Liquor Booking App | ఇక ఇంట్లో కూర్చొని మద్యం ఆర్డర్ చేయొచ్చు : ‘ఆన్‌లైన్ లిక్కర్ బుకింగ్’ యాప్‌పై భగ్గుమన్న ప్రతిపక్షం

• ఢిల్లీలో 'ఆన్‌లైన్ లిక్కర్ బుకింగ్' యాప్ కలకలం
• 24 గంటల్లో వెనక్కి తీసుకోకపోతే ప్రభుత్వానికి సెగ తప్పదన్న ఆప్

Delhi Liquor Booking App | త్రినేత్ర న్యూస్ : దేశ రాజధాని ఢిల్లీలో మద్యం విక్రయాల చుట్టూ సరికొత్త రాజకీయ దుమారం చెలరేగింది. మద్యం ప్రియులు వైన్ షాపుల ముందు గంటల తరబడి బారులు తీరకుండా ఉండేందుకు ఢిల్లీ ప్రభుత్వం ఆధ్వర్యంలోని డీఎస్‌ఐఐడీసీ (DSIIDC) 'ఢిల్లీ లిక్కర్ బుకింగ్' (Delhi Liquor Booking) పేరిట సరికొత్త మొబైల్ యాప్‌ను విడుదల చేసింది. అయితే, ఈ నిర్ణయంపై ప్రధాన ప్రతిపక్షం ఆమ్ ఆద్మీ పార్టీ (AAP) తీవ్రస్థాయిలో విరుచుకుపడింది. మద్యం వ్యాపారాన్ని ప్రోత్సహిస్తున్నారని, 24 గంటల్లో ఈ విధానాన్ని వెనక్కి తీసుకోకపోతే నగరవ్యాప్తంగా నిరసనలతో ప్రభుత్వాన్ని స్తంభింపజేస్తామని ఆప్ సీనియర్ నేత, మాజీ మంత్రి సౌరభ్ భరద్వాజ్ హెచ్చరించారు.

యాప్ ఎలా పనిచేస్తుంది? హోమ్ డెలివరీ ఉందా?

ప్రస్తుతం ఢిల్లీ అంతటా దాదాపు 700 ప్రభుత్వ మద్యం దుకాణాలు నాలుగు కార్పొరేషన్ల ద్వారా నడుస్తున్నాయి. అందులో ఢిల్లీ స్టేట్ ఇండస్ట్రియల్ అండ్ ఇన్‌ఫ్రాస్ట్రక్చర్ డెవలప్‌మెంట్ కార్పొరేషన్ (DSIIDC) నిర్వహిస్తున్న దాదాపు 208 నుంచి 210 అవుట్‌లెట్లకు మాత్రమే ఈ యాప్ సదుపాయం కల్పించారు.

ఆన్‌లైన్ రిజర్వేషన్: వినియోగదారులు యాప్‌లో తమకు కావాల్సిన బ్రాండ్‌ స్టాక్ వివరాలు చూసుకుని, ఆన్‌లైన్ పేమెంట్ ద్వారా ముందస్తుగా బుక్ చేసుకోవచ్చు.

నో హోమ్ డెలివరీ: ఇది డోర్ డెలివరీ సర్వీస్ కాదు. ఆర్డర్ పెట్టి పేమెంట్ పూర్తయిన తర్వాత, 48 గంటల్లోగా సంబంధిత అవుట్‌లెట్‌కు వెళ్లి కస్టమర్లే స్వయంగా మద్యం బాటిళ్లు కలెక్ట్ చేసుకోవాల్సి ఉంటుంది.

పరిమితులు యథాతథం: 25 ఏళ్లు పైబడిన వారు మాత్రమే ఈ యాప్‌ను ఉపయోగించడానికి అర్హులు. అలాగే ఇప్పటికే ఉన్న నిబంధనల ప్రకారం గరిష్టంగా 9 లీటర్ల విస్కీ, 18 లీటర్ల బీర్ వరకే ఒక వ్యక్తి కొనుగోలు చేసే అవకాశం ఉంది.

ఆసుపత్రుల క్యూలు పట్టవా?: సీఎంకు సౌరభ్ భరద్వాజ్ సూటి ప్రశ్న

ఈ యాప్ లాంచ్‌పై ఆప్ కన్వీనర్ సౌరభ్ భరద్వాజ్ నిప్పులు చెరిగారు. "ఢిల్లీ ప్రభుత్వ ఆసుపత్రుల్లో పేద రోగులు, వృద్ధులు మందుల కోసం 5 గంటల పాటు క్యూలైన్లలో నిలబడుతుంటే ఈ ప్రభుత్వానికి పట్టడం లేదు. వారు ఇంట్లో కూర్చుని మందులు తెప్పించుకునేలా ఎలాంటి ఆలోచన చేయలేదు. కానీ, మద్యం తాగే వాళ్ల కష్టాలు గుర్తించి మాత్రం 'ఇంట్లో కూర్చునే మద్యం బుక్ చేసుకోండి' అంటూ యాప్‌లు తెస్తున్నారు" అని మండిపడ్డారు.

బీజేపీ సర్కారుకు తాము ఓపెన్ ఛాలెంజ్ విసురుతున్నామని, తక్షణమే ఈ 'బుక్ యువర్ లిక్కర్' విధానాన్ని రద్దు చేయకపోతే ప్రజా పోరాటం తప్పదని ఆయన స్పష్టం చేశారు.

కాంగ్రెస్ సైతం పెదవివిరుపు

మరోవైపు కాంగ్రెస్ సీనియర్ నేత సందీప్ దీక్షిత్ సైతం ఈ విధానం వల్ల పెద్దగా ఉపయోగం ఉండదని అభిప్రాయపడ్డారు. ఆన్‌లైన్‌లో బుక్ చేసినప్పటికీ, సరుకు తెచ్చుకోవడానికి ఎలాగైనా వైన్ షాపు వద్దకే వెళ్లాల్సి ఉంటుందని, అలాంటప్పుడు ట్రాఫిక్ సమస్యలు, షాపుల దగ్గర గొడవలు ఎలా తగ్గుతాయని ఆయన ప్రశ్నించారు. ప్రస్తుతం ఈ ఆరోపణలపై అధికార వర్గాల నుంచి స్పందన రావాల్సి ఉంది.

VIDEO | Delhi: DSIIDC starts online liquor booking; AAP leader Saurabh Bharadwaj criticises move.

"We challenge the Rekha Gupta government that if they don't shut this scheme, we won't allow their government to function in Delhi," says Saurabh Bharadwaj.

A mobile app developed by the Delhi government's DSIIDC now allows advance booking of liquor from retail vends, officials said. All the same, there will be no home delivery, and the buyers must pick up the liquor bottles booked and paid for by them online, within 48 hours.

#DelhiNews

(Full video available on PTI Videos - https://t.co/bIyFWTfmBd)

— Press Trust of India (@PTI_News) October 28, 2026