పశ్చిమ బెంగాల్‌లో ఎస్ఐఆర్.. 58 లక్షల ఓట్లు తొలగింపు.. కారణాలివే

పశ్చిమ బెంగాల్ రాష్ట్రంలో ఓటర్ల జాబితా సవరణ ప్రక్రియను ఎన్నికల కమిషన్ చాలెంజింగ్‌గా తీసుకుంది. ఓటర్ల జాబితా సవరణ ప్రక్రియపై ఆ రాష్ట్ర ప్రభుత్వమే మండిపడుతోంది. కావాలని రాష్ట్రంలో ఉన్న ఓటర్లను తీసేయడానికి కేంద్రం కుట్ర పన్నుతోందని రాష్ట్ర ప్రభుత్వం వ్యతిరేకిస్తున్న విషయం తెలిసిందే. మరోవైపు పశ్చిమ బెంగాల్‌లో శరణార్ధులుగా బంగ్లాదేశ్ నుంచి వచ్చి ఇక్కడే సెటిల్ అయిన వాళ్లు చాలా మందే ఉన్నారు. బెంగాల్‌లోనే అన్ని రకాల ఐడీ కార్డులు తీసుకొని ఓట్లు కూడా వేస్తున్నారు. కొందరు అక్రమంగా బంగ్లాదేశ్ నుంచి వచ్చి ఇక్కడే స్థిరపడ్డారు. వీళ్లందరినీ తిరిగి బంగ్లాదేశ్ పంపించేందుకు, వాళ్ల ఓట్లను తీసేందుకే కేంద్రం, ఎన్నికల కమిషన్ ఎస్ఐఆర్‌ను తీసుకొచ్చాయి. ఆ ప్రక్రియ ఇంకా కొనసాగుతోంది. ఇందులో భాగంగానే ఓటర్ల జాబితాతో కూడిన ముసాయిదాను తాజాగా ఎన్నికల సంఘం విడుదల చేసింది. అందులో ఓటర్ల జాబితా నుంచి 58 లక్షల మందికి పైగా పేర్లను తొలగించినట్లు ఈసీ ప్రకటించింది.

ఎందుకు తొలగించారు?

మొత్తం తొలగించిన ఓటర్లు 58,20,898. అందులో సుమారు 24 లక్షల మంది ఓటర్లు మరణించినట్లు ఎన్నికల సంఘం అధికారులు గుర్తించారు. మరికొందరివి చిరునామాలు మారడం, కొందరివి నకిలీ నోట్లు ఉండటం, ఇంకొందరి ఆచూకీ లేకపోవడం వల్ల అన్నీ కలిపి 58,20,898 ఓట్లను ఎన్నికల సంఘం డిలీట్ చేసింది.

మరణించిన వారు: 24,16,852 మంది

శాశ్వతంగా వలస వెళ్లిన వారు: 19,88,076 మంది

ఆచూకీ లేని వారు: 12,20,038 మంది

డూప్లికేట్ (నకిలీ) ఓట్లు: 1,38,328 మంది

ఇతర కారణాలు: 57,604 మంది

అభ్యంతరాలకు జనవరి 15 వరకు గడువు

ఈ డ్రాఫ్ట్ జాబితాపై అభ్యంతరాలు తెలపడానికి ఓటర్లకు, రాజకీయ పార్టీలకు జనవరి 15, 2026 వరకు ఎన్నికల కమిషన్ గడువు ఇచ్చింది. జనవరి 16 నుంచి ఫిబ్రవరి 7 వ తేదీ వరకు అభ్యంతరాల పరిశీలన ఉంటుంది. తుది ఓటర్ల జాబితాను ఫిబ్రవరి 14, 2026న విడుదల చేస్తారు.