UN Map Resolution | ప్రపంచ మ్యాప్‌ల మార్పుపై UN రిజల్యూషన్‌కు ఇండియా ఓకే.. కానీ కశ్మీర్ విషయంలో స్ట్రాంగ్ వార్నింగ్!

UN Map Resolution | త్రినేత్ర.న్యూస్ : ఐక్యరాజ్యసమితి (UN) జనరల్ అసెంబ్లీలో ప్రపంచ భౌగోళిక మ్యాప్‌లకు సంబంధించిన ఓ కీలక తీర్మానానికి భారతదేశం మద్దతు తెలిపింది. అయితే, దీనికి మద్దతు ఇవ్వడం ద్వారా ఏదో ఒక ప్రత్యేక మ్యాప్‌నకు లేదా తప్పుడు సరిహద్దులకు తాము ఆమోదం తెలిపినట్లు కాదని విదేశీ వ్యవహారాల శాఖ (MEA) స్పష్టం చేసింది. ముఖ్యంగా జమ్మూకశ్మీర్, లద్దాఖ్ ప్రాంతాలను మ్యాప్‌లో తప్పుగా చూపిస్తే ఎట్టి పరిస్థితుల్లోనూ అంగీకరించబోమని ప్రపంచ దేశాలకు గట్టి వార్నింగ్ ఇచ్చింది.

సెప్టెంబర్ 4న యూఎన్ జనరల్ అసెంబ్లీలో ఆఫ్రికా దేశాల పరిమాణానికి ప్రాధాన్యతనిస్తూ ఒక కొత్త రిజల్యూషన్ ఆమోదం పొందింది. ఖండాల పరిమాణాన్ని కచ్చితంగా చూపించే 'ఈక్వల్-ఏరియా' (Equal-area) మ్యాప్ ప్రొజెక్షన్స్‌ను వాడాలని ఈ తీర్మానం ప్రోత్సహిస్తోంది. ఈ ఓటింగ్‌లో భారత్ కూడా అనుకూలంగా ఓటు వేసింది.

దీనిపై MEA అధికార ప్రతినిధి రణధీర్ జైస్వాల్ క్లారిటీ ఇచ్చారు. "ఈ తీర్మానం ఏ రాజకీయ సరిహద్దులనో లేదా వివాదాస్పద ప్రాంతాలనో డిసైడ్ చేయదు. భారతదేశ సార్వభౌమాధికారం, భౌగోళిక సరిహద్దుల విషయంలో మా స్టాండ్ చాలా క్లియర్. జమ్మూకశ్మీర్ (J&K), లద్దాఖ్ (Ladakh) లు పూర్తిగా మా భూభాగాలు. వాస్తవ భౌగోళిక రేఖలకు విరుద్ధంగా వాటిని మ్యాప్‌లో తప్పుగా (inaccurate) చూపిస్తే అస్సలు ఒప్పుకోం. ఈ విషయంలో ఎలాంటి రాజీ పడే ప్రసక్తే లేదు" అని ఆయన స్పష్టం చేశారు.

అసలు ఈ యూఎన్ రిజల్యూషన్ కథేంటి?

టోగో (Togo) దేశం నేతృత్వంలో ఆఫ్రికన్ యూనియన్ ఈ కొత్త మ్యాప్ తీర్మానాన్ని ప్రతిపాదించింది. మనం ఇప్పుడు వాడుతున్నవి 1569 నాటి మెర్కేటర్ (Mercator) మ్యాప్‌లు. ఇవి ప్రధానంగా నావిగేషన్ కోసం డిజైన్ చేశారు కాబట్టి, భూమధ్య రేఖకు దూరంగా ఉన్న దేశాలను చాలా పెద్దవిగా చూపిస్తాయి. దీనివల్ల వాస్తవానికి చాలా పెద్దదైన ఆఫ్రికా ఖండం.. మ్యాప్‌లో చూస్తే యూరప్, నార్త్ అమెరికాల కంటే చిన్నదిగా కనిపిస్తుంది.

ఈ లోపాన్ని సరిదిద్దేందుకు 2018లో 'ఈక్వల్ ఎర్త్' (Equal Earth) ప్రొజెక్షన్‌ను డెవలప్ చేశారు. ఇది దేశాల ఒరిజినల్ సైజును కచ్చితంగా చూపిస్తుంది. ఈ మ్యాప్‌లో ఆఫ్రికా చాలా పెద్దదిగా కనిపిస్తుంది. ఐక్యరాజ్యసమితి ఇప్పుడు ఈ కొత్త మ్యాప్‌లనే ఎడ్యుకేషన్, పబ్లిక్ కమ్యూనికేషన్ కోసం వాడాలని ఎంకరేజ్ చేస్తోంది.

అయితే, ఈ ఓటింగ్ జరిగినంత మాత్రాన రాత్రికి రాత్రే ప్రపంచ మ్యాప్‌లన్నీ మారిపోవు. ఇదొక సలహా లాంటిది మాత్రమే. దీనివల్ల పాత మ్యాప్‌లు బ్యాన్ అయినట్లు కాదు. ప్రభుత్వాలు, స్కూళ్లు, పబ్లిషర్స్, టెక్నాలజీ కంపెనీలు వాలంటరీగా ఈ కొత్త 'ఈక్వల్-ఏరియా' మ్యాప్‌లను అడాప్ట్ చేసుకుంటేనే ఇది ప్రాక్టికల్‌గా అమల్లోకి వస్తుంది.