Indian Oil Packaged Drinking Water | ఇకపై పెట్రోల్ బంకుల్లో ఇండియన్ ఆయిల్ సొంత ‘వాటర్’ : అందుబాటులోకి ప్యాకేజ్డ్ తాగునీరు

Indian Oil Packaged Drinking Water | త్రినేత్ర న్యూస్ : వాహనాల్లో పెట్రోల్, డీజిల్ కొట్టించుకోవడమే కాదు.. ఇకపై అదే ఇండియన్ ఆయిల్ బ్రాండ్ పేరుతో స్వచ్ఛమైన తాగునీటిని కూడా కొనుగోలు చేయవచ్చు. దేశంలోనే అతిపెద్ద ప్రభుత్వ రంగ చమురు మార్కెటింగ్ సంస్థ ‘ఇండియన్ ఆయిల్ కార్పొరేషన్’ (IOCL) సరికొత్త వ్యాపార విస్తరణకు శ్రీకారం చుట్టింది. దేశవ్యాప్తంగా విస్తరించి ఉన్న తమ 43 వేలకు పైగా రిటైల్ అవుట్‌లెట్లలో సొంత బ్రాండ్‌తో ప్యాకేజ్డ్ డ్రింకింగ్ వాటర్‌ను ప్రవేశపెట్టాలని నిర్ణయించింది.

హైవే ప్రయాణికులే ప్రధాన టార్గెట్

ప్రస్తుతం ఇండియన్ ఆయిల్‌కు దేశవ్యాప్తంగా 43,603 రిటైల్ అవుట్‌లెట్లు ఉన్నాయి. ఇందులో సగానికి పైగా, అంటే సుమారు 21,435 బంకులు ప్రధాన జాతీయ, రాష్ట్ర రహదారులపైనే (Highways) ఉన్నాయి. హైవేలపై ప్రయాణించే వారికి సురక్షితమైన తాగునీటి అవసరం ఎక్కువగా ఉంటుంది కాబట్టి, తొలి ప్రాధాన్యంగా ఈ బంకుల్లోనే విక్రయాలు ప్రారంభించనున్నారు. ఆ తర్వాత దశలవారీగా పట్టణ, గ్రామీణ ప్రాంతాల్లోని బంకులకు విస్తరిస్తారు.

రూ.760 కోట్ల నాన్-ఫ్యూయల్ ఆదాయంపై గురి

ఇంధన విక్రయాలపైనే కాకుండా ఇతర సేవల (Non-Fuel Retail) ద్వారా ఆదాయాన్ని భారీగా పెంచుకోవాలని ఐఓసీ వ్యూహం రచిస్తోంది. ప్రస్తుతం వస్తున్న రూ.200 కోట్ల నాన్-ఫ్యూయల్ ఆదాయాన్ని ఏకంగా రూ.760 కోట్లకు పెంచాలనేది కంపెనీ టార్గెట్. రోజుకు సుమారు 3.2 కోట్ల మంది కస్టమర్లు ఇండియన్ ఆయిల్ బంకులను సందర్శిస్తుంటారు. ఈ భారీ కస్టమర్ బేస్‌ను సద్వినియోగం చేసుకునేందుకు ఇప్పటికే హిందుస్థాన్ యూనిలీవర్, డాబర్, ఐసీఐసీఐ బ్యాంక్, పీవీఆర్ వంటి ప్రముఖ బ్రాండ్లతో భాగస్వామ్యం కుదుర్చుకున్న ఐఓసీ, ఇప్పుడు నేరుగా తాగునీటి విభాగంలోకి అడుగుపెడుతోంది.

అగ్రిగేటర్ మోడల్.. నాణ్యత బాధ్యత వాళ్లదే

ఈ ప్రాజెక్ట్ కోసం మల్టీ-ఇయర్ అగ్రిగేటర్ ఆధారిత రెవెన్యూ షేరింగ్ విధానాన్ని ఐఓసీ ఎంచుకుంది. బ్రాండ్ యాజమాన్యం, ధరల నిర్ణయం, డీలర్ మార్జిన్లు పూర్తిగా ఇండియన్ ఆయిల్ వద్దే ఉంటాయి. అయితే బాటిళ్ల తయారీ, నాణ్యతా ప్రమాణాలు, సప్లై చైన్, లాజిస్టిక్స్ పర్యవేక్షణ వంటి బాధ్యతలను అర్హత కలిగిన సంస్థలకు అప్పగించనుంది. ఇందుకోసం ఆసక్తిగల కంపెనీల నుంచి ఎక్స్‌ప్రెషన్ ఆఫ్ ఇంట్రెస్ట్ (EoI)లను ఆహ్వానించింది.

మార్కెట్లోకి ఏ సైజుల్లో రానుంది?

ప్రారంభ దశలో 250 ఎంఎల్, 500 ఎంఎల్, 1 లీటర్ పెట్ (PET) బాటిళ్లలో నీటిని అందుబాటులోకి తెస్తారు. ఇందులో 1 లీటర్ బాటిల్ ప్రధాన లీడ్ ప్రొడక్ట్‌గా ఉండనుంది. రాబోయే రోజుల్లో మార్కెట్ స్పందనను బట్టి ప్రీమియం మినరల్ వాటర్, ఆల్కలైన్ వాటర్, న్యాచురల్ స్ప్రింగ్ వాటర్‌తో పాటు విభిన్న ప్యాక్ సైజులను కూడా మార్కెట్లోకి తెచ్చేందుకు ఐఓసీ ప్రణాళికలు రచిస్తోంది. ప్రస్తుతం దేశంలో రూ.32,000 కోట్లకు పైగా ఉన్న ప్యాకేజ్డ్ వాటర్ మార్కెట్‌లో గణనీయమైన వాటాను దక్కించుకోవడమే లక్ష్యంగా ప్రభుత్వ రంగ దిగ్గజం అడుగులు వేస్తోంది.