Diwali Firecracker Safety Tips | టపాసులు కాల్చేటప్పుడు ఈ జాగ్రత్తలు మరవకండి.. కాలిన గాయాలకు టూత్‌పేస్ట్, ఐస్ పెడితే ఏమవుతుందో తెలుసా?

• ఓపెన్ ప్లేస్‌లోనే కాల్చండి
• కాటన్ దుస్తులే సురక్షితం
• తొలి 20 నిమిషాలు కీలకం
• పేలని టపాసులతో జాగ్రత్త

Diwali Firecracker Safety Tips | త్రినేత్ర న్యూస్ : దీపావళి అంటేనే వెలుగుల పండుగ. దివ్వెలు, కాకరపువ్వొత్తులు (Sparklers), టపాసులతో ఇంటిల్లిపాదీ ఆనందంగా జరుపుకునే వేడుక. అయితే టపాసులు కాల్చేటప్పుడు చేసే ఒక్క క్షణం అజాగ్రత్త వల్ల చేతులు, ముఖం, కళ్లు, కాళ్లకు తీవ్రమైన కాలిన గాయాలయ్యే ప్రమాదం ఉంది. కొన్ని గాయాలు పైకి చిన్నవిగానే కనిపించినా, చర్మం లోపలి పొరలను దెబ్బతీస్తాయని డాక్టర్లు హెచ్చరిస్తున్నారు.

పండుగ సమయంలో ఆస్పత్రులకు వచ్చే కేసుల్లో ఎక్కువగా టపాసులను చేతిలో ఎక్కువసేపు పట్టుకోవడం, పేలని వాటిని మళ్లీ వెలిగించే ప్రయత్నం చేయడం, లేదా పేలుతున్న వాటికి అతి దగ్గరగా నిలబడటం వల్లే జరుగుతుంటాయి. ముఖ్యంగా ప్రమాద తీవ్రత తెలియని చిన్నపిల్లలు ఈ గాయాల బారిన పడే ముప్పు ఎక్కువగా ఉంటుంది. అందుకే కొన్ని కీలక జాగ్రత్తలు పాటించడంతో పాటు, ఒకవేళ గాయమైతే వెంటనే ఏం చేయాలో తెలుసుకోవడం చాలా ముఖ్యం.

టపాసులు కాల్చడానికి సురక్షితమైన ప్రదేశాన్ని ఎంచుకోండి

టపాసులను ఎప్పుడూ వాహనాలు, భవనాలు, ఎండుటాకులు, కరెంట్ తీగలు, ఇతర మండే స్వభావం ఉన్న వస్తువులకు దూరంగా ఓపెన్ స్పేస్‌లోనే కాల్చాలి. బాల్కనీలు, ఇరుకైన గల్లీలు, మూసి ఉన్న ప్రదేశాల్లో అస్సలు కాల్చవద్దు.

చిన్నపిల్లలను సురక్షితమైన దూరంలో ఉంచాలి. వారు కాకరపువ్వొత్తులు కాల్చేటప్పుడు కూడా పెద్దలు పక్కనే ఉండి పర్యవేక్షించాలి. కాకరపువ్వొత్తులు విపరీతమైన వేడిని కలిగి ఉంటాయి కాబట్టి అవి చర్మానికి తగిలితే తీవ్రమైన బర్న్స్ (Burns) అవుతాయి.

త్వరగా మంటలు అంటుకోని దుస్తులు ధరించండి

నైలాన్, పాలిస్టర్ వంటి సింథటిక్ దుస్తులకు దూరంగా ఉండండి. వేడి తగిలితే ఇవి కరిగి నేరుగా చర్మానికి అతుక్కుపోతాయి. వదులుగా వేలాడే చేతులు లేకుండా, ఒంటికి సరిగ్గా సరిపోయే (Well-fitted) కాటన్ దుస్తులు ధరించడం ఉత్తమం. నిప్పురవ్వల నుంచి పాదాలను రక్షించుకోవడానికి క్లోజ్డ్ ఫుట్‌వేర్ (షూస్) వేసుకోవాలి.

పొడవాటి జుట్టు ఉన్నవారు టపాసులు కాల్చే ముందు జుట్టును వెనక్కి ముడి వేసుకోవాలి. స్కార్ఫ్‌లు, దుపట్టాలు, ఇతర వదులుగా ఉండే యాక్సెసరీస్ మంటలకు తగలకుండా జాగ్రత్త పడాలి.

టపాసులు కాల్చేటప్పుడు పాటించాల్సిన జాగ్రత్తలు

ఒకేసారి ఒక్క టపాసును మాత్రమే వెలిగించి, వెంటనే అక్కడి నుంచి దూరంగా జరగాలి.

టపాసులు వెలిగించడానికి పొడవాటి అగర్‌బత్తీ (Incense Stick) వాడాలి. చేతిలో పట్టుకుని ఎప్పుడూ వెలిగించవద్దు.

ఇతరుల వైపు టపాసులను గురిపెట్టి కాల్చకూడదు.

సగం కాలి ఆగిపోయిన లేదా పేలని టపాసులను మళ్లీ వెలిగించే ప్రయత్నం చేయకండి. కాసేపు ఆగి, వాటిపై నీళ్లు పోసి తడిపిన తర్వాతే పారేయాలి.

ముందుజాగ్రత్తగా దగ్గరలో ఒక బకెట్ నీళ్లు లేదా ఇసుకను సిద్ధంగా ఉంచుకోవాలి.

ఆల్కహాల్ తీసుకున్న తర్వాత టపాసులు కాల్చవద్దు. ఇది మీ జడ్జిమెంట్, రియాక్షన్ టైమ్‌పై ప్రభావం చూపుతుంది.

