Uruguay Vs Spain | ఉరుగ్వేకు షాక్‌.. టోర్నీ నుంచి నిష్క్రమించిన మాజీ చాంపియన్‌

• 1-0 తేడాతో స్పెయిన్‌ విజయం
• గ్రూప్‌ టాపర్‌గా స్పెయిన్‌
• చిన్న పొరపాటుతో టోర్నీ నుంచి నిష్క్రమించిన ఉరుగ్వే

Uruguay Vs Spain | ఫిఫా ప్రపంచకప్‌-2026 గ్రూప్‌-హెచ్‌లో స్పెయిన్‌ అగ్రస్థానంతో నాకౌట్‌లోకి ప్రవేశించింది. మెక్సికోలోని గ్వాడలహారాలో జరిగిన చివరి లీగ్‌ మ్యాచ్‌లో ఉరుగ్వేపై 1-0తో విజయం సాధించిన స్పెయిన్‌ ఏడు పాయింట్లతో గ్రూప్‌ విజేతగా నిలిచి రౌండ్‌ ఆఫ్‌-32కు అర్హత సాధించింది. మరోవైపు ఈ ఓటమితో రెండుసార్లు ప్రపంచ చాంపియన్‌గా నిలిచిన ఉరుగ్వే టోర్నీ నుంచి నిష్క్రమించింది. మ్యాచ్‌లో స్పెయిన్‌కు విజయాన్ని అందించిన ఏకైక గోల్‌ను అలెక్స్‌ బయెనా 42వ నిమిషంలో వేశాడు. సాధారణంగా అడ్డుకోవాల్సిన షాట్‌ను ఉరుగ్వే సీనియర్‌ గోల్‌కీపర్‌ ఫెర్నాండో ముస్లెరా చేజార్చడంతో బంతి నేరుగా గోల్‌లోకి వెళ్లింది. ఈ పొరపాటు మ్యాచ్‌ ఫలితాన్ని నిర్ణయించింది.

విరామం తర్వాత ఉరుగ్వే కోచ్‌ మార్సెలో బియెల్సా 40 ఏళ్ల ముస్లెరా స్థానంలో సెర్జియో రోచెట్‌ను బరిలోకి దింపాడు. అనంతరం ఫెడెరికో వాల్వెర్డేను కూడా మార్చి జట్టులో మార్పులు చేసినా ఫలితం లేకపోయింది. రెండో అర్ధభాగంలో ఉరుగ్వే దాడులు పెంచినా స్పెయిన్‌ గోల్‌కీపర్‌ ఉనాయ్‌ సిమోన్‌ కీలక సేవ్‌లతో మాథియాస్‌ ఒలివెరా, నికోలాస్‌ డి లా క్రూజ్‌ ప్రయత్నాలను అడ్డుకున్నాడు. మరోవైపు ఫెర్రాన్‌ టొర్రెస్‌ కొట్టిన షాట్‌ క్రాస్‌బార్‌ను తాకింది. మ్యాచ్‌ చివర్లో ఉరుగ్వే నిరాశ మరింత పెరిగింది. ఇంజ్యూరీ టైమ్‌లో పౌ కుబార్సిపై నిర్లక్ష్యంగా టాకిల్‌ చేసిన అగస్టిన్‌ కానోబ్బియోకు రెడ్‌కార్డుతో మైదానం వీడాల్సి వచ్చింది. దీంతో పది మంది ఆటగాళ్లతోనే మ్యాచ్‌ను ముగించాల్సి వచ్చింది.

ఉరుగ్వేకు ఎదురుదెబ్బలు..

ఉరుగ్వేకు మ్యాచ్‌ ఆరంభంలోనే మరో ఎదురుదెబ్బ తగిలింది. మిడ్‌ఫీల్డర్‌ మాన్యుయెల్‌ ఉగార్టే తొలి అర్ధభాగంలో గాయపడి స్ట్రెచర్‌పై మైదానం వీడాడు. అతడి గాయం తీవ్రతపై ఇంకా స్పష్టత రాలేదు. స్పెయిన్‌ యువ సంచలనం లామిన్‌ యమాల్‌ పలు అవకాశాలు వచ్చినా గోల్‌ చేయలేకపోయాడు. ఒక సందర్భంలో అతడి నుంచి వచ్చిన అద్భుత పాస్‌ గోల్‌గా మారే అవకాశాన్ని సహచర ఆటగాడు వినియోగించుకోలేకపోయాడు. ఈ ఫలితంతో 2010 ప్రపంచ ఛాంపియన్‌, 2024 యూరో కప్‌ విజేత అయిన స్పెయిన్‌ టైటిల్‌ ఫేవరెట్‌గా తన జోరును కొనసాగించింది. మరోవైపు 1930, 1950 ప్రపంచకప్‌లను గెలిచిన ఉరుగ్వే ఈసారి ఒక్క విజయమూ నమోదు చేయకుండానే టోర్నీకి వీడ్కోలు పలికింది. సౌదీ అరేబియా, కేప్‌ వెర్డేతో డ్రా చేసుకున్న ఉరుగ్వే చివరగా స్పెయిన్‌ చేతిలో ఓడి నిష్క్రమించింది. టోర్నీలో 16వ ర్యాంక్‌తో బరిలోకి దిగిన జట్లలో నాకౌట్‌కు చేరలేకపోయిన జట్టుగా నిలిచింది.