన్నింగ్స్‌లో అత్యధిక 50 ప్లస్‌ భాగస్వామ్యాల రికార్డు ఇప్పటికీ భారత్‌ పేరిటే ఉంది. 2007లో ఓవల్‌ వేదికగా ఇంగ్లండ్‌తో జరిగిన టెస్టు తొలి ఇన్నింగ్స్‌లో టీమిండియా ఏకంగా ఎనిమిది 50కి పైగా భాగస్వామ్యాలు నమోదు చేసింది. ఈ జాబితాలో తాజా వెల్లింగ్టన్‌ ఇన్నింగ్స్‌ ఏడు భాగస్వామ్యాలతో తదుపరి స్థానాల్లో నిలిచింది. 2025-26లో సిడ్నీలో ఇంగ్లండ్‌తో జరిగిన టెస్టు రెండో ఇన్నింగ్స్‌లో ఆస్ట్రేలియా కూడా ఏడు భాగస్వామ్యాలు నమోదు చేసింది.

విదేశీ గడ్డపై అత్యధిక స్కోరు..

వెల్లింగ్టన్‌లో సాధించిన 720/9 స్కోరు భారత టెస్టు చరిత్రలో విదేశీ గడ్డపై అత్యధిక జట్టు స్కోరుగా నిలిచింది. అంతేకాదు సౌతాఫ్రికా, ఇంగ్లండ్‌, న్యూజిలాండ్‌, ఆస్ట్రేలియా దేశాలతో కూడిన సేనా (SENA) గడ్డపై కూడా భారత్‌కు ఇదే అత్యధిక స్కోరు. గతంలో ఈ రికార్డు 2010లో కొలంబోలో శ్రీలంకపై సాధించిన 707 పరుగులుగా ఉండేది. సేనా దేశాల్లో భారత అత్యధిక స్కోరు రికార్డు 2004లో సిడ్నీలో ఆస్ట్రేలియాపై చేసిన 705/7 (డిక్లేర్డ్‌). మొత్తం టెస్టు క్రికెట్‌లో భారత జట్టు సాధించిన అత్యధిక స్కోర్ల జాబితాలో 720/9 మూడో స్థానంలో నిలిచింది. 2016లో చెన్నైలో ఇంగ్లండ్‌పై 759/7 (డిక్లేర్డ్‌), 2009లో ముంబ‌యిలో శ్రీలంకపై 726/9 (డిక్లేర్డ్‌) తొలి రెండు స్థానాల్లో ఉన్నాయి.

న్యూజిలాండ్‌ గడ్డపై సరికొత్త రికార్డు

న్యూజిలాండ్‌ గడ్డపై ఏ జట్టూ సాధించని అత్యధిక టెస్టు ఇన్నింగ్స్‌ స్కోరును భారత్‌ నమోదు చేసింది. 2019లో హామిల్టన్‌లో బంగ్లాదేశ్‌పై న్యూజిలాండ్‌ సాధించిన 715/6 (డిక్లేర్డ్‌) స్కోరు ఇప్పటివరకు ఈ జాబితాలో అగ్రస్థానంలో ఉండేది. తాజా ఇన్నింగ్స్‌తో భారత్‌ ఆ రికార్డును అధిగమించింది. గతంలో న్యూజిలాండ్‌పై అత్యధిక స్కోరు సాధించిన విదేశీ జట్టుగా వెస్టిండీస్‌ నిలిచింది. 1995లో ఇదే వెల్లింగ్టన్‌ మైదానంలో ఆ జట్టు 660/5 పరుగులు చేసింది. న్యూజిలాండ్‌ గడ్డపై భారత్‌కు ఇదే అత్యధిక స్కోరు కూడా. అంతకుముందు 2009లో హామిల్టన్‌లో 520 పరుగులు, 1990లో ఆక్లాండ్‌లో 482 పరుగులు, 2009లో నేపియర్‌లో 476/4, 2014లో వెల్లింగ్టన్‌లో 438 పరుగులు సాధించింది.