కాలిన వెంటనే మొదటి 20 నిమిషాల్లో ఏం చేయాలి? (First Aid)

కాలిన గాయమైన తర్వాత మొదటి 20 నిమిషాలు అత్యంత కీలకం. గాయమైన భాగాన్ని వెంటనే చల్లబరచడం వల్ల లోపలి కణజాలం దెబ్బతినకుండా అడ్డుకోవచ్చు. ఎవరికైనా గాయమైతే వెంటనే ఇలా చేయండి.

ముందుగా మంటలు లేదా వేడి ఉన్న ప్రదేశం నుంచి దూరంగా జరగాలి.

కాలిన భాగాన్ని 20 నిమిషాల పాటు చల్లని ధారగా పడే నీటి (Cool Running Water) కింద ఉంచాలి. అంతేకానీ ఐస్ లేదా గడ్డకట్టిన నీటిని వాడకూడదు.

ఆ భాగంలో వాపు రాకముందే ఉంగరాలు, వాచీలు, గాజులు వంటి బిగుతుగా ఉండే వస్తువులను తీసేయాలి.

గాయం చుట్టూ ఉన్న బట్టలు చర్మానికి అతుక్కోకపోతేనే తొలగించాలి. పుండుకు అతుక్కుపోయిన గుడ్డను బలవంతంగా లాగకూడదు.

నీటితో చల్లబరిచిన తర్వాత, శుభ్రమైన కాటన్ క్లాత్ లేదా స్టెరైల్ డ్రెస్సింగ్‌తో గాయాన్ని వదులుగా కవర్ చేయాలి.

గాయం లోతుగా ఉన్నా, ముఖం లేదా చేతుల వంటి సున్నితమైన భాగాల్లో కాలినా వెంటనే డాక్టర్‌ను సంప్రదించాలి.

ఈ ఇంటి చిట్కాలు (Home Remedies) అస్సలు పాటించకండి

కాలిన గాయంపై టూత్‌పేస్ట్, వెన్న, నెయ్యి లేదా నూనె రాయడం వల్ల చర్మం త్వరగా మానదు సరికదా, వేడి లోపలే ఉండిపోయి ఇన్ఫెక్షన్ పెరిగే ప్రమాదం ఉంది.

గాయంపై నేరుగా ఐస్ రుద్దకూడదు, దీనివల్ల చర్మం మరింత దెబ్బతింటుంది.

కాలిన తర్వాత వచ్చే నీటి బొబ్బలను (Blisters) చిదమకండి. వాటిపై ఉండే చర్మం ఇన్ఫెక్షన్ల నుంచి రక్షణ కల్పిస్తుంది. గాయాన్ని గట్టిగా రుద్దడం చేయకూడదు.

గాయం తీవ్రంగా ఉంటే ఇంటి చిట్కాలతో సమయం వృథా చేయకుండా వెంటనే ఆస్పత్రికి వెళ్లాలి.

ఎమర్జెన్సీ విభాగానికి ఎప్పుడు వెళ్లాలి?

కాలిన భాగం చిన్నదిగా కనిపించినా ఒక్కోసారి ప్రమాదకరం కావచ్చు. ఈ క్రింది లక్షణాలు కనిపిస్తే తక్షణమే మెడికల్ ఎమర్జెన్సీకి వెళ్లాలి.

గాయం లోతుగా ఉండి చర్మం తెల్లగా, గోధుమ రంగులో లేదా నల్లగా కమిలిపోయినట్లు కనిపిస్తే.

ముఖం, కళ్లు, చేతులు, పాదాలు, కీళ్లు లేదా ప్రైవేట్ భాగాల్లో కాలిన గాయాలైతే.

పెద్ద నీటి బొబ్బలు, తీవ్రమైన వాపు లేదా భరించలేని నొప్పి ఉంటే.

టపాసుల పొగ పీల్చడం వల్ల శ్వాస తీసుకోవడంలో ఇబ్బంది లేదా విపరీతమైన దగ్గు వస్తుంటే.

చిన్నపిల్లలకు బొబ్బలు రావడం లేదా చర్మం దెబ్బతినడం జరిగితే.

కంటి గాయాల విషయంలో అస్సలు ఆలస్యం చేయకూడదు. టపాసుల రవ్వలు కంట్లో పడితే కంటిని నలపడం లేదా సొంతంగా తీయడానికి ప్రయత్నించడం చేయకుండా వెంటనే కంటి వైద్యుడిని కలవాలి.

పేలని టపాసుల నుంచి పిల్లలను దూరంగా ఉంచండి

పేలని టపాసులు సురక్షితమే అనుకుని పిల్లలు వాటి దగ్గరకు వెళ్లే ప్రమాదం ఉంది. అవి ఆలస్యంగా పేలితే ఊహించని గాయాలవుతాయి. అందుకే అలాంటి వాటి దగ్గరకు పిల్లలను వెళ్లనివ్వకుండా, పెద్దలే వాటిని నీటిలో నానబెట్టి సురక్షితంగా పారేయాలి.

పండుగ వేళ ఇంట్లో ఫస్ట్-ఎయిడ్ కిట్, స్టెరైల్ డ్రెస్సింగ్స్, తగినంత నీరు అందుబాటులో ఉంచుకోవాలి. ఏదైనా ప్రమాదం జరిగితే నొప్పి తీవ్రమయ్యే వరకు ఆగకుండా వెంటనే ప్రాథమిక చికిత్స అందించి డాక్టర్‌ను సంప్రదించండి.