ICC Women’s ODI Rankings | స్మృతి మంధాన టాప్‌ ప్లేస్‌ పదిలం..! ఐసీసీ వన్డే ర్యాంకింగ్స్‌లో అగ్రస్థానం..

ICC Women's ODI Rankings | భారత మహిళల క్రికెట్‌ జట్టు కొత్త కెప్టెన్‌ స్మృతి మంధాన ఐసీసీ వన్డే బ్యాటింగ్‌ ర్యాంకింగ్స్‌లో అగ్రస్థానాన్ని నిలబెట్టుకుంది. మంగళవారం విడుద‌లైన తాజా ర్యాంకింగ్స్‌లో 790 రేటింగ్‌ పాయింట్లతో టాప్‌ ప్లేస్‌లో నిలిచింది. మరోవైపు, ఆస్ట్రేలియా స్టార్‌ క్రికెటర్‌ ఎలీస్‌ పెర్రీ తిరిగి టాప్‌-10లో చోటు సంపాదించింది. వన్డే బ్యాటింగ్‌ ర్యాంకింగ్స్‌లో టాప్‌-10లో స్మృతి మంధానతో పాటు భారత కెప్టెన్‌ హర్మన్‌ప్రీత్‌ కౌర్‌ మాత్రమే ఉన్న‌ది. హర్మన్‌ప్రీత్‌ 652 పాయింట్లతో తొమ్మిదో స్థానంలో నిలిచింది. ఇటీవల హర్మన్‌ప్రీత్‌ నుంచి కెప్టెన్సీ బాధ్యతలు స్వీకరించిన మంధాన.. బ్యాటింగ్‌లోనూ అగ్రస్థానాన్ని కొనసాగిస్తూ సత్తా చాటింది. వన్డే బౌలింగ్‌ ర్యాంకింగ్స్‌లో భారత ఆల్‌రౌండర్‌ దీప్తి శర్మ ఒక స్థానం దిగజారి తొమ్మిదో స్థానానికి చేరింది. ఆస్ట్రేలియా బౌలర్లు అనాబెల్‌ సదర్లాండ్‌, మేగన్‌ షట్‌ ర్యాంకింగ్స్ మెరుగ‌య్యాయి.

టీ20ల్లో టాప్‌-10లో ముగ్గురు భారత బ్యాటర్లు

మహిళల టీ20 బ్యాటింగ్‌ ర్యాంకింగ్స్‌లోనూ భారత క్రికెటర్లు సత్తా చాటారు. టాప్‌-10లో ముగ్గురు భారత బ్యాటర్లు చోటు దక్కించుకున్నారు. షఫాలీ వర్మ 759 పాయింట్లతో నాలుగో స్థానంలో నిలవగా.. స్మృతి మంధాన 754 పాయింట్లతో ఐదో స్థానంలో ఉంది. హర్మన్‌ప్రీత్‌ కౌర్‌ 656 పాయింట్లతో పదో స్థానాన్ని దక్కించుకుంది. టీ20 బౌలింగ్‌ ర్యాంకింగ్స్‌లో భారత స్పిన్నర్లు ఆధిపత్యం కొన‌సాగుతోంది. శ్రీఛరణి 817 రేటింగ్‌ పాయింట్లతో అగ్రస్థానంలో నిలవగా.. దీప్తి శర్మ 754 పాయింట్లతో రెండో స్థానాన్ని దక్కించుకుంది. దీంతో ఈ విభాగంలో తొలి రెండు స్థానాలు భారత బౌలర్లకే లభించాయి. మహిళల టీ20 ఆల్‌రౌండర్ల ర్యాంకింగ్స్‌లో టాప్‌-10లో చోటు దక్కించుకున్న ఏకైక భారత క్రికెటర్‌గా దీప్తి శర్మ నిలిచింది. ఆమె నాలుగో స్థానంలో కొనసాగుతోంది. వన్డే ఆల్‌రౌండర్ల జాబితాలో ఆరో స్థానంలో ఉంది. ఇక మహిళల వన్డే, టీ20 జట్ల ర్యాంకింగ్స్‌లో భారత్‌ మూడో స్థానంలో కొనసాగుతోంది.