Abhijeet Dipke Fake Resignation Letter | మధ్యప్రదేశ్ సీఎం రాజీనామా? గిరిజన పిల్లల మరణాలపై వైరల్ అవుతున్న ‘లేఖ’ వెనుక అసలు నిజం!

Abhijeet Dipke Fake Resignation Letter | త్రినేత్ర.న్యూస్ : మధ్యప్రదేశ్ ముఖ్యమంత్రి తన పదవికి రాజీనామా చేసినట్లుగా రూపొందించిన ఒక లేఖ సోషల్ మీడియాలో తీవ్ర దుమారం రేపుతోంది. రాష్ట్ర ప్రభుత్వ అధికారిక లెటర్‌హెడ్, రాజముద్ర (అశోక చిహ్నం)తో కూడిన ఈ లేఖను 'కాక్రోచ్ జనతా పార్టీ' వ్యవస్థాపకుడు అభిజీత్ దీప్కే తన ఎక్స్ ఖాతాలో పోస్ట్ చేశారు. బాలాఘాట్ జిల్లాలో 30 మందికి పైగా గిరిజన చిన్నారుల మరణాలు, గిరిజన ప్రాంతాల్లో నెలకొన్న దయనీయ పరిస్థితులను ఎత్తిచూపుతూ ఆయన చేసిన ఈ వ్యంగ్యాస్త్రం (Satire) ఇప్పుడు రాజకీయ, న్యాయ వివాదానికి దారితీసింది.

ఈ నకిలీ రాజీనామా లేఖలో రాష్ట్రంలోని వాస్తవ సమస్యలను దీప్కే తీవ్రంగా ప్రస్తావించారు. సమయానికి వైద్యం అందక బాలాఘాట్‌లో పదుల సంఖ్యలో చిన్నారులు ప్రాణాలు కోల్పోవడం, వారికి తొలుత రూ. 2 లక్షలు, నిరసనల తర్వాత రూ. 4 లక్షల పరిహారం ప్రకటించడంపై అందులో తీవ్ర ఆవేదన వ్యక్తం చేశారు. "అదే ఒక మంత్రి లేదా ఎమ్మెల్యే పిల్లలు చనిపోతే రూ. 4 లక్షల పరిహారంతో సరిపెడతారా? గిరిజనుల ప్రాణాలంటే అంత చులకనా?" అంటూ ప్రభుత్వాన్ని నిలదీసే ధోరణిలో లేఖను రాసుకొచ్చారు.

అంకెలు, వాస్తవాలతో కూడిన నిరసన

వ్యంగ్యంగా రూపొందించిన ఈ లేఖలో ప్రభుత్వం ఇచ్చిన అధికారిక డేటాను సైతం ఆయన ప్రస్తావించారు.

• రాష్ట్రంలో ఇప్పటికీ 55,795 గిరిజన కుటుంబాలకు విద్యుత్ సౌకర్యం లేదు.
• దేశవ్యాప్తంగా ఎస్టీలపై జరిగే నేరాల్లో 32 శాతం ఒక్క మధ్యప్రదేశ్‌లోనే నమోదవుతున్నాయని ఎన్‌సీఆర్‌బీ (NCRB) గణాంకాలు చెబుతున్నాయి.
• అసెంబ్లీలో ప్రభుత్వం వెల్లడించిన లెక్కల ప్రకారమే 5.41 లక్షల మంది చిన్నారులు తక్కువ బరువుతో, 1.36 లక్షల మందికి పైగా తీవ్ర పౌష్టికాహార లోపంతో బాధపడుతున్నారు.
• 'హర్ ఘర్ నల్ యోజన' కాగితాలకే పరిమితమై, బాలాఘాట్ వాసులు కలుషిత నదీ జలాలను తాగాల్సి వస్తోందని, ఒకే గదిలో అంగన్‌వాడీ నుంచి 5వ తరగతి వరకు 75 మంది పిల్లలు చదువుకుంటున్నారని పేర్కొన్నారు.

వ్యంగ్యమా? చట్ట ఉల్లంఘనా?

ఈ పోస్ట్‌పై సోషల్ మీడియాలో భిన్నాభిప్రాయాలు వ్యక్తమవుతున్నాయి. ప్రజా సమస్యలను, పాలకుల వైఫల్యాలను కళ్లకు కట్టేలా వ్యంగ్యంగా స్పందించారని కొందరు దీప్కేను సమర్థిస్తున్నారు. అయితే, ముఖ్యమంత్రి సంతకం, హోదాతో పాటు జాతీయ చిహ్నాన్ని (National Emblem) అనధికారికంగా ఉపయోగించడం 'స్టేట్ ఎంబ్లమ్ యాక్ట్' కింద తీవ్రమైన నేరమని, ఇది ఫోర్జరీ, సీఎంను ఇంపర్సనేట్ (వ్యక్తిత్వ దోపిడీ) చేయడమేనని మరికొందరు విమర్శిస్తున్నారు. ఒకవైపు గిరిజనుల బాధలు, మరోవైపు వ్యంగ్యం-చట్టపరమైన పరిమితుల మధ్య ఈ వివాదం నెట్టింట హాట్ టాపిక్‌గా మారింది.

I hereby resign as the Chief Minister of MP with immediate effect.

I thank Hon’ble PM @narendramodi ji for giving me the opportunity to serve the people of MP, an opportunity in which I have clearly failed.@GovernorMP pic.twitter.com/BVhfJDIf5n

— Abhijeet Dipke (@abhijeet_dipke) September 13, 2026