England vs Panama | మెరిసిన బెల్లింగ్‌హామ్‌

• పనామాపై ఇంగ్లండ్‌ విజయం
• 2-0 తేడాతో విజయం
• నాకౌట్‌లోకి త్రీ లయన్స్‌ జట్టు
• ఒకే ఒక గోల్‌తో రికార్డు నెలకొల్పిన హ్యారీ కేన్‌
• ఓటములతో ఇంటిబాట పట్టిన పనామా

England vs Panama | కీలక సమయంలో జూడ్‌ బెల్లింగ్‌హామ్‌ మెరిసి ఇంగ్లండ్‌కు ఊరటనిచ్చాడు. ఫిఫా ప్రపంచకప్‌ గ్రూప్‌–ఎల్‌లో భాగంగా జరిగిన మ్యాచ్‌లో పనామాపై ఇంగ్లండ్ 2-0తో విజయం సాధించి గ్రూప్‌ అగ్రస్థానాన్ని దక్కించుకుంది. హ్యారీ కేన్ ఒక గోల్‌ సాధించి ప్రపంచకప్‌లలో ఇంగ్లండ్ తరఫున అత్యధిక గోల్స్ చేసిన ఆటగాడిగా సరికొత్త రికార్డు నెలకొల్పాడు. మ్యాచ్‌లో విజయం సాధించి ఇంగ్లండ్‌ ఆట అంతగా ఆకట్టుకోలేకపోయింది. మ్యాచ్‌ ఎక్కువ భాగం బంతిని తమ ఆధీనంలో ఉంచుకున్నా.. పనామా డిఫెన్స్‌ను ఛేదించడంలో ఇంగ్లిష్‌ జట్టు తీవ్రంగా ఇబ్బందిపడింది. ఒక గోల్‌ చేసేందుకు దాదాపు గంటకుపైగా ఎదురుచూడాల్సి వచ్చింది. చివరకు బెల్లింగ్‌హామ్‌ గోల్‌ వేసి జట్టును ఆధిక్యంలో నిలబెట్టాడు. ఆ తర్వాత కేన్‌ మరో గోల్‌ చేసి విజయాన్ని ఖాయం చేశాడు.

ఓటమి లేకుండా నాకౌట్‌కు..

గ్రూప్‌ దశను ఇంగ్లండ్ విజయవంతంగా ముగించింది. ఒక్క ఓటమి లేకుండా నాకౌట్‌కు దూసుకువెళ్లింది. రెండు విజయాలు, ఒక డ్రా సహాయంతో గ్రూప్‌లో ఏడు పాయింట్లతో అగ్రస్థానం దక్కించుకుంది. ఆరు పాయింట్లతో క్రొయేషియా రెండో స్థానంలో నిలిచింది. నాలుగు పాయింట్లతో ఘానా అత్యుత్తమ మూడో స్థాన జట్లలో ఒకటిగా తదుపరి దశకు అర్హత సాధించగా.. పనామా జట్టు ప్రపంచకప్‌లో మూడు పరాజయాలతో నిష్క్రమించింది.

ఐదుమార్పులతో..

ఘానాతో మ్యాచ్‌ను ఇంగ్లండ్‌ డ్రా చేసుకుంది. ఈ మ్యాచ్‌లో తప్పనిసరిగా విజయం సాధించాలన్న లక్ష్యంతో జట్టు కోచ్‌ థామస్‌ టుచెల్‌ జట్టులో అదు మార్పులు చేశారు. అయితే, తొలి అర్ధభాగంలో ఎటాకింగ్‌లో పెద్ద మార్పులేమీ కనిపించలేదు. ఎడమవైపు నుంచి మార్కస్ రాష్‌ఫోర్డ్ చురుగ్గా ఆడుతూ ప్రత్యర్థి గోల్‌కీపర్ ఓర్లాండో మోస్క్వెరాను పరీక్షించాడు. ఆ తర్వాత బెల్లింగ్‌హామ్‌ సైతం పనామా డిఫెన్స్‌పై ఒత్తిడి తెచ్చినా ఇంగ్లండ్‌ విఫలమైంది. మరోవైపు పనామా క్రమశిక్షణతో ఎదురుదాడిని డిఫెన్స్‌ అడ్డుకుంది. తొలి అర్ధభాగంలో జోసే రోడ్రిగెస్‌కు లభించిన అవకాశాన్ని ఇంగ్లండ్ గోల్‌కీపర్ జోర్డాన్ పిక్‌ఫోర్డ్ అద్భుతంగా అడ్డుకున్నాడు. రాష్‌ఫోర్డ్ దగ్గర నుంచి వచ్చిన హెడర్‌తో గోల్‌కు ప్రయత్నించగా.. గురి తప్పింది. ఎలియట్ ఆండర్సన్ దూరం నుంచి చేసిన ప్రయత్నాన్ని మోస్క్వెరా నిలువరించాడు. రాష్‌ఫోర్డ్ ఫ్రీకిక్ కూడా స్వల్ప తేడాతో బయటకు వెళ్లడంతో తొలి అర్ధభాగం గోల్స్ లేకుండానే ముగిసింది.

