DGCA Power Bank Ban | విమాన ప్రయాణికులకు బిగ్ అలర్ట్.. ఆ కంపెనీ పవర్ బ్యాంక్‌పై DGCA నిషేధం

• విమానాల్లో 'MOBIKINS MK-PB-04' మోడల్ పవర్ బ్యాంకులను తీసుకెళ్లడంపై పూర్తి నిషేధం విధించిన పౌర విమానయాన శాఖ (DGCA)
• అక్టోబర్ 11న చండీగఢ్-చెన్నై ఇండిగో విమానంలో పవర్ బ్యాంక్ పేలి, హైదరాబాద్‌లో ఎమర్జెన్సీ ల్యాండింగ్ చేసిన ఘటన నేపథ్యంలో ఈ నిర్ణయం
• క్యాబిన్ బ్యాగేజీ, చెక్-ఇన్ బ్యాగేజీతో పాటు కార్గోలోనూ ఈ పవర్ బ్యాంక్‌ను అనుమతించబోమని స్పష్టీకరణ
• అన్ని పవర్ బ్యాంకులపై నిషేధం లేదని, కేవలం ఈ ఒక్క మోడల్‌కే ఆదేశాలు వర్తిస్తాయని వెల్లడి

DGCA Power Bank Ban | త్రినేత్ర న్యూస్ : విమాన ప్రయాణికుల భద్రతను దృష్టిలో ఉంచుకుని డైరెక్టరేట్ జనరల్ ఆఫ్ సివిల్ ఏవియేషన్ (DGCA) కీలక నిర్ణయం తీసుకుంది. విమానాల్లో 'MOBIKINS MK-PB-04' అనే నిర్దిష్ట మోడల్ పవర్ బ్యాంక్‌ను తీసుకెళ్లడంపై పూర్తి నిషేధం విధించింది. ఇటీవల ఓ విమానంలో పవర్ బ్యాంక్ పేలి మంటలు చెలరేగిన ఘటన నేపథ్యంలో డీజీసీఏ ఈ మేరకు అధికారిక ఆదేశాలు జారీ చేసింది.

హైదరాబాద్‌లో ఇండిగో విమానం ఎమర్జెన్సీ ల్యాండింగ్

అక్టోబర్ 11న చండీగఢ్ నుంచి చెన్నై వెళ్తున్న ఇండిగో (IndiGo) విమానంలో ఊహించని ప్రమాదం చోటుచేసుకుంది. విమానంలోని ఓవర్‌హెడ్ బిన్ (లగేజీ ర్యాక్) లోపల ఉన్న ఒక పవర్ బ్యాంక్ ఒక్కసారిగా పేలింది.

దీంతో అప్రమత్తమైన పైలట్లు విమానాన్ని అత్యవసరంగా హైదరాబాద్‌కు మళ్లించారు (Divert). శంషాబాద్ ఎయిర్‌పోర్టులో విమానం ల్యాండ్ అయిన వెంటనే ఎమర్జెన్సీ ఎవాక్యుయేషన్ (Emergency Evacuation) ద్వారా ప్రయాణికులను సురక్షితంగా బయటకు తరలించారు. ఈ ప్రమాదాన్ని తీవ్రంగా పరిగణించిన డీజీసీఏ తాజా నిషేధాన్ని అమల్లోకి తెచ్చింది.

క్యాబిన్, చెక్-ఇన్ బ్యాగేజీ రెండింటిలోనూ నిషేధం

డీజీసీఏ డైరెక్టర్ జనరల్ వీర్ విక్రమ్ యాదవ్ సంతకంతో జారీ అయిన ఎయిర్‌వర్తీనెస్ ఇన్ఫర్మేషన్ సర్క్యులర్ (AIC) ప్రకారం.. భారత్‌కు వచ్చే, ఇక్కడి నుంచి విదేశాలకు వెళ్లే, అలాగే దేశీయంగా నడిచే అన్ని విమానాలకు ఈ నిబంధన వర్తిస్తుంది.

ప్రయాణికులు తమ క్యాబిన్ బ్యాగేజీలో (Cabin Baggage) గానీ, చెక్-ఇన్ బ్యాగేజీలో గానీ, లేదా కార్గో (Cargo) రూపంలో గానీ 'MOBIKINS MK-PB-04' పవర్ బ్యాంక్‌ను విమానంలోకి తీసుకెళ్లకూడదు. ఈ మోడల్ పవర్ బ్యాంక్‌ను గుర్తించి, విమానాల్లోకి రాకుండా అడ్డుకోవడానికి తగిన చర్యలు తీసుకోవాలని ఎయిర్‌లైన్స్ సంస్థలకు డీజీసీఏ సూచించింది. అలాగే ఈ సేఫ్టీ అడ్వైజరీపై ప్రయాణికులకు ముందే తగిన సమాచారం అందించాలని ఆదేశించింది.

అన్ని పవర్ బ్యాంకులపై బ్యాన్ ఉందా?

ఈ నిషేధం అన్ని రకాల పవర్ బ్యాంకులకు వర్తించదని డీజీసీఏ స్పష్టం చేసింది. కేవలం ప్రమాదానికి కారణమైన MOBIKINS MK-PB-04 మోడల్‌కు మాత్రమే ఈ ఆదేశాలు పరిమితమని, మిగతా పవర్ బ్యాంకులపై ఎలాంటి బ్లాంకెట్ బ్యాన్ (Blanket Ban) లేదని తెలిపింది.

అమలు ఎలా సాధ్యమంటున్న విమర్శకులు

మరోవైపు, మార్కెట్‌లో పెద్దగా పేరులేని ఒకే ఒక్క బ్రాండ్‌ను మాత్రమే ఎంపిక చేసి బ్యాన్ చేయడంపై పలువురు విమర్శకులు ప్రశ్నలు లేవనెత్తుతున్నారు. ఇలా కేవలం ఒక్క మోడల్‌పై నిషేధం విధించడం వల్ల పెద్దగా ప్రయోజనం ఉండదని వారు అభిప్రాయపడుతున్నారు. నిత్యం వేలాది మంది ప్రయాణికులు తీసుకెళ్లే పవర్ బ్యాంకుల్లో ఈ నిర్దిష్ట మోడల్‌ను ఎయిర్‌పోర్ట్ సిబ్బంది ఎలా గుర్తిస్తారని, ఈ ఆదేశాలను ఆచరణలో ఎలా అమలు చేస్తారని వారు ప్రశ్నిస్తున్నారు.