ఓటీటీలు, డిజిటల్ యాప్‌ల సబ్‌స్క్రిప్షన్లు వాడుతున్నారా?.. మన దృష్టికి రాకుండానే కరుగుతున్న జీతం!

              'రూ.149 ఏముందిలే' అని లైట్ తీసుకుంటున్నారా?.. మీ బ్యాంక్ ఖాతాను ఖాళీ చేస్తున్న డిజిటల్ లీకేజ్ ఇదే!

 

"నెలకు రూ.149 మాత్రమే కదా..." అని తేలిగ్గా తీసుకుంటూ వివిధ డిజిటల్ ప్లాట్‌ఫారమ్‌లలో మీరు చేసే చిన్న చిన్న చెల్లింపులు, కాలక్రమేణా పెద్దమొత్తంలో డిజిటల్ ఖర్చులుగా మారే అవకాశం ఉంది. ఒకప్పుడు నెలసరి ఖర్చుల్లో గ్రోసరీలు, కరెంట్ బిల్లులకే ప్రాధాన్యం ఉండేది. కానీ నేడు డిజిటల్ వినోదం, క్లౌడ్ స్టోరేజ్, ప్రొడక్టివిటీ మరియు AI టూల్స్ పేరిట ప్రతి నెలా మన దృష్టికి పెద్దగా రాకుండానే ఖర్చు కొనసాగుతోంది.

ఒక్కో ప్లాన్ రూ.99 నుండి రూ.299 లోపే ఉన్నట్లు కనిపించినప్పటికీ... OTTలు, మ్యూజిక్ యాప్‌లు, యూట్యూబ్ ప్రిమియం, క్లౌడ్ స్టోరేజ్, AI సబ్‌స్క్రిప్షన్లు వంటివన్నీ ఒకే కుటుంబంలో కలిస్తే పరిస్థితులు మారతాయి. ఒక కుటుంబం ఎంచుకునే ప్లాన్లు, ఉపయోగించే సేవల సంఖ్యను బట్టి ఈ ఖర్చు నెలకు రూ.1,500 నుంచి రూ.3,000 లేదా అంతకంటే ఎక్కువకు చేరవచ్చు. అంటే ఏడాదికి చూస్తే దాదాపు రూ.18,000 నుంచి రూ.36,000 వరకు కేవలం డిజిటల్ సేవలకే ఖర్చయ్యే అవకాశం ఉంది! 'చిన్న మొత్తమే కదా' అన్న భావనతో అసలు మనం నిజంగా సేవలను వాడుతున్నామా? లేక కేవలం యాక్సెస్ ఉండటం కోసమే చెల్లిస్తున్నామా? అనేది ఇక్కడ ఉత్పన్నమయ్యే ప్రధాన ప్రశ్న.

ఈ ఖర్చులు మనకు తెలియకుండా పెరగడానికి కారణాలు ఇవే

ఆటో రెన్యూవల్.. ఉపయోగించకపోయినా కొనసాగుతున్న ఖర్చు: ఉచిత ట్రయల్స్ లేదా తాత్కాలిక అవసరం కోసం తీసుకున్న సబ్‌స్క్రిప్షన్‌ను ఆ తర్వాత ఉపయోగించకపోయినా, ముందుగానే క్యాన్సిల్ చేయడం మర్చిపోవడం వల్ల ప్రతి నెలా బిల్లింగ్ చక్రంలో ఆ ఖర్చు కొనసాగుతూనే ఉంటుంది.

ఒకే సేవకు డూప్లికేషన్ చెల్లింపులు: ఒకే ఇంట్లో వేర్వేరు వ్యక్తులు ఒకే OTT లేదా మ్యూజిక్ యాప్‌కి విడివిడిగా ఖాతాలు నిర్వహించడం వల్ల అనవసరంగా రెట్టింపు ఖర్చవుతోంది.

డిజిటల్ సబ్‌స్క్రిప్షన్ల సమర్థ నిర్వహణకు సులువైన మార్గాలు ఇవే

సబ్‌స్క్రిప్షన్ ఆడిట్ చేయండి: మీ బ్యాంక్ లేదా క్రెడిట్ కార్డ్ స్టేట్‌మెంట్ ఒకసారి ఓపెన్ చేసి, మీరు నిజంగా క్రమం తప్పకుండా ఉపయోగిస్తున్న యాప్‌లు ఏవో, వాడనివి ఏవో గుర్తించి అనవసరమైన వాటిని నిలిపివేయండి.

ఆటో రెన్యూవల్ గడువును గమనించండి: ఉచిత ట్రయల్ లేదా తాత్కాలిక ప్లాన్ తీసుకునే ముందే దాని రిన్యూవల్ తేదీని క్యాలెండర్‌లో నోట్ చేసుకోండి. అవసరం లేదనుకుంటే బిల్లింగ్ తేదీకి ముందే క్యాన్సిలేషన్ అలవాటు చేసుకోండి.

ఫ్యామిలీ లేదా డ్యూయో ప్లాన్స్ ఎంచుకోండి: అందుబాటులో ఉన్న సేవల నిబంధనలకు అనుగుణంగా విడివిడిగా ప్లాన్లు తీసుకోవడానికి బదులు 'Family' లేదా 'Duo' ప్లాన్లను ఉపయోగించడం ద్వారా ఖర్చును తగ్గించుకోవచ్చు.

రొటేషన్ పద్ధతి పాటించండి: అన్ని OTT ప్లాట్‌ఫారమ్‌లకు ఒకేసారి నెలవారీ చెల్లింపులు చేయకుండా, ఒక నెల ఒక సర్వీస్ వాడి, ఆ తర్వాతి నెల దాన్ని నిలిపివేసి మరొకటి ఎంచుకోవడం మంచిది.

సబ్‌స్క్రిప్షన్ తీసుకోవడం సమస్య కాదు.. ఉపయోగించని సబ్‌స్క్రిప్షన్‌ను కొనసాగించడం అసలు సమస్య. చిన్నగా కనిపించే రూ.199, రూ.299 చెల్లింపులను ఏడాది మొత్తానికి లెక్కిస్తే, మీ పొదుపుపై వాటి ప్రభావం ఎంత ఉందో అప్పుడు తెలుస్తుంది. ఇప్పటికైనా ఈ చిన్న మొత్తాలపై దృష్టి పెడితే మీ వార్షిక పొదుపును మరింత పటిష్టం చేసుకోవచ్చు!