Netherlands vs Tunisia | నాకౌట్‌లోకి నెద‌ర్లాండ్స్‌.. ట్యునీషియాపై 3-1 తేడాతో విక్ట‌రీ

• అజేయంగా గ్రూప్ స్టేజ్‌నుంచి రౌండ్ ఆఫ్ 32లోకి డ‌చ్ జ‌ట్టు
• ఇంటిబాట‌ప‌ట్టిన ట్యునీషియా

Netherlands vs Tunisia | ఫిఫా ప్రపంచకప్‌లో (FIFA World Cup 2026) నెదర్లాండ్స్ అత్య‌ద్భుత ప్ర‌ద‌ర్శ‌న‌తో గ్రూప్‌-ఎఫ్‌లో అగ్ర‌స్థానాన్ని ద‌క్కించుకుంది. గురువారం జ‌రిగిన మ్యాచ్లో ట్యునీషియాపై 3-1 తేడాతో (Netherlands vs Tunisia) డ‌చ్ జ‌ట్టు విజ‌యం సాధించింది. జట్టు గ్రూప్ దశను అజేయంగా ముగించింది. మరో మ్యాచ్‌లో జపాన్, స్వీడన్ 1-1తో డ్రా చేసుకోవడంతో రెండు జట్లు కూడా రౌండ్ ఆఫ్ 32కు అర్హత సాధించాయి. నెదర్లాండ్స్ ఏడు పాయింట్లతో గ్రూప్‌లో మొదటి స్థానంలో నిలవగా.. జపాన్ ఐదు పాయింట్ల‌తో రెండోస్థానంలో నిలిచింది. నాలుగు పాయింట్లతో స్వీడన్ ఉత్తమ మూడోస్థానంలో నిలిచింది. ట్యునీషియా మాత్రం ఒక్క పాయింట్ కూడా సాధించకుండానే టోర్నీ నుంచి నిష్క్రమించింది.

ట్యునీషియాతో మ్యాచ్‌లో నెదర్లాండ్స్ ఆరంభం నుంచే ఆధిపత్యం ప్రదర్శించింది. మ్యాచ్ ప్రారంభమైన మూడో నిమిషంలోనే డెంజెల్ డమ్‌ఫ్రీస్ పంపిన క్రాస్‌ను ట్యునీషియా కెప్టెన్ ఎల్లీస్ స్కిరి పొరపాటున ఓన్‌గోల్‌గా మలచడంతో డచ్ జట్టు 1-0 ఆధిక్యంలోకి వెళ్లింది. ఆ తర్వాత నాలుగు నిమిషాల్లోనే నెదర్లాండ్స్ ఆధిక్యాన్ని పెంచింది. విర్జిల్ వాన్ డైక్ ఇచ్చిన ఫ్లిక్‌ను అందుకున్న బ్రియాన్ బ్రోబ్బీ దగ్గరి నుంచి గోల్ చేసి స్కోరును 2-0గా మార్చాడు. ఈ ప్ర‌పంచ‌క‌ప్‌లో అత‌నికి ఇది మూడోగోల్‌.

రెండో అర్ధభాగంలో ట్యునీషియా పోరాట పటిమ చూపించింది. 54వ నిమిషంలో హజెమ్ మస్తౌరీ హెడర్‌తో గోల్ చేసి స్కోరును 2-1కి తీసుకొచ్చాడు. అయితే, డచ్ జట్టు ఎక్కువ సమయం ఇవ్వ‌కుండా 62వ నిమిషంలో జాన్ పాల్ వాన్ హెకె మరో అద్భుతమైన కార్నర్ నుంచి హెడర్‌తో గోల్ చేసి నెదర్లాండ్స్ విజయాన్ని ఖాయం చేశాడు. గోల్‌కీపర్ బార్ట్ వెర్బ్రుగెన్ మూడు అద్భుతమైన సేవ్‌లు చేయగా.. ట్యునీషియా కీపర్ అయ్‌మెన్ డాహ్‌మెన్ నాలుగు సేవ్‌లతో జట్టును మరింత నష్టపోకుండా కాపాడాడు. ట్యునీషియా టోర్నీలో రెండు గోల్స్ మాత్రమే చేసి, 12 గోల్స్ సమర్పించుకుంది.