ఐదు నిమిషాల్లో మ్యాచ్‌ ముగింపు

రెండో అర్ధభాగంలో ఇంగ్లండ్ దూకుడు పెంచినా గోల్ మాత్రం దక్కలేదు. కేన్‌కు వచ్చిన రెండు మంచి అవకాశాలను కూడా మోస్క్వెరా అడ్డుకున్నాడు. అయితే, 62వ నిమిషంలో ఎట్టకేలకు ఇంగ్లండ్‌కు ఊరటనిచ్చే గోల్ వచ్చింది. బుకాయో సాకా కార్నర్‌ కిక్‌తో బంతి వెళ్లి సిక్స్‌ యార్డ్‌లోకి వెళ్లింది. బెల్లింగ్‌హామ్‌ ప్రత్యర్థి ఆటగాళ్లను బోల్తా కొట్టించి బంతిని పోస్ట్‌లోకి పంపి ఖాతా తెరిచాడు. 67వ నిమిషంలో అదే బెల్లింగ్‌హామ్ మరోసారి కీలక పాత్ర పోషించాడు. ఎడమవైపు నుంచి ఇచ్చిన కచ్చితమైన క్రాస్‌ను హ్యారీ కేన్ హెడ్డర్‌తో గోల్‌గా మలిచాడు. ఇది ప్రపంచకప్‌లలో కేన్‌కు 11వ గోల్‌. దీంతో గ్యారీ లినేకర్ రికార్డును అధిగమించి ప్రపంచకప్‌లో ఇంగ్లండ్ తరఫున అత్యధిక గోల్స్ చేసిన ఆటగాడిగా నిలిచాడు.

నెరవేరిన లక్ష్యం..

ఇంగ్లండ్‌ జట్టు ఆటతీరు పూర్తిగా సంతృప్తికరంగా లేకపోయినా.. కోచ్‌ టుచెల్ ఆశించిన ఫలితం మాత్రం దక్కింది. ఘానాతో డ్రా అనంతరం విమర్శలు ఎదుర్కొన్న ఆయన.. డెక్లాన్ రైస్‌కు విశ్రాంతినిచ్చి మోర్గన్ రోజర్స్, నికో ఓ'రైలీ, జారెల్ క్వాన్సాలకు అవకాశం ఇచ్చాడు. అయినప్పటికీ మ్యాచ్‌లో ఎటాకింగ్‌లో మార్పులు రాలేదు. చివరికి బెల్లింగ్‌హామ్ వ్యక్తిగత ప్రతిభే మ్యాచ్‌ను ఇంగ్లండ్ వైపు తిప్పింది. కేన్ రికార్డు గోల్‌తో విజయం ఖాయమైంది. మ్యాచ్ చివర్లో బెంచ్ నుంచి బరిలోకి దిగిన జోర్డాన్ హెండర్సన్ మరో అరుదైన ఘనతను అందుకున్నాడు. నాలుగు ఫిఫా ప్రపంచకప్‌ల్లో ఆడిన తొలి ఇంగ్లండ్ ఫుట్‌బాలర్‌గా చరిత్ర సృష్టించాడు.