Dry Waste Collection | చెత్త నుండి సిరి.. 14 నగరాల్లో లక్షల కిలోల వ్యర్థాల రీసైక్లింగ్

Dry Waste Collection | చెత్త నిర్వహణ(Waste Management) అనేది మన దేశంలోనే కాదు ప్రపంచవ్యాప్తంగా ఉన్న పెద్ద సమస్య. చెత్తను సేకరించడం, డంప్ యార్డ్స్కి తరలించడం, అది ఎలాంటి విషవాయువులను బహిర్గతం చేయకుండా ఉండేలా అన్ని ప్రభుత్వాలు ఎన్నో చర్యలు తీసుకుంటున్నప్పటికీ రోడ్ల మీద ఎక్కడ చూసినా చెత్తే కనిపిస్తుంటుంది. చాలామంది ప్రజలకు కూడా అసలు చెత్త నిర్వహణ గురించి తెలియదు. తడి చెత్త, పొడి చెత్త, ఇతర చెత్త అనే తేడా లేకుండా అన్నింటినీ కలిపేస్తుంటారు. ఎక్కడ పడితే అక్కడ పడేస్తుంటారు. దాని వల్ల ప్రజలకే కాదు.. పర్యావరణానికి కూడా ఎంతో హాని కలుగుతుంది. అలా ఢిల్లీలోని ఘజీపూర్లో పెద్ద చెత్తకుప్పనే పేరుకుపోయింది. ఆచెత్త వల్ల చుట్టుపక్కన ఉండే ప్రజలు చాలా ఇబ్బందులు ఎదుర్కోవడం, ఆ చెత్త కుప్ప కూలిపోయి 2017 లో ఇద్దరు వ్యక్తులు కూడా మృతి చెందారు. అయినా కూడా ప్రభుత్వం మాత్రం పట్టించుకోలేదు. దాని నుంచి వచ్చే విషవాయువుల వల్ల కూడా ప్రజలకు ఆరోగ్య సమస్యలు వస్తున్నా ప్రభుత్వం ఏ పట్టనట్లు ఉండటంతో ఓ ఇద్దరు సోదరులు మాత్రం ఈ చెత్త కుప్ప విషయంలో ఓ ఆలోచన చేశారు. అది ఇప్పుడు ప్రపంచానికే ఆదర్శంగా నిలిచింది. ఢిల్లీ కాలుష్యానికి, ఈ చెత్తకుప్పకు ఏంటి సంబంధం? చాలామంది చెత్తకుప్పను అక్కడి నుంచి లేకుండా చేయాలంటే అక్కడి నుంచి వేరే చోటుకి తరలించడం కాదు.. దాన్ని తగలబెట్టేస్తే పని అయిపోతుంది అని అనుకుంటారు. చెత్తకుప్పను కాల్చేయడం వల్ల వాయు కాలుష్యం పెరగడమే కాదు.. ఆ చెత్త కుప్ప కాలడం వల్ల రకరకాల విష వాయువులు గాలిలో కలుస్తాయి. ఇలా ఆ గాలిని పీల్చిన ప్రజలకు శ్వాసకు సంబంధించిన సమస్యలు వస్తాయి. ఢిల్లీలో వాయు కాలుష్యం ఎక్కువ కావడానికి కారణం ఈ చెత్తకుప్పను కాల్చడమే అని ఇద్దరు సోదరులు విహాన్, నవ్ అగర్వాల్ గుర్తించారు. అప్పటికే ఈ చెత్తకుప్పను పలుమార్లు కాల్చడం వల్ల విహాన్కి ఆస్తమా సమస్య వచ్చింది. దీంతో ఈ చెత్తకుప్పకు పరిష్కారం వెతకాలని నిర్ణయించుకున్నారు. పెద్ద ఉద్యమంగా మారిన చిన్న అలవాటు ముందు తమ ఇంట్లో ఉన్న చెత్తను వేరు చేయడం మొదలు పెట్టారు. తడి చెత్త, పొడి చెత్తను వేరే చేయడం ప్రారంభించారు. దాన్ని రీసైక్లింగ్ చేయాలనేది వాళ్ల ప్లాన్. కేవలం వాళ్ల ఇంట్లో చెత్తనే తీసుకెళ్తే రీసైక్లింగ్ చేయడం కుదరదని చెప్పడంతో ఎక్కువ చెత్త కావాలి కాబట్టి.. తమ ఇంటి దగ్గర ఉన్న కొందరితో మాట్లాడి వాళ్ల ఇంట్లోని చెత్తను కూడా సేకరించడం మొదలు పెట్టారు. అలా ఒక చిన్న అలవాటు కాస్త పెద్ద ఉద్యమంగా మారింది. వన్ స్టెప్ గ్రీన్ సంస్థ ఏర్పాటు అలా 2018 లో విహాన్, నవ్ అగర్వాల్ కలిసి వన్ స్టెప్ గ్రీన్ అనే స్వచ్ఛంద సంస్థను ప్రారంభించారు. అప్పుడు విహాన్కి 14 ఏళ్లు. నవ్కి 11 ఏళ్లు. తమ చుట్టుపక్కన ఉన్న ఇండ్లు, స్కూల్స్, ఆఫీసుల నుంచి ప్లాస్టిక్, కార్డ్ బోర్డ్, లోహాలు, గాజు, ఈ వేస్ట్ ఇలా అన్నింటినీ ఉచితంగా సేకరించి వాటిని రీసైక్లింగ్ ఫ్యాక్టరీకి పంపించేవారు. అలా ఇప్పటి వరకు 10 లక్షల కిలోల చెత్తను రీసైక్లింగ్ చేసి ఆ చెత్తను చెత్త కుప్ప దగ్గరికి వెళ్లకుండా అడ్డుకోగలిగారు. ప్రస్తుతం భారత్లో వీళ్ల సేవలు 14 నగరాల్లో ఉన్నాయి. ఈ చెత్త సేకరణ కోసం వందలాది మంది మహిళలకు ఉపాధి కల్పించారు. 2021 లో ఇద్దరు సోదరులకు ఇంటర్నేషనల్ చిల్డ్రన్స్ పీస్ ప్రైజ్ కూడా వచ్చింది. చిన్న వయసులోనే గొప్పగా ఆలోచించి... తమ ఇంటి నుంచే మార్పును తీసుకొచ్చి సమాజానికి స్ఫూర్తిగా నిలిచిన ఇద్దరు అన్నదమ్ములను ఇప్పుడు అందరూ మెచ్చుకుంటున్నారు. View this post on Instagram A post shared by The Better India (@thebetterindia)