Andy flower | ఆత్మవిశ్వాసమే ఆర్సీబీ విజయ రహస్యం: ఆండీ ఫ్లవర్

Andy flower | రెండో ఏడాది వరుసగా ఐపీఎల్ ట్రోఫీని సొంతం చేసుకున్న రాయల్ ఛాలెంజర్స్ బెంగళూరు విక్ట‌రీ వెనుక ఉన్న అసలు కారణాన్ని జట్టు హెడ్ కోచ్ ఆండీ ఫ్లవర్ వెల్లడించాడు. గత సీజన్‌లో తొలి టైటిల్ సాధించినప్పుడు నెలకొన్న ఒత్తిడి, ఈసారి టైటిల్‌ను నిలబెట్టుకునే క్రమంలో కనిపించిన ఆత్మవిశ్వాసం మధ్య స్పష్టమైన తేడా ఉందని ఆయన పేర్కొన్నాడు. సోమవారం నిర్వహించిన వర్చువల్ మీడియా సమావేశంలో ఫ్లవర్ మాట్లాడుతూ 2024 సీజన్‌లో ఎదురైన ప్రతికూల పరిస్థితులే జట్టును మరింత దృఢంగా మార్చాయని చెప్పాడు. ఆ సీజన్ తొలి దశలో వరుస ఎదురుదెబ్బలు తగిలినా, అదే పరిస్థితులు తమలో పోరాటస్ఫూర్తిని పెంచాయని వివరించాడు. కఠిన సమయాల్లో తీసుకున్న ధైర్యవంతమైన నిర్ణయాలు తర్వాతి విజయాలకు బాటలు వేసాయని పేర్కొన్నాడు.

2025లో తొలి టైటిల్ గెలిచినప్పుడు జట్టులో ఉత్సాహంతో పాటు కొంత ఆందోళన కూడా కనిపించిందని గుర్తు చేశాడు. ఆర్సీబీకి అప్పటివరకు ట్రోఫీ గెలిచిన చరిత్ర లేకపోవడంతో ప్రతి మ్యాచ్‌లో ఒత్తిడి ఉండేదని చెప్పాడు. అయితే టైటిల్ విజయానంతరం ఆటగాళ్లలో వచ్చిన నమ్మకం ఈ ఏడాది జట్టు ప్రదర్శనలో స్పష్టంగా కనిపించిందన్నాడు. విరాట్ కోహ్లీ, భువనేశ్వర్ కుమార్, జోష్ హేజిల్‌వుడ్, కృనాల్ పాండ్యా వంటి అనుభవజ్ఞుల ఉనికి జట్టుకు ఎంతో బలాన్నిచ్చిందని ఫ్లవర్ అభిప్రాయపడ్డాడు. ముఖ్యంగా ప్లేఆఫ్స్ దశకు చేరుకునే సమయానికి ఆటగాళ్లలో కనిపించిన ప్రశాంతత, ఆత్మవిశ్వాసం జట్టును మరోసారి ఛాంపియన్‌గా నిలబెట్టిందని వివరించాడు.

జట్టు విజయానికి కేవలం మైదానంలో ఆడినవాళ్లే కాకుండా బెంచ్‌పై ఉన్న ఆటగాళ్లు కూడా కీలక పాత్ర పోషించారని ఫ్లవర్ చెప్పాడు. అవకాశం రాకపోయినా ప్రతి ఆటగాడు జట్టులో భాగమనే భావన కల్పించడం తమ నిర్వహణలో ముఖ్యాంశమని పేర్కొన్నాడు. యువ ఆటగాళ్లు సీనియర్ల నుంచి నేర్చుకునే వాతావరణాన్ని సృష్టించగలిగామని, అదే జట్టు సంస్కృతిని మరింత బలోపేతం చేసిందని అన్నాడు. ఈ సందర్భంగా వెంకటేశ్ అయ్యర్‌ను ప్రత్యేకంగా ప్రస్తావించిన ఫ్లవర్, జట్టు అవసరాల దృష్ట్యా కొన్ని మ్యాచ్‌లకు దూరంగా ఉన్నప్పటికీ ఆయన అసహనం ప్రదర్శించలేదని చెప్పాడు. అవకాశం వచ్చిన వెంటనే తన సామర్థ్యాన్ని నిరూపించి కీలక ఇన్నింగ్స్‌లతో జట్టు విజయాల్లో భాగస్వామి అయ్యాడని కొనియాడాడు.

సీనియర్ ఆటగాళ్ల అనుభవం గురించి మాట్లాడుతూ, ఒత్తిడి పరిస్థితుల్లో ప్రశాంతంగా ఉండగల సామర్థ్యం వారిని ప్రత్యేకంగా నిలబెడుతుందని ఫ్లవర్ పేర్కొన్నాడు. అంతర్జాతీయ స్థాయిలో పెద్ద టోర్నీల్లో ఆడిన అనుభవం జట్టుకు ఎంతో ఉపయోగపడిందని చెప్పాడు. ముఖ్యంగా గత రెండు సీజన్లలో భువనేశ్వర్ కుమార్ కీలక సందర్భాల్లో అందించిన ప్రదర్శనలు లేకపోయి ఉంటే ఈ విజయాలు సాధ్యమయ్యేవి కాదని స్పష్టం చేశాడు. ఈ విజయాలతో వచ్చిన నమ్మకాన్ని కొనసాగిస్తూ వచ్చే సీజన్‌లోనూ అదే స్థాయిలో ప్రదర్శన కనబర్చడమే తమ తదుపరి లక్ష్యమని ఆండీ ఫ్లవర్ వెల్లడించాడు.