సరిహద్దు కాపలా నుంచి 10 కోట్ల మొక్కల దాకా: ‘టెరిటోరియల్ ఆర్మీ’ రియల్ హీరోస్!

    సరిహద్దుల్లో తుపాకీ పట్టి, విపత్తుల్లో ప్రాణాలు కాపాడే 'పౌర సైనికులు': టెరిటోరియల్ ఆర్మీ వెనుక ఉన్న ఆసక్తికర నిజాలు!

శాంతి సమయాల్లో వాళ్లు డాక్టర్లు, లాయర్లు, ఇంజనీర్లు లేదా వివిధ రంగాల ఉద్యోగులు. కానీ దేశానికి ఆపదొస్తే చాలు.. అదే చేతులతో తుపాకీ పట్టి సరిహద్దులకు కదులుతారు. దేశ భద్రతకే కాకుండా పర్యావరణ పరిరక్షణ, విపత్తుల సమయాల్లో ప్రజల ప్రాణాలను కాపాడేందుకు ముందుంటారు. వారే 'టెరిటోరియల్ ఆర్మీ' (TA) సైనికులు. సాధారణ పౌరులుగా జీవిస్తూనే సైనిక దుస్తులు ధరించే ఈ 'పౌర-సైనికుల' వెనుక ఉన్న ఆసక్తికరమైన గణాంకాలు, వారి నేపథ్యంపై ప్రత్యేక కథనం.

న్యూఢిల్లీలో పార్లమెంటరీ సలహా కమిటీ కీలక భేటీ

టెరిటోరియల్ ఆర్మీ విధివిధానాలు, దాని పనితీరు, భవిష్యత్ కార్యాచరణపై న్యూఢిల్లీలో రక్షణ మంత్రిత్వ శాఖ (MoD) పార్లమెంటరీ సలహా కమిటీ ప్రత్యేక సమావేశం జరిగింది. కేంద్ర రక్షణ మంత్రి రాజ్ నాథ్ సింగ్ అధ్యక్షతన జరిగిన ఈ భేటీలో రక్షణ రంగానికి చెందిన అత్యున్నత నాయకత్వం పాల్గొంది. రక్షణ శాఖ సహాయ మంత్రి సంజయ్ సేథ్, చీఫ్ ఆఫ్ డిఫెన్స్ స్టాఫ్ (CDS) జనరల్ ఎన్.ఎస్. రాజా సుబ్రమణి, ఆర్మీ చీఫ్ జనరల్ ధీరజ్ సేథ్, డిఫెన్స్ సెక్రటరీ రాజేష్ కుమార్ సింగ్, సెక్రటరీ (డిఫెన్స్ ప్రొడక్షన్) సంజీవ్ కుమార్, సెక్రటరీ (డిఫెన్స్ ఫైనాన్స్) విశ్వజిత్ సహాయ్ సహా పార్లమెంటరీ కమిటీ సభ్యులు, పలువురు సీనియర్ అధికారులు ఈ సమావేశంలో హాజరయ్యారు. సమావేశంలో సీనియర్ అధికారులు టెరిటోరియల్ ఆర్మీ సాధించిన విజయాలు, దాని బాధ్యతలపై వివరణాత్మక నివేదికను కమిటీ ముందుంచగా, బలగాన్ని మరింత బలోపేతం చేసేందుకు సభ్యులు పలు కీలక సూచనలు చేశారు. ఈ సందర్భంగా రక్షణ మంత్రి మాట్లాడుతూ.. ఈ బలగం కేవలం దేశ రక్షణకే పరిమితం కాకుండా, పర్యావరణ పరిరక్షణతో పాటు విపత్తు నిర్వహణలోనూ అద్భుత ఫలితాలు సాధిస్తోందని ప్రశంసించారు.

ఆకట్టుకునే గణాంకాలు.. ఆశ్చర్యపరిచే విజయాలు!

సాధారణంగా సైన్యం అనగానే మనకు గుర్తొచ్చేది సరిహద్దు కాపలా, ఆయుధాలు. కానీ టెరిటోరియల్ ఆర్మీ రికార్డులు చూస్తే ఎవరికైనా ఆశ్చర్యం కలగక మానదు. పార్లమెంటరీ సమావేశంలో వెల్లడైన కొన్ని కీలక గణాంకాలు ఈ బలగం సత్తా ఏమిటో స్పష్టం చేస్తున్నాయి.

44 వేల మందికి పైగా సైనికులు: - ప్రస్తుతం ఈ బలగంలో సుమారు 44,400 మంది సిబ్బంది అత్యంత నిబద్ధతతో సేవలు అందిస్తున్నారు. వీరు దేశవ్యాప్తంగా 59 విభిన్న యూనిట్లుగా విస్తరించి ఉన్నారు.

