Norway vs Iraq | ఫిఫా ప్రపంచకప్‌లో నార్వే సంచలనం

• 28 తర్వాత ప్రపంచకప్‌లోకి ఎంట్రీ ఇచ్చిన జట్టు
• మొదటి మ్యాచ్‌లోనే ఇరాక్‌పై 4-1 తేడాతో విజయం
• తొలి ప్రపంచకప్‌లోనే హాలాండ్ డబుల్‌ గోల్‌

Norway vs Iraq | ఫిఫా ప్రపంచకప్‌లో నార్వే జట్టు సంచలనం సృష్టించింది. మంగళవారం జరిగిన గ్రూప్-ఐ మ్యాచ్‌లో ఇరాక్‌పై 4-1 తేడాతో విజయం సాధించింది. జట్టు స్టార్ స్ట్రయికర్‌ ఎర్లింగ్ హాలాండ్ తన తొలి ప్రపంచకప్ మ్యాచ్‌లోనే రెండు గోల్స్ చేసి జట్టు విజయంలో కీలకపాత్ర పోషించాడు. 28 ఏళ్ల సుదీర్ఘ విరామం తర్వాత ప్రపంచకప్‌లోకి అడుగుపెట్టిన నార్వే.. తొలి మ్యాచ్‌లోనే దూకుడుగా ఆడి ప్రత్యర్థులకు హెచ్చరికలు పంపింది. అయితే, ప్రారంభంలో జాగ్రత్తగా ఆడిన ఇరాక్ కూడా ఏమాత్రం వెనక్కి తగ్గలేదు. మ్యాచ్ ప్రారంభమైన 29వ నిమిషంలో హాలాండ్ తన ప్రపంచకప్‌లో ఖాతా తెరిచాడు. డేవిడ్ మొల్లర్ వోల్ఫ్ ఇచ్చిన లో క్రాస్‌ను సమర్థంగా అందుకుని గోల్‌గా మలిచాడు.

అయితే, ఇరాక్ వెంటనే స్పందించింది. 10 నిమిషాలకే అయ్మెన్ హుస్సేన్ అద్భుతమైన హెడ్డర్‌తో గోల్ సాధించి స్కోరును 1-1గా సమం చేశాడు. అమిర్‌ అల్ అమ్రి ఇచ్చిన క్రాస్‌ను ముగ్గురు నార్వే డిఫెండర్ల మధ్య నుంచి తప్పిస్తూ గోల్‌గా మలిచాడు. ఈ ఆనందం ఎక్కువ సేపు నిలవలేదు. ఇరాక్ గోల్‌కీపర్ జలాల్ హసన్ చేసిన పొరపాటును హాలాండ్ చాకచక్యంగా ఉపయోగించుకున్నాడు. వెనక్కి వచ్చిన పాస్‌ను అడ్డుకునే ప్రయత్నంలో బంతి అతన్ని తాకి పోస్ట్‌లోకి వెళ్లడంతో గోల్‌గా మారింది. దీంతో హాలాండ్ రెండో గోల్ సాధించి జట్టును మళ్లీ ఆధిక్యంలోకి తీసుకెళ్లాడు. మొదటి అర్ధభాగంలో నార్వే ఆధిక్యం కొనసాగింది. కేవలం 11 టచ్‌లతోనే రెండు గోల్స్ సాధించిన హాలాండ్, హాఫ్‌టైమ్‌కు నార్వేను 2-1 ఆధిక్యంలో నిలిపాడు. మరోవైపు ఇరాక్ కూడా పోరాటం కొనసాగించింది. తొలి అర్ధభాగం అదనపు సమయంలో కొన్ని అవకాశాలు వచ్చినా గోల్స్‌ సాధించలేకపోయింది.

రెండో అర్ధభాగంలో వేగం కొంత తగ్గినా.. నార్వే మళ్లీ అటాకింగ్‌ను పెంచింది. 76వ నిమిషంలో లియో ఓస్టిగార్డ్ హెడ్డర్‌తో గోల్ సాధించి ఆధిక్యాన్ని 3-1కు పెంచాడు. ఆ తర్వాత అదనపు సమయంలో ఇరాక్ డిఫెండర్ హుస్సేన్ ఓన్‌గోల్ కారణంగా స్కోరు 4-1కి పెరిగింది. దీంతో నార్వే ఘన విజయం సాధించింది. మ్యాచ్ అనంతరం హాలాండ్ మాట్లాడుతూ.. ‘తొలి మ్యాచ్‌లో ఒత్తిడి ఉంటుంది. కానీ 4-1 విజయం మాకు చాలా సంతృప్తినిచ్చింది. ఇది మంచి ఆరంభం అయినప్పటికీ తర్వాతి మ్యాచ్‌లు ఇంకా కఠినంగా ఉంటాయి’ అని పేర్కొన్నాడు. ఇరాక్ కోచ్ గ్రాహమ్ ఆర్నాల్డ్ మాట్లాడుతూ తమ జట్టు తొలి అర్ధభాగంలో అద్భుతంగా ఆడిందని, కొన్ని తప్పిదాలు మ్యాచ్‌ ఫలితాన్ని మార్చేశాయని పేర్కొన్నారు. నార్వే తర్వాత మ్యాచ్‌లో సెనెగల్‌ను ఎదుర్కోనుండగా.. ఇరాక్ 2018 చాంపియన్ ఫ్రాన్స్‌తో తలపడనుంది.