Shane Warne’s Death | నా తండ్రి మ‌ర‌ణానికి కొవిడ్ టీకానే కార‌ణం కావొచ్చు..! షేన్ వార్న్ మృతిపై కొడుకు సంచ‌ల‌న వ్యాఖ్య‌లు..!

Shane Warne's Death | ఆస్ట్రేలియా క్రికెట్‌ దిగ్గజం షేన్‌ వార్న్ మ‌ర‌ణించి నాలుగేళ్ల‌వుతోంది. ఈ సంద‌ర్భంగా ఆయన కుమారుడు జాక్సన్‌ వార్న్‌ సంచలన వ్యాఖ్యలు చేశారు. కొవిడ్‌ టీకాల ప్రభావమే తన తండ్రి మరణానికి కారణమై ఉండొచ్చని ఆయన అనుమానాలు వ్య‌క్తం చేశారు. “టూ వరల్డ్స్‌ కొలైడ్‌” పోడ్‌కాస్ట్‌లో మాట్లాడిన జాక్సన్‌... తన తండ్రి ఆరోగ్య సమస్యలను అంగీకరించినప్పటికీ కొవిడ్‌ వ్యాక్సిన్‌ పరిస్థితిని మరింత తీవ్రం చేసిందని భావిస్తున్నానన్నారు. 2022లో థాయ్‌లాండ్‌లో గుండెపోటుతో 52 ఏళ్ల వయసులో వార్న్‌ మృతి చెందిన విషయం తెలిసిందే.

ఈ వ్యాఖ్యలను నాలుగేళ్ల తర్వాత వెల్లడించడం గురించి జాక్సన్‌ మాట్లాడుతూ “ఇప్పుడీ విషయాన్ని చెబితే పెద్దగా వివాదం ఉండ‌ద‌ని అనుకుంటున్నాన‌ని, నాన్నకు ఇప్పటికే కొంత ఆరోగ్య సమస్యలు ఉన్నా, వ్యాక్సిన్‌ వల్ల అవి బయటపడ్డాయని నా అభిప్రాయ‌మ‌ని తెలిపాడు. ఇది త‌న‌కు తరచూ గుర్తొచ్చే విషయమ‌ని పేర్కొన్నారు. వార్న్‌ మరణ వార్త విన్న వెంటనే తన తొలి స్పందన స‌మ‌యంలో ప్రభుత్వం, కొవిడ్‌, వ్యాక్సిన్‌లను తొట్టిపోసిన విష‌యాన్ని గుర్తు చేశారు. అయితే, ఆ భావోద్వేగాలను అంత్యక్రియల సమయంలో బయటపెట్టకుండా ఉండడం మంచిదైందని జాక్సన్‌ అభిప్రాయపడ్డారు. “అలా చేసి ఉంటే పరిస్థితి పూర్తిగా మారిపోయేది. కానీ, అప్పట్లో నాకు అలా అనిపించింది” అని చెప్పారు.

తన తండ్రి ఆరోగ్య పరిస్థితిపై మాట్లాడుతూ ధూమపానం, మద్యం సేవించినప్పటికీ అప్పటికి బాగానే ఆరోగ్యంగా ఉన్నాడ‌ని తెలిపారు. ఎంతో కాలం తర్వాత సంతోషంగా, ఉత్సాహంగా క‌నిపించాడ‌ని.. కొంతమంది 80-90 ఏళ్ల వయసులో కూడా ఇలాంటి అలవాట్లు కొనసాగిస్తార‌ని చెప్పాడు. వార్న్‌ మరణానికి కొన్ని నెలల ముందు కొవిడ్‌ బారిన పడినట్లు కూడా తెలిపాడు. మరణించే సమయానికి తీవ్రమైన అనారోగ్య సమస్యలు లేవని స్ప‌ష్టం చేశారు.