Djibouti Boat Capsizes Migrants | గల్ఫ్ కలల బాటలో ఘోర విషాదం: మునిగిన శరణార్థుల బోటు.. 15 మంది చిన్నారులతో సహా 100 మందికి పైగా మృతి

బతుకుదెరువు కోసం యెమెన్ వెళ్తున్న వలసదారుల బోటు జిబౌటి తీరంలో మునిగిపోయింది. 15 మంది పిల్లలతో సహా 100 మందికి పైగా మరణించగా, పదుల సంఖ్యలో గల్లంతయ్యారు.

Jagadeesh

International | Published On Oct 11, 2026, 8.23 pm IST

Djibouti Boat Capsizes Migrants | గల్ఫ్ కలల బాటలో ఘోర విషాదం: మునిగిన శరణార్థుల బోటు.. 15 మంది చిన్నారులతో సహా 100 మందికి పైగా మృతి

సంక్షిప్త సారాంశం

జిబౌటి తీరంలో 305 మందికి పైగా వలసదారులతో వెళ్తున్న ఓవర్‌లోడెడ్ బోటు అదుపుతప్పి మునిగిపోయింది. సముద్రం నుంచి 15 మంది చిన్నారులు, 42 మంది మహిళలతో సహా 109 మృతదేహాలు వెలికితీశారు. మరో 80 మందికి పైగా గల్లంతు కాగా, బాధితుల్లో ఎక్కువమంది ఉపాధి కోసం యెమెన్ మీదుగా గల్ఫ్ దేశాలకు బయలుదేరిన ఇథియోపియా పౌరులుగా గుర్తించారు. 80 మంది సురక్షితంగా బయటపడగా, మిగిలిన వారి కోసం జిబౌటి అధికారులు సహాయక చర్యలు ముమ్మరం చేశారు.

Djibouti Boat Capsizes Migrants | త్రినేత్ర న్యూస్ : పేదరికం నుంచి విముక్తి పొంది గల్ఫ్ దేశాల్లో ఏదో ఒక ఉపాధి దొరక్కపోదా అన్న ఆశతో బయలుదేరిన వలసదారుల ప్రయాణం అర్ధాంతరంగా సముద్ర గర్భంలో ముగిసిపోయింది. ఆఫ్రికా దేశమైన జిబౌటి (Djibouti) తీరంలో సుమారు 305 మంది ప్రయాణికులతో వెళ్తున్న ఓవర్‌లోడెడ్ బోటు అదుపుతప్పి మునిగిపోవడంతో కనీసం 109 మంది మృతి చెందారు. వీరిలో 15 మంది అభం శుభం తెలియని చిన్నారులు ఉండటం తీవ్ర విషాదాన్ని నింపింది. ఈ ప్రమాదంలో మరో 80 మందికి పైగా గల్లంతయ్యారని ఐక్యరాజ్యసమితికి చెందిన ఇంటర్నేషనల్ ఆర్గనైజేషన్ ఫర్ మైగ్రేషన్ (IOM) వెల్లడించింది. అక్టోబర్ 8-9 మధ్య రాత్రి వేళ ఒబోక్ (Obock) తీరానికి ఉత్తర దిశగా ఈ ఘోర ప్రమాదం చోటుచేసుకుంది.

బయలుదేరిన వెంటనే మునిగిపోయిన బోటు

జిబౌటి నుంచి బాబ్ అల్-మందెబ్ జలసంధి మీదుగా యెమెన్‌కు చేరుకోవడానికి ఈ బోటు ప్రయాణమైంది. అయితే, పరిమితికి మించి ప్రయాణికులను ఎక్కించడంతో బోటు కదిలిన కాసేపటికే వెనుక భాగం నుంచి నీళ్లు చేరి బోల్తా పడిందని ప్రాణాలతో బయటపడిన వారు కన్నీటిపర్యంతమయ్యారు. సహాయక సిబ్బంది ఇప్పటివరకు సముద్రం నుంచి 109 మృతదేహాలను వెలికితీశారు. వీరిలో 52 మంది పురుషులు, 42 మంది మహిళలు, తొమ్మిది మంది బాలికలు, ఆరుగురు బాలురు ఉన్నారు. ప్రమాదం నుంచి 80 మంది సురక్షితంగా బయటపడగా, వారిలో అత్యవసర చికిత్స అవసరమైన వారికి ఒబోక్‌లోని మైగ్రెంట్ సెంటర్‌లో వైద్యం అందిస్తున్నారు.

Tragedy at Sea Migrant Boat Sinks Off Djibouti Over 100 Dead Including Children

ప్రమాదకరమైన యెమెన్ రూట్.. ఆగని వలసల ప్రవాహం

స్వదేశంలో తీవ్ర దారిద్య్రం, అంతర్యుద్ధం, వాతావరణ మార్పుల వల్ల బతకలేక ఇథియోపియా, సోమాలియాకు చెందిన వేలాది మంది ప్రజలు ఈ ప్రమాదకరమైన సముద్ర మార్గాన్ని ఎంచుకుంటున్నారు. యెమెన్‌లో ఘర్షణలు జరుగుతున్నప్పటికీ, ప్రాణాలకు తెగించి అక్కడి మీదుగా సౌదీ అరేబియా సహా ఇతర గల్ఫ్ దేశాలకు చేరుకోవాలనేది వీరి లక్ష్యం. కేవలం ఈ ఏడాది జనవరి నుంచి అక్టోబర్ మధ్యే ఇథియోపియా నుంచి దాదాపు 1.78 లక్షల మంది వలసదారులు జిబౌటికి చేరుకున్నారంటే పరిస్థితి ఎంత తీవ్రంగా ఉందో అర్థం చేసుకోవచ్చు.

పునరావృతమవుతున్న దుర్ఘటనలు

ఈ బోటులో ప్రయాణించిన వారిలో దాదాపు 150 మందిని గతంలోనే యెమెన్ అధికారులు తిప్పి పంపించినప్పటికీ, బతుకుదెరువు కోసం వారు మళ్లీ ఇదే మార్గంలో ప్రయాణించి ప్రాణాలు కోల్పోయారని ఐఓఎం అధికారులు తెలిపారు. గతేడాది కూడా ఈ రూట్‌లో దాదాపు 900 మందికి పైగా వలసదారులు సముద్రంలో మునిగి మరణించారు. ప్రస్తుతం గల్లంతైన వారి కోసం జిబౌటి కోస్ట్‌గార్డ్ బృందాలు గాలింపు చర్యలు ముమ్మరం చేశాయి. అంతర్జాతీయ సమాజం వెంటనే స్పందించి మానవతా సాయం అందించాలని ఐక్యరాజ్యసమితి విజ్ఞప్తి చేసింది.

ఇదీ చదవండి | రియాద్ ఎయిర్‌పోర్టుపై క్షిప‌ణి దాడి.. పైల‌ట్‌ స‌హా 12 మంది మృతి

Find us on