Police Constables Wedding | ఔను వాళ్లిద్ద‌రు ఇష్ట‌ప‌డ్డారు..! చ‌ర్చ‌నీయాంశ‌మైన ఇద్ద‌రు మహిళా కానిస్టేబుళ్ల పెళ్లి..!

Police Constables Wedding | ఇద్దరు మహిళా కానిస్టేబుళ్లు ఒకరినొకరు ఇష్టపడ్డారు. అక్కడితో ఆగకుండా.. వివాహ బంధంతో ఒక్కటవ్వాలని నిర్ణయించుకున్నారు. ఈ నెల 30న పెళ్లి చేసుకునేందుకు సిద్ధమయ్యారు. ఇందుకోసం ఉన్నతాధికారులకు సెలవు దరఖాస్తు చేసుకోవడం పింప్రి-చించ్‌వాడ్‌ పోలీసు కమిషనరేట్‌లో చర్చనీయాంశంగా మారింది. అయితే ఓ కానిస్టేబుల్ కుటుంబం ఈ నిర్ణయాన్ని వ్యతిరేకిస్తూ పోలీసు ఉన్నతాధికారులను ఆశ్రయించినట్లు సమాచారం. 2018లో ప్రత్యేక పింప్రి-చించ్‌వాడ్‌ పోలీసు కమిషనరేట్‌ ఏర్పాటైన తర్వాత వీరిద్దరూ పోలీసు శాఖలో చేరారు. గత మూడేళ్లుగా ఒకే చోట విధులు నిర్వహిస్తున్న వీరిద్దరూ కొంతకాలంగా సన్నిహితంగా ఉంటున్నట్లు తెలుస్తోంది. సెలవు దరఖాస్తులతో పాటు ముద్రించిన వివాహ ఆహ్వాన పత్రికను కూడా జతచేయడంతో ఈ విషయం వెలుగులోకి వచ్చింది.

ఒకే చోట పోస్టింగ్‌.. పెరిగిన సాన్నిహిత్యం

ఇద్దరు కానిస్టేబుళ్లు మహారాష్ట్రలోని వేర్వేరు ప్రాంతాలకు చెందినవారు. ఒకరు ఉత్తర మహారాష్ట్రలోని ఓ జిల్లాకు చెందినవారు కాగా.. మరొకరు పుణె జిల్లా సరిహద్దు సమీపంలోని గ్రామానికి చెందినవారు. పోలీసు శిక్షణ పూర్తయిన అనంతరం ఇతర మహిళా కానిస్టేబుళ్లతో కలిసి పోలీసు ప్రధాన కార్యాలయంలో విధులు ప్రారంభించారు. తొలుత మరో ఇద్దరు మహిళా కానిస్టేబుళ్లతో కలిసి నివాసం ఉన్నారు. అనంతరం వీరిద్దరూ ఒకే పోలీసు స్టేషన్‌కు బదిలీ అయ్యారు. మిగిలిన ఇద్దరు వేరే చోటుకు వెళ్లిన తర్వాత కూడా వీరిద్దరూ కలిసి ఉంటున్నట్లు సమాచారం. కాలక్రమంలో వీరి సాన్నిహిత్యం సన్నిహితుల దృష్టికి వచ్చింది.

పోలీసులను ఆశ్రయించిన కుటుంబం

ఇద్దరు మహిళా కానిస్టేబుళ్లు పెళ్లి చేసుకోవాలన్న నిర్ణయం కుటుంబ సభ్యులకు తెలియడంతో వీరిలో ఒకరి కుటుంబం వ్యతిరేకించినట్లు సమాచారం. గతంలో పోలీసు స్టేషన్‌కు వెళ్లి సిబ్బందిని కూడా ఈ విషయమై ప్రశ్నించినట్లు తెలుస్తోంది. దీంతో ఇది వ్యక్తిగత వ్యవహారమని, దీనిపై చర్చించవద్దని ఉన్నతాధికారులు సిబ్బందికి సూచించినట్లు సమాచారం. వివాహ తేదీ దగ్గరపడుతుండడంతో కుటుంబ సభ్యులు పింప్రి-చించ్‌వాడ్‌ పోలీసు కమిషనరేట్‌లోని ఓ ఉన్నతాధికారిని కలిసి జోక్యం చేసుకోవాలని కోరినట్లు తెలుస్తోంది. ఇద్దరూ పెద్ద‌వారే కావ‌డంతో పరస్పర అంగీకారంతో కొనసాగుతున్న సంబంధాన్ని అడ్డుకోలేమ‌ని పోలీసులు ఆ అధికారి స్పష్టం చేసినట్లు సమాచారం. అవసరమైతే కౌన్సెలింగ్ ఇవ్వ‌గ‌ల‌మ‌ని చెప్పిన‌ట్లు తెలుస్తోంది.

