Instagram CSAM Ads | ఇన్‌స్టాగ్రామ్‌పై కేంద్రం కొరడా.. ఆ అసభ్యకరమైన యాడ్స్ ఏంటి? మెటాకు 7 రోజుల డెడ్‌లైన్!

• ఇన్‌స్టాగ్రామ్‌లోని పెయిడ్ యాడ్స్‌లో చిన్నారుల లైంగిక వేధింపుల కంటెంట్ (CSEAM) రావడంపై కేంద్ర ఐటీ శాఖ మెటాకు నోటీసులు జారీ
• ఈ అసభ్యకర కంటెంట్‌ను తక్షణమే తొలగించాలని, ఏడు రోజుల్లోగా పూర్తిస్థాయి వివరణ ఇవ్వాలని ఆదేశాలు
• యాడ్స్ ద్వారా ఆదాయం పొందుతున్నందున, 'థర్డ్ పార్టీ కంటెంట్' అనే సాకుతో మెటా తప్పించుకోలేదని తేల్చిచెప్పిన ప్రభుత్వం
• ఆరోపణలపై స్పందించిన మెటా, ఇలాంటి కంటెంట్ విషయంలో తమకు 'జీరో టాలరెన్స్' ఉందని, AI సాయంతో అడ్డుకుంటున్నామని స్పష్టం

Instagram CSAM Ads | త్రినేత్ర.న్యూస్ : ప్రముఖ సోషల్ మీడియా ప్లాట్‌ఫామ్ ఇన్‌స్టాగ్రామ్ (Instagram) కు కేంద్ర ప్రభుత్వం గట్టి షాక్ ఇచ్చింది. చిన్నారులపై లైంగిక వేధింపులను ప్రోత్సహించే కంటెంట్ (CSEAM).. నేరుగా పెయిడ్ యాడ్స్ (Paid Ads) రూపంలో వస్తుండటంపై తీవ్ర ఆగ్రహం వ్యక్తం చేసింది. ఈ వ్యవహారంపై కేంద్ర ఐటీ శాఖ (MeitY).. ఇన్‌స్టా మాతృసంస్థ మెటా (Meta) కు నోటీసులు జారీ చేసింది. ఈ వివాదంపై వారం రోజుల్లోగా (7 days) సమగ్ర వివరణ ఇవ్వాలని, వెంటనే ఆ కంటెంట్‌ను డిజేబుల్ చేయాలని ఆదేశించింది.

అసలేం జరిగింది?

ఇటీవల బీబీసీ (BBC) చేసిన ఓ ఇన్వెస్టిగేషన్ రిపోర్ట్‌లో మెటా రికమండేషన్ అల్గారిథమ్ లోపాలు వెలుగులోకి వచ్చాయి. నగ్నత్వం, అసభ్యకర కంటెంట్‌ను నిషేధించామని మెటా చెబుతున్నప్పటికీ... ఫేస్‌బుక్, ఇన్‌స్టాగ్రామ్‌లో పెయిడ్ యాడ్స్ రూపంలో ఇలాంటి వీడియోలు దర్శనమిచ్చాయి. 'రేప్ వీడియో', 'చైల్డ్ వీడియో' లాంటి పదాలతో వస్తున్న ఈ యాడ్స్‌ను క్లిక్ చేస్తే టెలిగ్రామ్ (Telegram) ఛానెల్స్‌కు రీడైరెక్ట్ అవుతున్నాయని, అక్కడ ఈ వీడియోలను అమ్ముతున్నట్లు రిపోర్ట్ తేల్చింది. ఈ వ్యవహారంపై స్పందించిన కేంద్ర ఐటీ మంత్రి అశ్విని వైష్ణవ్.. మెటా అధికారులను పిలిపించి వివరణ కోరాలని ఆదేశించారు.

ప్రభుత్వ హెచ్చరికలు

అసలు ఇలాంటి యాడ్స్ కి అప్రూవల్ ఎలా ఇచ్చారు? ఈ వ్యవహారం బయటపడ్డాక ఎలాంటి చర్యలు తీసుకున్నారు? భవిష్యత్తులో ఇలా జరగకుండా ఎలాంటి జాగ్రత్తలు తీసుకోబోతున్నారనే దానిపై కేంద్రం మెటాను ప్రశ్నించింది. పెయిడ్ యాడ్స్ ద్వారా ప్లాట్‌ఫామ్ ఆదాయం పొందుతున్నందున, ఇది కేవలం యూజర్లు పోస్ట్ చేసిన 'థర్డ్-పార్టీ కంటెంట్' అని చెప్పి మెటా బాధ్యత నుంచి తప్పించుకోలేదని ప్రభుత్వ వర్గాలు స్పష్టం చేశాయి. సరైన వివరణ ఇవ్వకపోతే ఇన్ఫర్మేషన్ టెక్నాలజీ చట్టం (IT Act), పోక్సో చట్టం (POCSO Act, 2012) కింద చట్టపరమైన చర్యలు తీసుకుంటామని గట్టిగా హెచ్చరించింది.

స్పందించిన మెటా.. ఏమన్నదంటే?

కేంద్రం నోటీసులపై మెటా ప్రతినిధి ఓ జాతీయ మీడియాతో మాట్లాడారు. ఈ తరహా కంటెంట్ విషయంలో తమకు 'జీరో టాలరెన్స్' (Zero Tolerance) ఉందని స్పష్టం చేశారు. అడ్వాన్స్‌డ్ ఆర్టిఫిషియల్ ఇంటెలిజెన్స్ (AI) టెక్నాలజీ సాయంతో ఇలాంటి కంటెంట్‌ను, దాని వెనుక ఉన్న నేరస్తులను గుర్తించి బ్లాక్ చేస్తున్నామని వివరించారు. తమ 3.5 బిలియన్ల యూజర్ల మధ్య దాగి ఉన్న సైబర్ నేరగాళ్లతో తాము నిరంతరం పోరాటం చేస్తున్నామన్నారు. ఈ దాడులను అడ్డుకోవడానికి ఇతర సంస్థలతోనూ ఇంటెలిజెన్స్ పంచుకుంటున్నట్లు మెటా తెలిపింది.

వాట్సప్ కొత్త ఫీచర్‌కు కూడా బ్రేక్

మరోవైపు, మెటా సంస్థకే చెందిన వాట్సాప్ (WhatsApp) తీసుకురావాలనుకున్న కొత్త 'యూజర్‌నేమ్' (username) ఫీచర్‌పై కూడా ప్రభుత్వం నోటీసులు ఇచ్చింది. ఈ ఫీచర్ వల్ల ఆన్‌లైన్ మోసాలు, డిజిటల్ అరెస్ట్ స్కామ్‌లు, ఫిషింగ్ అటాక్స్ పెరిగే ప్రమాదం ఉందని భావించిన కేంద్రం.. దాన్ని తాత్కాలికంగా నిలిపివేయాలని సూచించింది. ప్రభుత్వ ఆందోళనల నేపథ్యంలో వాట్సప్ ఈ ఫీచర్ రోల్ అవుట్‌ను వాయిదా వేసుకున్నట్లు సమాచారం.