TN Polls | మేనిఫెస్టో విడుద‌ల చేసి అన్నాడీఎంకే.. పురుషుల‌కు బ‌స్ ఫ్రీ, మ‌హిళ‌ల‌కు స్కూట‌ర్లు..!

TN Polls | త‌మిళ‌నాడు అసెంబ్లీ ఎన్నిక‌ల‌కు ముందు ప్ర‌తిపక్ష అన్నాడీఎంకే (AIADMK) పార్టీ మంగ‌ళ‌వారం మేనిఫెస్టోను విడుద‌ల చేసింది. ఈ మేనిఫెస్టోలో ప్రధానంగా మహిళలు, మధ్యతరగతి వర్గం, పేద ప్రజల‌పై వ‌రాలు కురిపించింది. ఉచిత ఫ్రిజ్, ఆర్థిక సాయం, రేష‌న్ స‌హా ప‌లు హామీలు ఇచ్చింది. ఆ పార్టీ జ‌న‌ర‌ల్ సెక్రెట‌రీ ఎడ‌ప్పాడి ప‌ళ‌నిస్వామి మేనిఫెస్టోను విడుద‌ల చేసింది. మొత్తం 297 హామీలు ఉన్నాయ‌ని, ప్ర‌తివ‌ర్గం సూచ‌న‌ల‌ను ప‌రిగ‌ణ‌లోకి తీసుకొని మేనిఫెస్టోను రూపొందించామ‌న్నారు.

ధరల పెరుగుదల, నిరుద్యోగ సమస్యలకు ఉపశమనం కల్పించడం ప్రధాన ఉద్దేశమ‌ని తెలిపారు. ప్రతి కుటుంబానికి పన్నులు, ధరల పెరుగుదల భారాన్ని తగ్గించేందుకు రూ.10వేల ఆర్థిక సహాయం అందిస్తామ‌ని హామీ ఇచ్చారు. మేనిఫెస్టోలో అన్నా డీఎంకే మ‌హిళ‌ల‌పై వ‌రాలు కురిపించింది. ఫ్రిజ్‌లు అందించ‌డంతో పాటు ఆర్థిక సాయం, స‌బ్సిడీపై స్కూట‌ర్ ఇవ్వ‌నున్న‌ట్లు ప్ర‌క‌టించింది. దాంతో పాటు నెల‌నెలా ఇచ్చే రేష‌న్ స‌రుకుల్లో ప‌ప్పు, నూనెను అదనంగా ఇవ్వ‌నున్న‌ట్లు ప్ర‌క‌టించింది. వృద్ధుల‌కు పెన్ష‌న్ త‌దిత‌ర హామీలు ఇచ్చి ఓట‌ర్ల‌ను ఆక‌ర్షించేందుకు ప్ర‌య‌త్నం చేసింది.

అన్నా డీఎంకే కీల‌క హామీలు

• ప్రతి కుటుంబానికి రూ.10వేల ఆర్థిక సహాయం
• మహిళలకు నెలకు రూ.2వేల ఆర్థిక సాయం
• ప్రతి సంవత్సరం మూడు ఉచిత గ్యాస్ సిలిండర్లు
• రేషన్ కార్డు ఉన్న ఇంటిపెద్ద అయిన మహిళ‌కు ఉచితంగా రిఫ్రిజిరేట‌ర్‌
• బియ్యంతో పాటు నెల‌కు కేజీ ప‌ప్పు, లీట‌ర్ వంట‌నూనె ఫ్రీ
• వ‌ర్కింగ్ వుమెన్స్‌కు రూ.25వేల స‌బ్సిడీతో అమ్మ స్కూట‌ర్‌
• నగరాల్లో పురుషులకు ఉచిత బస్ ప్రయాణం
• వృద్ధుల పెన్షన్ రూ.2వేల‌కు పెంపు
• ఇండ్లులేని పేద కుటుంబాల‌కు ప‌క్కా ఇండ్లు
• నిరుద్యోగ ప‌ట్ట‌భ‌ద్రుల‌కు నెల‌కు రూ.2వేల భ‌త్యం
• యువత వ్యాపారాలు చేసేందుకు రూ.25ల‌క్ష‌ల వ‌ర‌కు రుణ స‌హాయం
• ఉద్యోగాల్లో తమిళులకు ప్రాధాన్యం ఇచ్చేందుకు చ‌ట్టం
• గ్రామీణ ఉపాధి పథకాన్ని 150 రోజులుగా పొడ‌గించేందుకు హామీ
• ప‌దేళ్లుగా పని చేస్తున్న నర్స్‌లను క్ర‌మ‌బ‌ద్దీక‌రించ‌డం
• మద్యం షాపులను క్రమంగా మూసివేయ‌డం