ఐదోసారి 700 పరుగుల మార్క్‌ దాటిన భారత్‌

టెస్టు క్రికెట్‌లో టీమిండియా 700కు పైగా పరుగులు సాధించడం ఇది ఐదోసారి. ఈ జాబితాలో ఏడు సార్లతో శ్రీలంక అగ్రస్థానంలో కొనసాగుతోంది. భారత్‌ తర్వాత ఇంగ్లండ్‌, ఆస్ట్రేలియా, వెస్టిండీస్‌ జట్లు తలో నాలుగుసార్లు ఈ ఘనత సాధించాయి. పాకిస్థాన్‌ రెండుసార్లు, న్యూజిలాండ్‌ ఒకసారి 700కు పైగా స్కోరు నమోదు చేశాయి. ఇదిలా ఉండ‌గా.. సిక్స‌ర్ల విష‌యంలో భార‌త్ మ‌రో ఘ‌న‌త న‌మోదు చేసింది. న్యూజిలాండ్‌తో ఇన్నింగ్స్‌లో భారత బ్యాటర్లు మొత్తం 14 సిక్సర్లు బాదారు. దీంతో టెస్టు ఇన్నింగ్స్‌లో అత్యధిక సిక్సర్లు కొట్టిన భారత జట్ల జాబితాలో సంయుక్తంగా మూడో స్థానానికి చేరుకున్నారు. 2024లో రాజ్‌కోట్‌లో ఇంగ్లండ్‌పై భారత్‌ 18 సిక్సర్లు బాదగా.. 2009లో ముంబ‌యిలో శ్రీలంకపై 15 సిక్సర్లు కొట్టింది. 2019లో విశాఖపట్నంలో దక్షిణాఫ్రికాపై కూడా 14 సిక్సర్లు నమోదయ్యాయి. తాజాగా వెల్లింగ్టన్‌లోనూ అదే సంఖ్యలో సిక్సర్లు బాదడం విశేషం.

డఫీకి చెత్త రికార్డు..

భారత బ్యాటర్ల ధాటికి న్యూజిలాండ్‌ బౌలర్లు భారీగా పరుగులు సమర్పించుకున్నారు. ముఖ్యంగా జాకబ్‌ డఫీ తీవ్రంగా నిరాశపరిచాడు. 33 ఓవర్లు వేసిన అతడు ఒక వికెట్‌ మాత్రమే తీసి ఏకంగా 201 పరుగులు ఇచ్చాడు. ఓవర్‌కు 6.09 పరుగుల ఎకానమీతో బౌలింగ్‌ చేశాడు. న్యూజిలాండ్‌ టెస్టు చరిత్రలో ఒక ఇన్నింగ్స్‌లో అత్యధిక పరుగులు ఇచ్చిన బౌలర్ల జాబితాలో డఫీ రెండో స్థానానికి చేరాడు. 1989లో ఆక్లాండ్‌లో పాకిస్థాన్‌తో జరిగిన టెస్టులో స్టీఫెన్‌ బూక్‌ 229 పరుగులు సమర్పించుకుని ఈ జాబితాలో అగ్రస్థానంలో ఉన్నాడు. ఆ తర్వాత డఫీ 201 పరుగులతో నిలిచాడు. 1999లో అహ్మదాబాద్‌లో భారత్‌పై డానియెల్‌ వెటోరి 200 పరుగులు ఇచ్చాడు. టెస్టు క్రికెట్‌ చరిత్రలో 33 లేదంటే అంతకంటే ఎక్కువ ఓవర్లు వేసి, ఓవర్‌కు ఆరు కంటే ఎక్కువ పరుగుల చొప్పున ఇస్తూ 200కు పైగా పరుగులు సమర్పించుకున్న రెండో బౌలర్‌గా కూడా డఫీ నిలిచాడు. అంతకుముందు 2022లో రావల్పిండిలో ఇంగ్లండ్‌తో జరిగిన టెస్టులో పాకిస్థాన్‌ బౌలర్‌ జాహిద్‌ మహమూద్‌ 33 ఓవర్లలో 235 పరుగులు ఇచ్చాడు.

రికార్డుల మోత..

ఒకే ఇన్నింగ్స్‌లో తొలి ఏడు వికెట్లకు 50 ప్లస్‌ భాగస్వామ్యాలు, విదేశీ గడ్డపై అత్యధిక స్కోరు, న్యూజిలాండ్‌ గడ్డపై ఏ జట్టుకైనా అత్యధిక టెస్టు స్కోరు.. ఇలా భారత జట్టు ఒకే ఇన్నింగ్స్‌తో రికార్డుల పుస్తకాలను తిరగరాసింది. బ్యాటింగ్‌లో సమష్టిగా రాణించిన భారత ఆటగాళ్లు కివీస్‌ బౌలింగ్‌ దళంపై పూర్తి ఆధిపత్యం ప్రదర్శించారు. ఇక మ్యాచ్ గ‌ణాంకాల విష‌యానికి వ‌స్తే.. భార‌త్ తొలి ఇన్నింగ్స్‌లో తొమ్మిది వికెట్ల న‌ష్టానికి 720 ప‌రుగులు చేసింది. న్యూజిలాండ్ తొలి ఇన్సింగ్‌లో 368 ప‌రుగులు చేయ‌గా.. భార‌త్‌కు 352 ప‌రుగుల ఆధిక్యం ద‌క్కింది. ప్ర‌స్తుతం న్యూజిలాండ్ రెండో ఇన్నింగ్స్‌లో ఒక వికెట్ న‌ష్టానికి 33 ప‌రుగులు చేసింది.

Advertisement
Advertisement