Supreme Court | స్కూళ్లలో ర్యాగింగ్‌పై పిల్‌.. విచారణకు సుప్రీంకోర్టు నిరాకరణ

Supreme Court | పాఠశాలలు, ప్రీ-యూనివర్సిటీ విద్యాసంస్థల్లో వేధింపులు, ర్యాగింగ్‌ను అరికట్టేందుకు కేంద్ర చట్టం కావాల‌ని, ఏకరీతి మార్గదర్శకాలు రూపొందించాలంటూ దాఖలైన ప్రజా ప్రయోజన వ్యాజ్యాన్ని సుప్రీంకోర్టు మంగళవారం విచారించేందుకు నిరాకరించింది. ఈ అంశాలకు సంబంధించి ఇప్పటికే సుప్రీంకోర్టు త‌న నిర్ణ‌యాన్ని వెల్ల‌డించింద‌ని సీజేఐ జస్టిస్‌ సూర్యకాంత్, జస్టిస్‌ జాయ్‌మాల్య బాగ్చి, జస్టిస్ వీ మోహనతో కూడిన ధర్మాసనం స్ప‌ష్టం చేసింది. ఈ పిల్‌లో కేంద్ర ప్రభుత్వం, అన్ని రాష్ట్రాలు, కేంద్ర పాలిత ప్రాంతాలతో పాటు సెంట్రల్ బోర్డ్ ఆఫ్ సెకండరీ ఎడ్యుకేషన్‌ (CBSE), కౌన్సిల్ ఫర్ ది ఇండియన్ స్కూల్ సర్టిఫికేట్ ఎగ్జామినేషన్స్‌ (CISCE)లను ప్రతివాదులుగా చేర్చారు.

పిటిష‌న్‌లో ఏముందంటే..?

పాఠ‌శాల‌లు, ప్రీ-యూనివర్సిటీ విద్యాసంస్థల్లో బుల్లీయింగ్, ర్యాగింగ్ సమస్యను ఎదుర్కొనేందుకు తగిన కేంద్ర చట్టాన్ని రూపొందించి అమలు చేసేలా కేంద్ర మంత్రిత్వ శాఖలను ఆదేశించాలని పిటిషనర్‌ కోరారు. ఇందుకు అనుగుణంగా అదనపు మార్గదర్శకాలను రూపొందించి, వాటిని అన్ని సంస్థలు తప్పనిసరిగా అమలు చేసేలా చూడాలని విజ్ఞప్తి చేశారు. వేధింపులు, ర్యాగింగ్ వల్ల కలిగే దుష్పరిణామాలపై విద్యార్థులకు అవగాహన కల్పించే అంశాన్ని పాఠ్యాంశంలో తప్పనిసరిగా చేర్చాలని పిల్‌లో కోరారు. కేంద్ర, రాష్ట్ర విద్యా బోర్డులు అనుసరించే పాఠ్య ప్రణాళికల్లోనూ ఈ అంశాన్ని భాగం చేయాలని పిటిషనర్‌ సుప్రీంకోర్టును కోరారు.