India Leprosy Cases 2026 | 2027 నాటికి కుష్టు రహిత భారత్ సాధ్యమేనా? చిన్నారుల్లో 3,800కు పైగా కొత్త కేసులు.. బయటపడుతున్న చేదు నిజాలు

• 2027 టార్గెట్ మాటేంటి?
• భారత్‌లో వేల సంఖ్యలో బయటపడుతున్న పిల్లల లెప్రసీ కేసులు
• భారత్‌కు కొత్త టెన్షన్

India Leprosy Cases 2026 | త్రినేత్ర న్యూస్ : దేశం నుంచి కుష్టు వ్యాధిని (Leprosy) సమూలంగా తరిమికొట్టేందుకు కేంద్ర ప్రభుత్వం నిర్దేశించుకున్న 2027 డెడ్‌లైన్‌పై తాజా గణాంకాలు తీవ్ర ఆందోళన రేకెత్తిస్తున్నాయి. 2025–26 ఆర్థిక సంవత్సరంలో దేశవ్యాప్తంగా ఏకంగా 3,832 మంది చిన్నారులు ఈ వ్యాధి బారిన పడినట్లు నేషనల్ లెప్రసీ ఎరాడికేషన్ ప్రోగ్రామ్ (NLEP) వార్షిక నివేదిక వెల్లడించింది. ప్రభుత్వం అనుకున్న వార్షిక లక్ష్యం (2,000 కేసులు) కంటే ఇది దాదాపు 91.6% అధికం. అంతకంటే కలవరపెట్టే అంశం ఏమిటంటే.. వ్యాధిని గుర్తించే సమయానికే 37 మంది చిన్నారుల్లో శాశ్వత లోపాలకు దారితీసే 'గ్రేడ్-2 డిజెబిలిటీ' (Grade-2 disability) బయటపడటం.

లక్ష్యం ఒకటి.. క్షేత్రస్థాయి వాస్తవం మరొకటి

'నేషనల్ స్ట్రాటజిక్ ప్లాన్ ఫర్ లెప్రసీ 2023-27' ప్రకారం.. వరుసగా ఐదేళ్ల పాటు స్థానిక పిల్లల్లో ఒక్క కొత్త కేసు కూడా నమోదు కాకపోతే ఆ జిల్లాను "వ్యాధి వ్యాప్తి ఆగిపోయిన ప్రాంతం"గా పరిగణిస్తారు. అంతేకాదు, కొత్తగా గుర్తించే చిన్నారుల్లో డిజెబిలిటీ రేటు సున్నాగా ఉండాలన్నది ప్రభుత్వ లక్ష్యం. కానీ, క్షేత్రస్థాయిలో ఇప్పటికీ పిల్లలు ఈ వ్యాధి బారిన పడుతుండటం, పైగా వైకల్యం వచ్చేవరకు నిర్ధారణ కాకపోవడం వ్యాధి గుర్తింపు ప్రక్రియలోని లోపాలను స్పష్టంగా ఎత్తిచూపుతోంది.

ప్రపంచ ఆరోగ్య సంస్థ (WHO) నిబంధనల ప్రకారం.. 15 ఏళ్లలోపు పిల్లల్లో వ్యాధి బయటపడిందంటే సమాజంలో ఇంకా ఇన్ఫెక్షన్ చురుగ్గా వ్యాపిస్తోందని (ongoing transmission) అర్థం. అలాగే, గ్రేడ్-2 అంగవైకల్యంతో కేసులు బయటపడటం అనేది సరైన సమయంలో డయాగ్నోసిస్ జరగడం లేదనడానికి స్పష్టమైన సంకేతం.

