Panama Vs Croatia | ప‌నామాపై క్రొయేషియా విక్ట‌రీ

• నాకౌట్ ఆశలు సజీవం
• 1-0 తేడాతో గెలుపు
• టోర్నీ నుంచి ప‌నామా అవుట్‌

Panama Vs Croatia | ఫిఫా వరల్డ్‌కప్‌లో క్రొయేషియా కీలక విజ‌యం సాధించింది. మంగళవారం జరిగిన గ్రూప్-ఎల్ మ్యాచ్‌లో పనామాను 1-0 తేడాతో ఓడించి నాకౌట్ దశ అవకాశాలను సజీవంగా ఉంచుకుంది. ఈ విజయంతో క్రొయేషియా మూడు పాయింట్లు ఖాతాలో వేసుకుంది. మ్యాచ్‌ తొలి అర్ధభాగం ఇరుజ‌ట్ల ఆట నెమ్మ‌దిగా సాగింది. పనామా డిఫెన్స్‌ను ఛేదించేందుకు క్రొయేషియా చేసిన ప్రయత్నాలు ఫలించకపోవడంతో తొలి 45 నిమిషాలు ఒక్క గోల్ లేకుండానే ముగిసింది. అయితే, రెండో అర్ధభాగం ప్రారంభమైన కొద్దిసేపటికే క్రొయేషియా ఆధిక్యం సాధించింది. 54వ నిమిషంలో జోసిప్ స్టానిషిచ్ అందించిన అద్భుత క్రాస్‌ను యాంటే బుడిమిర్ గోల్‌గా మలిచాడు. మైదానంలోకి ప్రత్యామ్నాయ ఆటగాడిగా వచ్చిన నాలుగు నిమిషాల్లోనే బుడిమిర్ గోల్ నమోదు చేసి జట్టుకు విజయాన్ని అందించాడు. గోల్ సాధించిన మూడు నిమిషాలకే క్రొయేషియా మరో అవకాశాన్ని ద‌క్కించుకుంది.

తన 200వ అంతర్జాతీయ మ్యాచ్ ఆడుతున్న 40 ఏళ్ల దిగ్గజ ఆటగాడు లూకా మోడ్రిచ్ అద్భుత పాస్ ఇవ్వగా.. మార్కో పసాలిక్ ఒంటరిగా గోల్‌పోస్ట్ వైపు దూసుకెళ్లాడు. అయితే, పనామా గోల్‌కీపర్ ఓర్లాండో మోస్కెరా అద్భుతంగా అడ్డుకుని జట్టును మరో గోల్ నుంచి కాపాడాడు. 67వ నిమిషంలో పనామాకు సమం చేసే అవ‌కాశం లభించింది. వరుసగా మూడు ప్రయత్నాలు చేసినా క్రొయేషియా గోల్‌కీపర్ డొమినిక్ లివాకోవిచ్ అసాధారణ సేవ్‌లతో జట్టును గ‌ట్టెక్కించాడు. ముఖ్యంగా మూడో ప్రయత్నంలో బంతి చివరి క్షణంలో తాకి నెట్‌పైగా మళ్లించిన తీరు మ్యాచ్‌కే హైలైట్‌గా నిలిచింది. ఈ పరాజయంతో పనామా టోర్నీ నుంచి అధికారికంగా నిష్క్రమించింది. వరల్డ్‌కప్‌లో రెండు సార్లు పాల్గొన్నప్పటికీ ఇప్పటివరకు ఒక్క పాయింట్ కూడా సాధించలేకపోయింది. గ్రూప్-ఎల్‌లో నాకౌట్ సమీకరణాలు ర‌స‌వ‌త్త‌రంగా మారాయి. ఇంగ్లండ్, ఘానా జట్లు చెరో నాలుగు పాయింట్లతో అగ్రస్థానంలో ఉండగా.. క్రొయేషియా మూడు పాయింట్లతో మూడో స్థానంలో కొనసాగుతోంది. శనివారం జరిగే చివరి గ్రూప్ మ్యాచ్‌లో ఘానాతో క్రొయేషియా తలపడనుండగా, ఇంగ్లండ్ పనామాతో ఆడనుంది. ఈ మ్యాచ్‌ల ఫలితాలే గ్రూప్ నుంచి నాకౌట్‌కు చేరే జట్లను నిర్ణయించనున్నాయి.