NEET Re-Exam 2026 | రూ.30 వేలు కడితే ‘నీట్’ పేపర్ మీదే! వీడియో కాల్‌తో సైబర్ కేటుగాళ్ల వల.. దర్యాప్తులో పోలీసులు

NEET Re-Exam 2026 | త్రినేత్ర.న్యూస్ : దేశవ్యాప్తంగా లక్షలాది మంది విద్యార్థులు ఎంతో ఉత్కంఠగా నీట్ (NEET) రీ-ఎగ్జామ్ రాస్తున్న వేళ.. రాజస్థాన్‌లోని అజ్మీర్‌లో 'పేపర్ లీక్' ఆరోపణలు మరోసారి కలకలం రేపాయి. కేవలం రూ. 30,000 చెల్లిస్తే నీట్ ప్రశ్నాపత్రం ఇస్తామంటూ కొందరు గుర్తుతెలియని వ్యక్తులు అభ్యర్థులకు నేరుగా వీడియో కాల్స్ చేస్తుండటం పోలీసుల దర్యాప్తునకు దారితీసింది.

అసలేం జరిగిందంటే?

డీఏవీ కాలేజీ (DAV College) విద్యార్థి సంఘం అధ్యక్షుడు కృష్ణసింగ్ ఠాకూర్ ఈ వ్యవహారంపై పోలీసులకు ఫిర్యాదు చేశారు. ఒక ఫస్టియర్ విద్యార్థిని ద్వారా ఈ స్కామ్ గురించి తెలుసుకున్న ఆయన.. నిజమేంటో తేల్చేందుకు స్వయంగా ఆ నంబర్‌కు కాల్ చేశారు.

"నీట్ పరీక్ష రేపు అనగా.. కొందరు విద్యార్థులను తప్పుదోవ పట్టిస్తున్నారు. నాకు కూడా వీడియో కాల్‌లో ఒక పేపర్ చూపించి, అది కావాలంటే రూ.30 వేలు ఇవ్వాలని డిమాండ్ చేశారు. డబ్బులు ట్రాన్స్‌ఫర్ చేసేందుకు ఒక క్యూఆర్ కోడ్ (QR Code) కూడా పంపారు. ఆ రికార్డింగ్‌ను పోలీసులకు సమర్పించాను" అని ఠాకూర్ తెలిపారు. విద్యార్థులు ఇలాంటి మోసగాళ్ల వలలో పడవద్దని, పరీక్ష ప్రిపరేషన్‌పై మాత్రమే దృష్టి పెట్టాలని ఆయన సూచించారు.

రంగంలోకి దిగిన పోలీసులు

అడిషనల్ ఎస్పీ హిమాన్షు జంగిడ్‌ను కలిసి డిజిటల్ ఆధారాలు (కాల్ రికార్డింగ్, క్యూఆర్ కోడ్, ఫోన్ నంబర్) అందజేయడంతో పోలీసులు దర్యాప్తు ముమ్మరం చేశారు. ఆ మొబైల్ నంబర్ లొకేషన్, క్యూఆర్ కోడ్‌కు లింక్ అయిన బ్యాంకు అకౌంట్ వివరాలను ట్రాక్ చేసే పనిలో పడ్డారు. ముఖ్యంగా, అసలు ఆ వీడియో కాల్‌లో చూపించిన పేపర్ నిజమైనదా? కాదా? అనేది ఆరా తీస్తున్నారు.

సైబర్ మోసగాళ్ల పట్ల అభ్యర్థులు అప్రమత్తంగా ఉండాలని అజ్మీర్ ఎస్పీ ఉషా యాదవ్ హెచ్చరించారు. "ఎగ్జామ్ టైమ్‌లో సైబర్ నేరగాళ్లు యాక్టివ్ అవుతారు. ఇది నిజంగా పేపర్ లీక్ రాకెట్ పనా? లేక విద్యార్థులను బురిడీ కొట్టించే కొత్త సైబర్ స్కామా? అన్న కోణంలో లోతైన విచారణ జరుపుతున్నాం" అని ఆమె స్పష్టం చేశారు.

గట్టి నిఘా నీడలో రీ-ఎగ్జామ్

మే 3న జరిగిన నీట్ ఎగ్జామ్.. పేపర్ లీక్ ఆరోపణల నేపథ్యంలో రద్దయిన విషయం తెలిసిందే. ఆ మచ్చను చెరిపేసుకునేందుకు నేషనల్ టెస్టింగ్ ఏజెన్సీ (NTA) ఈసారి కట్టుదిట్టమైన చర్యలు చేపట్టింది. దాదాపు 22 లక్షల మంది విద్యార్థులకు ఈరోజు రీ-ఎగ్జామ్ జరుగుతోంది.

భద్రతా కారణాల దృష్ట్యా, ఈసారి ఎగ్జామ్ పేపర్లను ఇండియన్ ఎయిర్ ఫోర్స్ (IAF) విమానాల్లో ప్రత్యేకంగా తరలించారు. దేశవ్యాప్తంగా 551 నగరాల్లో, 5,440 సెంటర్లలో పరీక్ష జరుగుతుండగా.. దాదాపు లక్షకు పైగా సీసీటీవీ కెమెరాలతో కమాండ్ కంట్రోల్ రూమ్ నుంచి ఎప్పటికప్పుడు పర్యవేక్షిస్తున్నారు. కేంద్ర విద్యాశాఖ ఉన్నతాధికారులు సైతం అడుగడుగునా నిఘా ఉంచారు.