CJP Delhi Protest | ఢిల్లీలో రెండో రోజూ హైడ్రామా.. సుప్రీంకోర్టు సీరియస్.. ముంబైకి పాకిన సెగ

• సీజేపీ నేతల విడుదల
• కన్నాట్ ప్లేస్‌లో ఘర్షణలతో రణరంగం

CJP Delhi Protest | త్రినేత్ర న్యూస్ : చీఫ్ ఎలక్షన్ కమిషనర్ జ్ఞానేశ్ కుమార్ రాజీనామా చేయాలంటూ కాక్రోచ్ జనతా పార్టీ, విద్యార్థి సంఘాలు చేపట్టిన ఆందోళనలతో దేశ రాజధాని ఢిల్లీలో ఆదివారం ఉదయం నుంచి సాయంత్రం వరకు తీవ్ర ఉద్రిక్తత, నాటకీయ పరిణామాలు చోటుచేసుకున్నాయి. జంతర్ మంతర్ పరిసరాలు, కన్నాట్ ప్లేస్ కేంద్రంగా పెద్ద ఎత్తున నిరసనకారులు తరలిరావడంతో పోలీసులు భారీగా మోహరించారు. నిరసనకారుల నిర్బంధంపై సుప్రీంకోర్టు జోక్యం చేసుకోవడం, ముఖ్య నేతలు విడుదల కావడం, కన్నాట్ ప్లేస్ వద్ద ఘర్షణలు జరగడంతో రాజధాని వీధులు అట్టుడికాయి.

సుప్రీంకోర్టు కీలక ఆదేశాలు: చట్టవిరుద్ధంగా నిర్బంధించలేరు

శనివారం నాటి భారీ అరెస్టులు, రాకపోకల ఆంక్షలపై సుప్రీంకోర్టు ఆదివారం విచారణ చేపట్టింది. శాంతియుతంగా, నిరాయుధులుగా నిరసన తెలుపుతున్న పౌరులను చట్టబద్ధమైన విధానం లేకుండా అదుపులోకి తీసుకోకూడదని సర్వోన్నత న్యాయస్థానం స్పష్టం చేసింది. ఢిల్లీ వ్యాప్తంగా ఏర్పాటు చేసిన బారికేడ్లను తక్షణమే సమీక్షించాలని ఆదేశించింది. మెట్రో, రైలు సర్వీసులు నిరంతరాయంగా నడవాలని, ఇంటర్నెట్ సేవలను పునరుద్ధరించి ప్రజల రాకపోకలకు ఆటంకం లేకుండా చూడాలని అధికారులను ఆదేశించింది. మరోవైపు, ఈ అంశంపై సోమవారం సీజేఐ జస్టిస్ సూర్యకాంత్‌ను 'ఇండియా' కూటమి నేతలు కలవనున్నట్లు ఏఐసీసీ అధ్యక్షుడు మల్లికార్జున ఖర్గే ప్రకటించారు.

24 గంటల తర్వాత సీజేపీ నేతల విడుదల.. తగ్గని దూకుడు

దాదాపు 24 గంటల పాటు పోలీసుల అదుపులో ఉన్న సీజేపీ వ్యవస్థాపకుడు అభిజీత్ దీప్కే, ముఖ్య ప్రతినిధులు సౌరవ్ దాస్, అశుతోష్ రంకాలను ఆదివారం మధ్యాహ్నం విడుదల చేశారు. అంతకుముందు తెల్లవారుజామునే యూట్యూబర్ ధ్రువ్ రాఠీని కూడా గురుగ్రామ్‌లో విడుదల చేశారు.

