Shraddha Kapoor | ప్రసవ వేదనలోనూ నాట్యమే ప్రాణం!.. 30న‌ శ్రద్ధా కపూర్‌ ‘ఈతా’ ట్రైలర్‌

Shraddha Kapoor | బాలీవుడ్‌ నటి శ్రద్ధా కపూర్‌ మరో విభిన్నమైన పాత్రతో ప్రేక్షకుల ముందుకు రానుంది. ఆమె ప్రధాన పాత్రలో నటిస్తున్న చిత్రం ‘ఈతా’. రణదీప్‌ హుడా కీలక పాత్రలో కనిపించనున్న ఈ సినిమాపై ఇప్పటికే ఆసక్తి నెలకొంది. ఇటీవల విడుదలైన టీజర్‌లో శ్రద్ధా కపూర్‌ లుక్‌, నృత్యాలు ప్రత్యేక ఆకర్షణగా నిలిచాయి. తాజాగా చిత్ర బృందం విడుదల చేసిన వీడియో సినిమాపై అంచనాలను మరింత పెంచింది. ఈ శుక్రవారం చిత్ర ట్రైలర్‌ను విడుదల చేయనున్నట్లు శ్రద్ధా కపూర్‌ సోషల్‌ మీడియా వేదికగా వెల్లడించింది. ఈ చిత్రాన్ని డిసెంబర్‌ 4న ప్రేక్షకుల ముందుకు తీసుకురానున్నారు.

‘ఈతా.. ఈతా’ అంటూ..

చిత్ర బృందం ఇన్‌స్టాగ్రామ్‌లో పంచుకున్న తాజా వీడియో గ్రామీణ వాతావరణాన్ని ఆవిష్కరిస్తోంది. రాత్రివేళ ఓ చోట పెద్ద సంఖ్యలో జనం గుమిగూడి కనిపిస్తారు. వారి మధ్య ఓ మహిళ నిలబడి ఉండగా.. చుట్టూ ఉన్నవారంతా ‘ఈతా.. ఈతా..’ అంటూ గట్టిగా నినాదాలు చేస్తుంటారు. ఉత్సాహభరితమైన నేపథ్య సంగీతం ఈ దృశ్యాలకు మరింత ఆకర్షణను తీసుకొచ్చింది. ఈ వీడియోలో కథకు సంబంధించిన పూర్తి వివరాలు వెల్లడించకపోయినా.. ప్రధాన పాత్ర చుట్టూ కథ ఎలా సాగనుందనే ఆసక్తిని రేకెత్తిస్తోంది. ‘ఈ శుక్రవారం ఆమె చరిష్మా బయటపడనుంది’ అంటూ శ్రద్ధా కపూర్‌ ట్రైలర్‌ విడుదల తేదీని ప్రకటించింది.

ప్రసవ వేదనలోనూ ప్రదర్శనకు సిద్ధం

ఇటీవల విడుదలైన ‘ఈతా’ టీజర్‌ కథాంశంపై ఆసక్తిని పెంచింది. మహారాష్ట్రలో ప్రసిద్ధి చెందిన తమాషా కళారూపం నేపథ్యంలో ఈ కథ సాగనున్నట్లు టీజర్‌ను బ‌ట్టి తెలుస్తోంది. తమాషా మండలికి చెందిన విఠాబాయి పాత్రలో శ్రద్ధా కపూర్‌ కనిపించనుంది. ఈతా ప్రదర్శనను వీక్షించేందుకు ప్రేక్షకులు భారీగా తరలివస్తారు. అయితే, వేదికపై ఆమె కనిపించకపోవడంతో ‘ఈతాబాయిని పిలవండి’ అంటూ కేకలు వేస్తారు. అదే సమయంలో తెరవెనుక తొమ్మిది నెలల గర్భిణిగా ఉన్న ఈతా ప్రసవ వేదనను అనుభవిస్తుంటుంది. బిడ్డ జన్మించిన తర్వాత కూడా తన ప్రదర్శన గురించి ఆలోచించే ఆమె.. ‘నేను ఇలా వెళ్లలేను.. సిద్ధం కావాలి’ అన్న భావాన్ని వ్యక్తం చేస్తుంది. ఆ పరిస్థితుల్లోనూ వేదికపైకి వచ్చి తనదైన నాట్యంతో ప్రేక్షకులను మంత్రముగ్ధులను చేస్తుంది.

నాట్యమే ఆమె జీవితానికి గుర్తింపు..

ప్రసవం తర్వాత వేదికపై ప్రదర్శన ఇవ్వడానికి సిద్ధమైన ఈతాను చూసి.. ‘ఇలా చేస్తే చనిపోతావు’ అని హెచ్చరిస్తారు. అందుకు ఆమె చెప్పే సమాధానం పాత్రలోని పట్టుదలను తెలియజేస్తుంది. ‘పడుకుని చనిపోతే ఓ అభాగ్యురాలిగా మిగిలిపోతా.. నాట్యం చేస్తూ చనిపోతే ఓ ఉదాహరణగా నిలిచిపోతా’ అనే భావంతో సాగే సంభాష‌ణ‌లు ఆకట్టుకుంటున్నాయి. ‘అయితే ఓ ఉదాహరణగా నిలిచిపో’ అనే మాటతో ఆమె సంకల్పానికి మరింత బలం చేకూరుతుంది. నాట్యాన్ని కేవలం వృత్తిగా కాకుండా జీవితంగా భావించే ఓ కళాకారిణి తపనను ఈ సన్నివేశాలు ప్రతిబింబిస్తున్నాయి. నృత్యమే తన ఉనికికి గుర్తింపుగా భావించే మహిళగా శ్రద్ధా కపూర్‌ కనిపించనుంది.

విఠాబాయిగా శ్రద్ధా కపూర్‌..

టీజర్‌లో శ్రద్ధా కపూర్‌ హావభావాలు, నృత్య భంగిమలు పాత్రకు తగ్గట్టుగా కనిపిస్తున్నాయి. ముఖ్యంగా సంప్రదాయ కళారూపమైన తమాషా నేపథ్యం, గ్రామీణ వాతావరణం, వేదికపై ప్రదర్శనలతో సినిమా ప్రత్యేకంగా నిలవనుందని తెలుస్తోంది. ఓ మహిళ తన వ్యక్తిగత బాధలను పక్కనపెట్టి కళ కోసం ఎలా పోరాడిందనే అంశాన్ని ఈ చిత్రం ప్రధానంగా చూపించనున్నట్లు టీజర్‌ సూచిస్తోంది. విఠాబాయి పాత్రలో శ్రద్ధా కపూర్‌ ఏ స్థాయిలో మెప్పిస్తుందో చూడాలి. రణదీప్‌ హుడా పాత్రకు సంబంధించిన మరిన్ని వివరాలు ట్రైలర్‌తో వెల్లడయ్యే అవకాశం ఉంది. డిసెంబర్‌ 4, 2026న థియేటర్లలో విడుదల కానున్న ఈ చిత్ర ట్రైలర్‌ శుక్రవారం ప్రేక్షకుల ముందుకు రానుంది.