T20 Cricket | స్మృతి మంధాన సరికొత్త రికార్డు.. టీ20ల్లో చరిత్ర

T20 Cricket | భారత మహిళల క్రికెట్‌ జట్టు స్టార్‌ ఓపెనర్‌, వైస్‌ కెప్టెన్‌ స్మృతి మంధాన ఖాతాలో మరో అరుదైన రికార్డు చేరింది. టీ20 అంతర్జాతీయ క్రికెట్‌లో పురుషులు, మహిళలు అనే తేడా లేకుండా అత్యధిక పరుగులు చేసిన బ్యాటర్‌గా మంధాన చరిత్ర సృష్టించింది. ఆసియా క్రీడల సెమీఫైనల్లో బంగ్లాదేశ్‌తో జరిగిన మ్యాచ్‌లో ఈ ఘనత అందుకుంది. కొరోగి స్పోర్ట్స్‌ పార్క్‌లో జరిగిన పోరులో మంధాన 19 బంతుల్లోనే 37 పరుగులతో వేగంగా పరుగులు రాబట్టింది. ఈ ఇన్నింగ్స్‌లోనే న్యూజిలాండ్‌ మాజీ స్టార్‌ సూజీ బేట్స్‌ పేరిట ఉన్న రికార్డును అధిగమించింది.

మ్యాచ్‌కు ముందు మంధాన 170 ఇన్నింగ్స్‌ల్లో 4,751 పరుగులతో రెండో స్థానంలో ఉంది. అగ్రస్థానంలో ఉన్న సూజీ బేట్స్‌ రికార్డును బద్దలు కొట్టాలంటే మరో 8 పరుగులు మాత్రమే కావాల్సి వచ్చింది. ఇన్నింగ్స్‌ ఆరంభంలోనే రెండు ఫోర్లు, రెండు సింగిల్స్‌ బాదిన మంధాన ఆ మార్కును అందుకుంది. దీంతో 171 ఇన్నింగ్స్‌ల్లో 4,788 పరుగులతో టీ20ల్లో అత్యధిక పరుగులు చేసిన బ్యాటర్‌గా నిలిచింది. మంధాన తర్వాత సూజీ బేట్స్‌ 4,758 పరుగులతో రెండో స్థానంలో ఉంది. పాకిస్థాన్‌ కెప్టెన్‌ బాబర్‌ ఆజం 4,596 పరుగులతో మూడో స్థానంలో ఉండగా.. ఇంగ్లండ్‌ మాజీ కెప్టెన్‌ జోస్‌ బట్లర్‌ 4,292 పరుగులతో నాలుగో స్థానంలో కొనసాగుతున్నాడు.

భారత కెప్టెన్‌ హర్మన్‌ప్రీత్‌ కౌర్‌ 4,287 పరుగులతో ఐదో స్థానంలో ఉంది. పురుషుల టీ20 క్రికెట్‌లోని అగ్రశ్రేణి బ్యాటర్లను దాటుకుని మంధాన ఈ జాబితాలో అగ్రస్థానానికి చేరుకోవడం విశేషం. ఆసియా క్రీడల సెమీఫైనల్‌లో టాస్‌ గెలిచిన భారత్‌ తొలుత బ్యాటింగ్‌కు దిగింది. 2023 హాంగ్‌జౌ ఆసియా క్రీడల్లో స్వర్ణ పతకం సాధించిన భారత మహిళల జట్టు.. ఈసారి కూడా టైటిల్‌ను నిలబెట్టుకోవాలని లక్ష్యంగా పెట్టుకుంది. క్వార్టర్‌ఫైనల్‌లో ఆతిథ్య జపాన్‌ను ఓడించి సెమీఫైనల్‌ బెర్త్‌ ఖరారు చేసుకుంది.