ప్రపంచంలోనే అత్యధిక కేసులు మన దగ్గరే

యూనియన్ హెల్త్ మినిస్ట్రీ వివరాల ప్రకారం.. 2025–26లో దేశవ్యాప్తంగా మొత్తం 91,783 కొత్త కుష్టు కేసులు వెలుగుచూశాయి. వీరిలో 1,945 మంది రోగులు తీవ్ర అంగవైకల్య సమస్యను ఎదుర్కొంటున్నారు. WHO తాజా గ్లోబల్ రిపోర్ట్ ప్రకారం ప్రపంచవ్యాప్తంగా అత్యధిక లెప్రసీ కేసులు నమోదైన దేశాల జాబితాలో భారత్ మొదటి స్థానంలో నిలిచింది. భారత్, బ్రెజిల్ (22,901), ఇండోనేషియా (16,292) దేశాల్లోనే ప్రపంచంలోని మొత్తం కేసులలో 78.3 శాతం కేంద్రీకృతమై ఉన్నాయి. చిన్నారుల్లో నమోదైన కేసుల సంఖ్యలోనూ భారత్‌దే అగ్రస్థానం కావడం గమనార్హం.

ఈ పరిస్థితిపై ఢిల్లీలోని ఆర్ఎంఎల్ హాస్పిటల్ డెర్మటాలజీ విభాగాధిపతి డాక్టర్ కబీర్ సర్దానా స్పందిస్తూ.. "కేసులను సకాలంలో గుర్తించడంలో జరుగుతున్న తీవ్ర జాప్యం వల్లే పిల్లల్లో ఈ వ్యాధి విస్తరిస్తోంది" అని విశ్లేషించారు.

ఈ రాష్ట్రాల్లోనే తీవ్ర ప్రభావం

కుష్టు వ్యాధి మైకోబాక్టీరియం లెప్రా అనే బ్యాక్టీరియా వల్ల వస్తుంది. చికిత్స తీసుకోని రోగితో ఎక్కువ కాలం గడపడం వల్ల ఇది ఇతరులకు సోకుతుంది. వ్యాధి సోకిన 5 ఏళ్ల వరకు కూడా లక్షణాలు బయటపడకపోవచ్చు. ప్రభుత్వం మల్టీ డ్రగ్ థెరపీ (MDT) యాంటీబయాటిక్స్ ద్వారా ఉచితంగా దీనికి చికిత్స అందిస్తున్నప్పటికీ, సమాజంలో నెలకొన్న అపోహలు, కళంకం (stigma) కారణంగా చాలామంది ఆస్పత్రులకు రావడానికి సంకోచిస్తున్నారు.

ప్రస్తుతం దేశంలోని కొన్ని నిర్దిష్ట జిల్లాల్లో వ్యాధి తీవ్రత అధికంగా ఉంది. ప్రతి 10,000 జనాభాకు ఒకరి కంటే ఎక్కువ కేసులు ఉన్న ప్రాంతాలను ప్రభుత్వం గుర్తించింది.

• ఛత్తీస్‌గఢ్‌లో 23 జిల్లాలు
• జార్ఖండ్‌లో 21 జిల్లాలు
• మహారాష్ట్ర, ఒడిశాలలో చెరో 18 జిల్లాలు
• మధ్యప్రదేశ్‌లో 10 జిల్లాలు

దశాబ్దం క్రితంతో పోలిస్తే (2014-15లో 11,365 పిల్లల కేసులు) కేసుల సంఖ్య తగ్గినప్పటికీ, ఇటీవల మళ్లీ పెరుగుదల కనిపించడం ఆందోళన కలిగిస్తోంది. వ్యాధి నయమయ్యే అవకాశం ఉన్నప్పటికీ, లక్షణాలు మొదలైన వెంటనే గుర్తించకపోవడం వల్లే చిన్నారులు అంగవైకల్యం బారిన పడుతున్నారు. 2027 నాటికి కుష్టు రహిత దేశంగా నిలవాలంటే.. అనుమానిత ప్రాంతాల్లో ముమ్మరంగా స్క్రీనింగ్ నిర్వహించి, ముందస్తుగానే వ్యాధిని అడ్డుకోవాల్సిన తక్షణ అవసరం ఎంతైనా ఉంది.