Team India | అఫ్గాన్‌తో టీ20 సిరీస్‌కు భారత్ జట్టు ప్రకటన.. మ‌ళ్లీ జ‌ట్టులోకి వ‌చ్చిన సంజూ శాంస‌న్‌

Team India | అఫ్గానిస్థాన్‌తో జరగనున్న మూడు టీ20ల సిరీస్‌కు భారత జట్టును బీసీసీఐ మంగ‌ళ‌వారం ప్ర‌క‌టించింది. సెప్టెంబరు 13 నుంచి 17 వరకు ఢిల్లీలోని అరుణ్ జైట్లీ స్టేడియంలో మూడు మ్యాచ్‌లు జరగనున్నాయి. శ్రేయస్ అయ్యర్ కెప్టెన్‌గా, తిలక్ వర్మ వైస్ కెప్టెన్‌గా వ్యవహరించనున్నాడు. జింబాబ్వే పర్యటనకు దూరమైన సంజూ శాంసన్ తిరిగి జట్టులోకి వచ్చాడు. పాదం గాయం నుంచి కోలుకున్న వరుణ్ చక్రవర్తి జ‌ట్టులో చోటు ద‌క్కింది. జస్ప్రీత్ బుమ్రా, హర్షిత్ రాణా, వాషింగ్టన్ సుందర్, నితీశ్ కుమార్ రెడ్డిల ఎంపిక ఫిట్‌నెస్‌ క్లియరెన్స్‌కు లోబడి ఉంటుంది. గాయం నుంచి పూర్తిగా కోలుకోని హార్దిక్ పాండ్యాకు ఈ సిరీస్‌లో చోటు దక్కలేదు.

టీ20 ప్రపంచకప్‌ విజేతగా నిలిచినా.. ఇటీవల పొట్టి ఫార్మాట్‌లో భారత్‌కు ఫలితాలు అనుకూలంగా రావ‌డం లేదు. బెల్‌ఫాస్ట్ వేదికగా ఐర్లాండ్ చేతిలో 0-2తో సిరీస్ కోల్పోయిన భారత్.. ఆ తర్వాత ఇంగ్లాండ్‌తో 0-4తో పరాజయం పాలైంది. ఓ మ్యాచ్ వర్షం కారణంగా రద్దయింది. అనంతరం ఇంగ్లాండ్‌తో జరిగిన వన్డే సిరీస్‌ను కూడా 1-2తో కోల్పోయింది. జింబాబ్వేతో జరిగిన మూడు టీ20ల సిరీస్‌ను 3-0తో గెలిచి అఫ్గాన్ సిరీస్‌కు సిద్ధమైంది. మరోవైపు అఫ్గానిస్థాన్.. భారత్‌లో జరిగిన టీ20 ప్రపంచకప్ తర్వాత ఇప్పటివరకు ఒక్క టీ20 అంతర్జాతీయ మ్యాచ్ కూడా ఆడలేదు. ప్రపంచకప్‌లో నాలుగు మ్యాచ్‌లు ఆడిన ఆ జట్టు రెండింటిలో విజయం సాధించినప్పటికీ సూపర్ ఎయిట్ దశకు చేరుకోలేకపోయింది. భారత్, అఫ్గానిస్థాన్ జట్లు చివరిసారిగా జూన్‌లో తలపడ్డాయి. ఒక టెస్టులో ఇన్నింగ్స్‌ 300 పరుగుల తేడాతో గెలిచిన భారత్.. అనంతరం మూడు వన్డేల సిరీస్‌ను 3-0తో క్లీన్‌స్వీప్ చేసింది. ఇప్పుడు ఇరు జట్లు టీ20 ఫార్మాట్‌లో మరోసారి తలపడనున్నాయి.

భారత జట్టు : శ్రేయస్ అయ్యర్ (కెప్టెన్), అభిషేక్ శర్మ, వైభవ్ సూర్యవంశీ, సంజూ శాంసన్ (వికెట్‌కీపర్), ఇషాన్ కిషన్ (వికెట్‌కీపర్), తిలక్ వర్మ (వైస్ కెప్టెన్), శివమ్ దూబె, నితీశ్ కుమార్ రెడ్డి*, అక్షర్ పటేల్, వాషింగ్టన్ సుందర్*, వరుణ్ చక్రవర్తి, రవి బిష్ణోయ్, జస్ప్రీత్ బుమ్రా*, అర్ష్‌దీప్ సింగ్, హర్షిత్ రాణా*.