Shamshabad | శంషాబాద్ విమానాశ్ర‌యానికి బాంబు బెదిరింపు

Shamshabad | శంషాబాద్ (Shamshabad) విమానాశ్ర‌యానికి (Airport) మ‌రోసారి బాంబు బెదిరింపు (Bomb Threat) మెయిల్ (Mail) వ‌చ్చింది. విమానాశ్ర‌యంలో ల్యాండ్‌ కానున్న మూడు విమానాల్లో బాంబులు ఉన్న‌ట్లు సోమ‌వారం ఉద‌యం మెయిల్ రావ‌డంతో భ‌ద్ర‌తా అధికారులు ఒక్క‌సారిగా ఉలిక్కిప‌డ్డారు. కేర‌ళ‌ (Kerala) లోని క‌న్నూర్ నుంచి వ‌చ్చిన ఇండిగో (Indigo) ఎయిర్‌లైన్స్ విమానం, ఫ్రాంక్‌ఫ‌ర్ట్ నుంచి వ‌చ్చిన లుఫ్తాన్సా (Lufthansa) ఎయిర్ లైన్స్ విమానం, లండ‌న్ నుంచి వ‌చ్చిన బ్రిటిష్ ఎయిర్‌లైన్స్ (British Airlines) విమానాల్లో బాంబులు ఉన్న‌ట్లు బెదిరింపు రావ‌డంతో ఆ విమానాల‌ను ల్యాండింగ్ చేసి బాంబు స్క్వాడ్ (Bomb Squad), డాగ్ స్క్వాడ్ (Dog Squad) బృందాల‌తో త‌నిఖీలు చేప‌ట్టారు. ప్ర‌యాణీకుల‌ను కిందికి దింపి ఐసోలేష‌న్‌ కు త‌ర‌లించారు. విమానాల‌తో స‌హా ప్ర‌యాణీకులు, వారి ల‌గేజీ, కార్గోల‌ను క్షుణ్ణంగా త‌నిఖీ చేసిన అనంత‌రం ఈ బెదిరింపును ఉత్త‌దేన‌ని తేల్చారు. మ‌రోవైపు బాంబు ఉందంటూ మెయిల్ పంపిన గుర్తు తెలియ‌ని వ్య‌క్తి గురించి పోలీసులు ఆరా తీస్తున్నారు.
కొన‌సాగుతున్న ప్ర‌యాణికుల వెత‌లు
ఒక‌వైపు ఇండిగో విమానాల సంక్షోభం నేప‌థ్యంలో తీవ్ర ఇబ్బందులు ఎదుర్కొటున్న ప్ర‌యాణీకుల వెత‌లు కొన‌సాగుతున్నాయి. విమానాల‌ను పున‌రుద్ధ‌రించే ప్ర‌క్రియ ప్రారంభ‌మైన‌ప్ప‌టికీ, ఇంకా కొన్ని విమానాలను ర‌ద్దు చేశారు. మ‌రోవైపు ఒకేసారి మూడు విమానాల‌కు బాంబు బెదిరింపు రావ‌డంతో ప్ర‌యాణీకులు ఒక్క‌సారిగా తీవ్ర భయాందోళ‌న‌లకు లోన‌య్యారు. ఎటువంటి దుర్ఘ‌ట‌న చోటుచేసుకోక‌పోవ‌డంతో అందరూ ఊపిరి పీల్చుకున్నారు.