Indian Navy Submarines | జర్మనీతో రూ.70 వేల కోట్ల భారీ రక్షణ ఒప్పందం.. చైనాకు చెక్ పెట్టేలా భారత నేవీ మాస్టర్ ప్లాన్!

Indian Navy Submarines | త్రినేత్ర.న్యూస్ : ఎన్నో ఏళ్లుగా పెండింగ్‌లో ఉన్న 'ప్రాజెక్ట్ 75(I)' సబ్‌మెరైన్ (Submarine) ప్రోగ్రామ్ ఎట్టకేలకు పట్టాలెక్కనుంది. సుమారు రూ.70,000 కోట్ల అంచనా వ్యయంతో జర్మనీతో జరగాల్సిన ఈ భారీ రక్షణ ఒప్పందం తుది దశకు చేరుకుంది. అతి త్వరలో దీనికి క్యాబినెట్ కమిటీ ఆన్ సెక్యూరిటీ (CCS) ఆమోదం తెలపనున్నట్లు విశ్వసనీయ వర్గాల సమాచారం.

ఈ ప్రతిష్టాత్మక ప్రాజెక్టు కింద ఇండియన్ నేవీ (Indian Navy) కోసం ఆరు అత్యాధునిక సాంప్రదాయ జలాంతర్గాములను నిర్మిస్తారు. ముంబైకి చెందిన మజాగాన్ డాక్ షిప్‌బిల్డర్స్ లిమిటెడ్ (MDL), జర్మనీకి చెందిన థైసెన్‌కృప్ మెరైన్ సిస్టమ్స్ (TKMS) భాగస్వామ్యంతో వీటిని పూర్తి స్థాయిలో మన దేశంలోనే తయారు చేయనున్నారు. ఏళ్లుగా సాగుతున్న చర్చలు, కమర్షియల్ నిబంధనల అడ్డంకులను దాటుకుని ఈ డీల్ ఇప్పుడు ఓ కొలిక్కి వచ్చింది.

భారత్‌లోనే నెట్‌వర్క్ విస్తరణ

ఈ డీల్ అధికారికంగా ఖరారు కాకముందే, జర్మన్ దిగ్గజం TKMS భారత్‌లో తన నెట్‌వర్క్‌ను విస్తరిస్తోంది. అండర్ వాటర్ వార్‌ఫేర్ (underwater warfare) కు సంబంధించి దీర్ఘకాలిక వ్యూహంతో అడుగులు వేస్తోంది. అధునాతన టార్పెడోల అభివృద్ధి, 'మేక్ ఇన్ ఇండియా' (Make-in-India) ప్రాజెక్టుల కోసం హైదరాబాద్‌కు చెందిన వీఈఎం టెక్నాలజీస్ (VEM Technologies) తో ఇప్పటికే ఒప్పందం కుదుర్చుకుంది. అలాగే యాంటీ-సబ్‌మెరైన్ వ్యవస్థల కోసం ముంబైకి చెందిన సీఎఫ్ఎఫ్ (CFF) తో భాగస్వామ్యం కుదుర్చుకుంది. డీఆర్డీఓ (DRDO) తోనూ కలిసి పనిచేసేందుకు ఆసక్తి చూపుతోంది.

అత్యాధునిక టెక్నాలజీ.. మన సొంతం

భారత్‌కు ఈ ఒప్పందం కేవలం ఆరు సబ్‌మెరైన్లను కొనడం వరకే పరిమితం కాదు. భవిష్యత్తులో మనమే స్వయంగా డిజైన్ చేసి, నిర్మించగల సామర్థ్యాన్ని సొంతం చేసుకోవడం దీని ప్రధాన ఉద్దేశం. ఈ కొత్త జలాంతర్గాముల్లో ఎయిర్-ఇండిపెండెంట్ ప్రొపల్షన్ (AIP) సిస్టమ్ ఉంటుంది. దీనివల్ల ఇవి సాధారణ డీజిల్-ఎలక్ట్రిక్ సబ్‌మెరైన్ల కంటే చాలా ఎక్కువ కాలం నీటి అడుగున శత్రువుల కంటపడకుండా ఉండగలవు. అధునాతన సెన్సార్లు, క్షిపణులు, ఎలక్ట్రానిక్ వార్‌ఫేర్ సిస్టమ్స్ ఇందులో ఉంటాయి.

చైనాకు చెక్.. నేవీకి మరింత బలం

ప్రస్తుతం ఇండియన్ నేవీలో సబ్‌మెరైన్ల కొరత తీవ్రంగా ఉంది. మరోవైపు హిందూ మహాసముద్రంలో (Indian Ocean) చైనా జలాంతర్గాముల కదలికలు పెరుగుతున్నాయి. ఈ నేపథ్యంలో ఈ ఆరు కొత్త సబ్‌మెరైన్లు మన నావికాదళానికి ఎంతో బలాన్ని ఇవ్వనున్నాయి.

భారత్, జర్మనీల మధ్య రక్షణ బంధం ఈనాటిది కాదు. 1980ల నుంచే జర్మన్ డిజైన్ చేసిన శిశుమార్-క్లాస్ సబ్‌మెరైన్లను భారత్ ఉపయోగిస్తోంది. ఇప్పుడు MDL-TKMS భాగస్వామ్యం ఆ బంధాన్ని మరింత బలోపేతం చేయనుంది. త్వరలో క్యాబినెట్ ఆమోదం లభిస్తే.. టెక్నాలజీ బదిలీ (tech transfer), ప్రొడక్షన్ టైమ్‌లైన్‌లు ఖరారై పనులు వేగవంతం కానున్నాయి.