విడుదలైన వెంటనే అభిజీత్ దీప్కే స్పందిస్తూ.. "నిరసనలు చేయబోమని తాము ఎలాంటి బాండ్లపై సంతకాలు చేయలేదు. మా గొంతును ఆపలేరు, తిరిగి రోడ్లపైకి వస్తాం" అని స్పష్టం చేశారు. నిర్బంధంలో ఉన్న సమయంలో తన నానమ్మ మరణించారని తెలియడంతో పోలీసులు ప్రయాణ సదుపాయం కల్పిస్తామని చెప్పిన వీడియోను ఢిల్లీ పోలీస్ విడుదల చేసింది. అయితే, తమను అక్రమంగా కిడ్నాప్ చేసి, ఫోన్లు క్లోన్ చేశారని సౌరవ్ దాస్, అశుతోష్ రంకా మీడియా సమావేశంలో కేంద్ర ప్రభుత్వంపై తీవ్రస్థాయిలో మండిపడ్డారు.

కన్నాట్ ప్లేస్ వద్ద రణరంగం.. ఇరువర్గాల మధ్య ఘర్షణ

మధ్యాహ్నం తర్వాత నిరసనలు మరింత వేడెక్కాయి. జంతర్ మంతర్ వైపు వెళ్లకుండా పోలీసులు ఏర్పాటు చేసిన పటిష్టమైన బారికేడ్లను దాటుకుంటూ ఏఐఎస్ఏ అధ్యక్షురాలు నేహా బోరా నేతృత్వంలో విద్యార్థులు కన్నాట్ ప్లేస్‌కు చేరుకున్నారు. "డిటెన్షన్ బస్సులే కొత్త జైళ్లా?" అంటూ ఆమె వీడియోలను సోషల్ మీడియాలో పోస్ట్ చేశారు. పోలీసులు వారిని అదుపులోకి తీసుకున్నారు.

ఇదే సమయంలో కన్నాట్ ప్లేస్‌లోని పాలికా బజార్ గేట్ నంబర్ 4 వద్ద తీవ్ర ఉద్రిక్తత నెలకొంది. నిరసనకారులు ర్యాలీగా వెళ్తుండగా, కర్రలతో వచ్చిన రైట్‌వింగ్ సంస్థల ప్రతినిధులు వారిని అడ్డుకోవడంతో ఇరువర్గాల మధ్య ఘర్షణ తలెత్తింది. దాదాపు పది నిమిషాల పాటు తోపులాట, ఉద్రిక్త వాతావరణం నెలకొనడంతో పోలీసులు రంగంలోకి దిగి పరిస్థితిని అదుపులోకి తెచ్చారు. ఆర్కే ఆశ్రమ్ మార్గ్ వద్ద కూడా పలువురు ఆందోళనకారులను పోలీసులు అదుపులోకి తీసుకున్నారు.

ముంబైకి పాకిన సెగ.. పోలీసుల ప్రెస్ మీట్

ఈ నిరసనల సెగ ముంబైకీ తాకింది. మహారాష్ట్ర సీజేపీ విభాగం ఆదివారం సాయంత్రం 4 గంటలకు దాదర్‌లోని శివాజీ పార్క్ వద్ద నిరసనకు పిలుపునిచ్చింది. దీంతో ముంబై పోలీసులు భారీ బందోబస్తు ఏర్పాటు చేసి, పార్క్ వైపు వస్తున్న కార్యకర్తలను ఎక్కడికక్కడ అదుపులోకి తీసుకున్నారు.

సాయంత్రం ఢిల్లీ పోలీస్ పీఆర్వో నేహా యాదవ్ మీడియాతో మాట్లాడుతూ.. గతంలో ఇచ్చిన షరతులను సీజేపీ ఉల్లంఘించిందని, నిబంధనల ప్రకారం 10 రోజుల ముందస్తు నోటీసు ఇవ్వకుండా నిరసనకు పిలుపునిచ్చినందుకే అనుమతి నిరాకరించామని వివరణ ఇచ్చారు. సుప్రీంకోర్టు ఆదేశాలు, ప్రతిపక్షాల మార్చ్ నేపథ్యంలో సోమవారం కూడా రాజధానిలో హై అలర్ట్ కొనసాగే అవకాశం ఉంది.