పెళ్లికి చట్టబద్ధ గుర్తింపు ఉంటుందా?

ఇద్దరూ ఆలందిలో సంప్రదాయం ప్ర‌కారం.. వివాహ వేడుక‌తో ఒక్క‌ట‌య్యేందుకు సిద్ధమవుతున్నట్లు సమాచారం. అయితే, ఈ వేడుకకు చట్టబద్ధమైన వివాహ హోదా లభిస్తుందా? అనేది ప్రశ్నగా మారింది. భారత్‌లో వయోజనుల మధ్య పరస్పర సమ్మతితో కూడిన స్వలింగ సంబంధాలు చట్టవిరుద్ధమేవీ కావు. ప్రస్తుత చట్టాల ప్రకారం స్వలింగ జంటలకు వివాహాల‌కు చట్టబద్ధ గుర్తింపు లేదు. 2023లో సుప్రీంకోర్టు స్వలింగ వివాహాలకు చట్టబద్ధ గుర్తింపు కల్పించేందుకు నిరాకరించింది. ఇందుకు సంబంధించిన చట్టాన్ని రూపొందించడం పార్లమెంట్‌ పరిధిలోని అంశమని స్పష్టం చేసింది. అదే సమయంలో తమ భాగస్వామిని ఎంచుకునే హక్కు, వ్యక్తిగత స్వేచ్ఛ వంటి హక్కులను కోర్టు సమర్థించింది.

లింగమార్పిడి చికిత్స‌

ఈ వ్యవహారంలో లింగమార్పిడి అంశం కూడా ప్రస్తావనకు వచ్చింది. ఇద్దరు కానిస్టేబుళ్లలో ఒకరు ప్రస్తుతం లింగమార్పిడి చికిత్స పొందుతున్నట్లు సమాచారం. ఇందుకోసం ముంబయిలోని ఓ ప్రముఖ ఆసుపత్రికి రెండు, మూడు సార్లు వెళ్లి వ‌చ్చిన‌ట్లు తెలిసింది. లింగమార్పిడి ప్రక్రియ పూర్తయిన తర్వాత వివాహాన్ని చట్టబద్ధంగా నమోదు చేసుకునే అవకాశం ఉందా? అనే అంశాన్ని కూడా ఇద్దరూ పరిశీలిస్తున్నట్లు సమాచారం. దీనికి వర్తించే చట్టం, వ్యక్తి అధికారిక లింగ గుర్తింపు తదితర అంశాలను బట్టి న్యాయపరమైన పరిస్థితి మారే అవకాశం ఉంది.

మరో పోలీసు ఉద్యోగి విషయంలోనూ..

పింప్రి-చించ్‌వాడ్‌ పోలీసు కమిషనరేట్‌లో లింగమార్పిడికి సంబంధించిన మరో వ్యవహారం కూడా వెలుగులోకి వచ్చింది. బదిలీల్లో భాగంగా బీడ్‌ నుంచి ఓ పోలీసు ఉద్యోగిని కమిషనరేట్‌కు బదిలీ చేశారు. అనంతరం ప్రభుత్వ అనుమతులతో లింగమార్పిడి శస్త్రచికిత్స చేయించుకున్నట్లు సమాచారం. చికిత్స పూర్తయిన తర్వాత సర్వీస్‌ రికార్డుల్లో జెండ‌ర్‌ను మార్చాల‌ని ప్ర‌భుత్వాన్ని కోరిన‌ట్లు తెలుస్తోంది. ప్ర‌స్తుతం అప్లికేష‌న్ ప‌రిశీల‌న‌లో ఉన్న‌ది. ఉద్యోగంలో చేరిన సమయంలో మహిళలకు వర్తించిన రాయితీలు, ఇతర ప్రయోజనాల అంశాలపైనా అధికారులు పరిశీలన జరుపుతున్నట్లు సమాచారం. ఇద్దరు మహిళా కానిస్టేబుళ్ల వివాహ వేడుక, మరో పోలీసు ఉద్యోగి జెండ‌ర్ మార్పు దరఖాస్తు.. రెండు వేర్వేరు వ్యవహారాలే అయినప్పటికీ పింప్రి-చించ్‌వాడ్‌ పోలీసు కమిషనరేట్‌లో వ్యక్తిగత సంబంధాలు, జెండ‌ర్ ఐడెంటిటీ, సర్వీస్‌ రికార్డుల మార్పు, స్వలింగ వివాహాల చట్టబద్ధత వంటి అంశాలపై చర్చకు దారితీశాయి.

Two women police constables in Maharashtra’s Pimpri-Chinchwad plan a Vedic wedding ceremony in Alandi on August 30. Their leave applications came with a wedding invitation, while one family has opposed the relationship. Same-sex marriage has no statutory recognition in India. pic.twitter.com/CRcsroFQwF

— Varad Bhatkhande | Journalist (@VaradBhatkhande) August 24, 2026