10 కోట్ల మొక్కలు.. 85 శాతం మనుగడ: - టెరిటోరియల్ ఆర్మీలోని 'ఎకోలాజికల్ టాస్క్ ఫోర్స్' (ETF) ఇప్పటివరకు ఏకంగా 10 కోట్ల వరకు మొక్కలను నాటింది. సాధారణంగా నాటిన మొక్కల్లో చాలావరకు చనిపోతుంటాయి. కానీ టీఏ నాటిన మొక్కల మనుగడ రేటు (Survival Rate) 80 నుంచి 85 శాతం వరకు ఉండటం వారి క్రమశిక్షణకు, నిబద్ధతకు నిదర్శనం.

ఆపదలో ఫస్ట్ రెస్పాండర్స్: - ప్రకృతి విపత్తులైన కేరళ వరదలు, ఒడిశా తుఫాను, ఇటీవల అసోంను ముంచెత్తిన వరదల్లో బాధితులను రక్షించడంలో, ఉచిత వైద్య శిబిరాలు నిర్వహించడంలో ఈ సైనికులే ముందు వరుసలో నిలిచారు.

అసలు ఈ 'టెరిటోరియల్ ఆర్మీ' ఎలా పుట్టింది?

భారతదేశానికి స్వాతంత్ర్యం వచ్చిన తొలినాళ్లలో, దేశ రక్షణ కోసం ప్రధాన సైన్యానికి అండగా ఉండేందుకు ఒక ద్వితీయ శ్రేణి సైనిక బలగం (Second Line of Defence) అవసరాన్ని నాటి నాయకులు గుర్తించారు.1948 ఆగస్టులో భారత పార్లమెంటు 'టెరిటోరియల్ ఆర్మీ యాక్ట్'ను ఆమోదించింది. ఈ చట్టం ఆధారంగా, 1949 అక్టోబర్ 9న భారత తొలి గవర్నర్ జనరల్ సి. రాజగోపాలాచారి టెరిటోరియల్ ఆర్మీని అధికారికంగా ప్రారంభించారు. అందుకే ప్రతి ఏటా అక్టోబర్ 9ని 'టీఏ డే'గా జరుపుకుంటారు. ఇది పూర్తికాలపు సైనిక ఉద్యోగం కాదు. 18 నుంచి 42 ఏళ్ల వయస్సు ఉండి, సొంతంగా వ్యాపారం లేదా ఉద్యోగం చేసుకునే ఏ భారతీయ పౌరుడైనా ఇందులో చేరవచ్చు. సంవత్సరంలో కొన్ని రోజులు వీరికి కఠినమైన సైనిక శిక్షణ ఇస్తారు.

వారి ముందున్న ప్రధాన లక్ష్యాలు ఏమిటి?

1. ఆర్మీకి అదనపు బలం (Surge Capacity): యుద్ధ సమయం లేదా అత్యవసర పరిస్థితులు ఏర్పడినప్పుడు ప్రధాన సైన్యానికి అవసరమైన అదనపు మానవ వనరులను అందించడం.

2.  అంతర్గత భద్రత: దేశ సరిహద్దుల్లో ఉద్రిక్తతలు నెలకొన్నప్పుడు, అంతర్గతంగా శాంతిభద్రతలకు విఘాతం కలిగినప్పుడు స్థానిక యంత్రాంగానికి సహాయపడటం.
3.  కీలక వ్యవస్థల రక్షణ:  ఎమర్జెన్సీ సమయాల్లో దేశంలో రైల్వేలు, టెలికామ్ సేవలు, చమురు సంస్థల (ONGC లాంటివి) విధులు ఆటంకం లేకుండా సాగేలా భద్రత కల్పించడం.
4.  పర్యావరణ ప్రతిజ్ఞ:  ప్రధాని నరేంద్ర మోదీ పిలుపునిచ్చిన 'మిషన్ LiFE' (పర్యావరణానికి అనుకూలమైన జీవనశైలి), 'పంచామృత్' లక్ష్యాలను క్షేత్రస్థాయిలో అమలు చేయడంలో కీలక పాత్ర పోషించడం.

"తమ పౌర జీవితంలో వృత్తులను కొనసాగిస్తూనే.. అవసరమైనప్పుడు దేశం కోసం నిలబడే ఈ పౌర-సైనికులు సమాజానికి, సైన్యానికి మధ్య ఒక సజీవ వారధి లాంటివారు" అని రక్షణ మంత్రి రాజ్ నాథ్ సింగ్ కొనియాడారు. మాజీ క్రికెట్ కెప్టెన్ ఎం.ఎస్. ధోనీ, ఒలింపిక్ విజేత అభినవ్ బింద్రా లాంటి ప్రముఖులు కూడా ఈ బలగంలో గౌరవ హోదాల్లో పనిచేయడం ఈ 'పౌర-సైన్యం' విశిష్టతకు మరో నిదర్శనం.