Planetary Parade | స్కైవాచ‌ర్ల‌కు గుడ్‌న్యూస్‌.. గ్ర‌హాల ప‌రేడ్‌ను చూసేయండి..!

Planetary Parade | స్కైవాచ‌ర్ల‌కు గుడ్‌న్యూస్‌. మన సౌర కుటుంబంలోని నాలుగు గ్రహాలైన బుధుడు, అంగారకుడు, శని, నెప్ట్యూన్ ఒకే దిశలో వరుసగా క‌నిపించ‌నున్నాయి. దీన్నే సాధార‌ణంగా “ప్లానెట్ పరేడ్”గా పిలుస్తుంటారు. ఈ ఖ‌గోళ దృగ్విష‌యం ఈ నెల 23 వ‌ర‌కు క‌నిపించ‌నుంది. భూమిపై నుంచి చూస్తే ఆయా గ్ర‌హాల‌న్నీ ఒకే వ‌రుస‌లో ఉన్న‌ట్లుగా ద‌ర్శ‌న‌మిస్తాయి. కానీ, నిజానికి అవి ఎంతో దూరంలో వాటి కక్ష్యల్లోనే తిరుగుతుంటాయి. సూర్యుని చుట్టూ గ్రహాలు తిరిగే క్ర‌మంలో ఒకే రేఖ‌లోకి వ‌చ్చిన‌ప్పుడు మాత్ర‌మే ఈ దృశ్యం క‌నిపిస్తుంది.

ఈ ఖగోళ సంఘటనను చూసేందుకు ఉదయం సూర్యోదయానికి కొద్దిసేపటి ముందు లేచి తూర్పు దిశలో చూడాలి. సుమారు ఉదయం 5 గంటల నుంచి 5.45 మధ్య సమయం అనుకూలంగా ఉంటుంది. ముఖ్యంగా ఏప్రిల్ 18 నుంచి 20 వరకు ఈ నాలుగు గ్రహాలు మరింత స్పష్టంగా వరుసలో కనిపించే అవకాశం ఉన్నాయి. అయితే ఆకాశం నిర్మలంగా, కాలుష్యంతో పాటు వెలుతురు త‌క్కువ‌గా ఉంటే చూసేందుకు అనువుగా ఉంటుంది. బుధుడు చాలా దిగువన, క్షితిజానికి దగ్గరగా క‌నిపిస్తాడు. ఉద‌యం స‌మ‌యంలో సూర్యకాంతి ఎక్కువగా ఉండటం వల్ల ఈ గ్ర‌హాన్ని గుర్తించడం కొద్దిగా కష్టమవుతుంది. బుధుడి పై భాగంలో శని పసుపు రంగులో మెరిసిపోతాడు.

కొంచెం పైకి చూస్తే అంగారకుడు ఎరుపు ఛాయతో సులభంగా గుర్తించవచ్చు. నెప్ట్యూన్ మాత్రం చాలా మసకగా ఉండడం వ‌ల్ల కంటికి క‌నిపించే అవ‌కాశం లేదు. ఇందు కోసం బైనాక్యులర్, చిన్న టెలిస్కోప్ అవసరమ‌వుతుంది. ఈ సంఘటనలో మరో ఆసక్తికర విషయం ఏమిటంటే.. కొన్ని రోజుల్లోనే గ్రహాల అమరిక మారుతూ ఉంటుంది. మొదట్లో అవి కొంచెం వేర్వేరు కోణాల్లో కనిపించినా.. ఏప్రిల్ 20 నాటికి ఒక కోణంలో కనిపిస్తాయి. ఇలా తక్కువ సమయంలోనే గ్రహాల స్థానం మార్పును ప‌రిశీలించొచ్చ‌ని శాస్త్ర‌వేత్త‌లు పేర్కొంటున్నారు.