CEC Gyanesh Kumar | సీఈసీ జ్ఞానేష్ కుమార్‌పై అవినీతి దర్యాప్తు: కేరళం ప్రభుత్వం సంచలన నిర్ణయం.. రూ.700 కోట్ల రోడ్డు ప్రాజెక్టులో ఏం జరిగింది?

CEC Gyanesh Kumar | త్రినేత్ర న్యూస్ : భారత ప్రధాన ఎన్నికల కమిషనర్ (CEC) జ్ఞానేష్ కుమార్‌పై దాదాపు రెండు దశాబ్దాల క్రితం నాటి అవినీతి ఆరోపణలపై మరోసారి లోతైన విచారణ జరిపేందుకు కేరళం ప్రభుత్వం రంగం సిద్ధం చేసింది. 2006లో ఆయన కేరళం ప్రజా పనుల శాఖ (PWD) కార్యదర్శిగా పనిచేసిన సమయంలో చేపట్టిన ఎంసీ రోడ్ (MC Road) ప్రాజెక్టు అక్రమాలపై ఇప్పటికే తాజా ప్రిలిమినరీ విచారణకు ఆదేశించినట్లు రాష్ట్ర పీడబ్ల్యూడీ మంత్రి పీకే బషీర్ అసెంబ్లీ వేదికగా స్పష్టం చేశారు.

అసెంబ్లీలో తేల్చిచెప్పిన మంత్రి

గురువారం అసెంబ్లీ ప్రశ్నోత్తరాల సమయంలో బీజేపీ ఎమ్మెల్యేలు బి.బి. గోపకుమార్, వి.మురళీధరన్, రాజీవ్ చంద్రశేఖర్ అడిగిన ప్రశ్నలకు మంత్రి బషీర్ సమాధానమిచ్చారు. విజిలెన్స్ అండ్ యాంటీ కరప్షన్ బ్యూరో (VACB) గతంలో చేపట్టిన దర్యాప్తులో అనేక లోపాలు బయటపడ్డాయని, కేసు పూర్తిస్థాయిలో కొలిక్కి రాకముందే ఫైళ్లను మూసివేశారని ఆయన తెలిపారు. అందుకే వాటన్నింటిపై పునఃసమీక్ష జరిపి, తాజా ప్రిలిమినరీ ఎంక్వైరీ నివేదిక అందిన వెంటనే కఠిన చర్యలు తీసుకుంటామని స్పష్టం చేశారు.

ప్రధాన ఆరోపణలు.. రూ.700 కోట్ల నష్టం?

కేరళం స్టేట్ ట్రాన్స్‌పోర్ట్ ప్రాజెక్ట్ (KSTP) కింద చేపట్టిన రోడ్డు విస్తరణ పనుల్లో ప్రభుత్వ ఖజానాకు దాదాపు రూ.700 కోట్ల వరకు గండి పడిందనేది ప్రధాన అభియోగం. రోడ్డు అభివృద్ధి పనుల అంచనా విలువ రూ.787 కోట్లు కాగా, కాంట్రాక్టులను ఏకంగా రూ.1,209 కోట్లకు కట్టబెట్టారు. రోడ్డు నిర్మాణ పనుల అంచనా వ్యయం రూ.244 కోట్లు కాగా, దాన్ని రూ.343 కోట్లకు పెంచారు. భూసేకరణ, పునరావాసం కోసం రూ.187 కోట్లు ఖర్చవుతుందని అంచనా వేయగా, వాస్తవానికి రూ.323 కోట్లు ఖర్చు చేశారు.

దీనికితోడు, కాంట్రాక్టర్లు సమర్పించిన బిల్లులను క్లియర్ చేసేందుకు అప్పట్లో కొందరు పీడబ్ల్యూడీ ఉన్నతాధికారులు రూ.2 కోట్ల లంచం డిమాండ్ చేశారని, బిల్లులను సరిగ్గా పరిశీలించకుండానే చెల్లింపులకు ఆమోదం తెలిపారని విజిలెన్స్ రికార్డులు చెబుతున్నాయి.

విదేశీ కన్సల్టెన్సీకి రూ.50 కోట్లు.. కాగ్ (CAG) అభ్యంతరాలు

2004 నాటి కాగ్ (కంట్రోలర్ అండ్ ఆడిటర్ జనరల్) నివేదిక కూడా ఈ ప్రాజెక్టులో నిబంధనల ఉల్లంఘనలను తీవ్రంగా తప్పుబట్టింది. టెండర్లను అడ్డగోలుగా పెంచేయడం వల్ల ప్రభుత్వానికి రూ.84 కోట్ల నష్టం వాటిల్లిందని పేర్కొంది. రాష్ట్రంలో నేషనల్ ట్రాన్స్‌పోర్టేషన్ ప్లానింగ్ అండ్ రీసెర్చ్ సెంటర్ (NATPAC) వంటి అత్యుత్తమ ప్రభుత్వ సంస్థలు ఉండగా, వాటిని కాదని ఒక విదేశీ కన్సల్టెన్సీ సంస్థను ఎంపిక చేసి దానికి ఏకంగా రూ. 50 కోట్ల రెమ్యూనరేషన్ ఎందుకు చెల్లించాల్సి వచ్చిందనే దానిపై కాగ్ సందేహాలు వ్యక్తం చేసింది.

ఇంజనీర్ ఆత్మహత్యపై కూడా విచారణ

ఈ ప్రాజెక్టును మలేషియాకు చెందిన సంస్థతో కలిసి 'భాగీరథ ఇంజనీరింగ్' (PATI-BEL జాయింట్ వెంచర్) దక్కించుకుంది. ఆ సమయంలో వరల్డ్ బ్యాంక్ నిధులతో అంగమాలి నుంచి తిరువనంతపురం వరకు చేపట్టిన ఎంసీ రోడ్ రీ-కన్‌స్ట్రక్షన్ పనుల నాణ్యత, ఒత్తిళ్లపై ప్రాజెక్ట్ ఇంజనీర్ లీ సీ బీన్ పలు ఫిర్యాదులు చేశారు. అనంతరం ఆయన మలేషియాకు తిరిగి వెళ్లి అక్కడ ఆత్మహత్య చేసుకుని ప్రాణాలు తీసుకున్నారు. ఈ అనుమానాస్పద మృతి వెనుక ఏమైనా ఆర్థిక దోపిడీ లేదా వేధింపుల కోణం దాగి ఉందా అనే దానిపై కూడా సమగ్ర దర్యాప్తు జరిపించే అంశాన్ని పరిశీలిస్తామని మంత్రి అసెంబ్లీలో ప్రకటించారు.