WhatsApp | వాట్సాప్ గ్రూప్ చాట్స్‌లో భారీ మార్పులు.. పోల్స్, ఎట్ ఆల్, కొత్త గ్రూప్ ఫీచర్లు అందుబాటులోకి..

WhatsApp | ప్ర‌ముఖ సోష‌ల్ మీడియా ప్లాట్‌ఫామ్ వాట్సాప్ త‌న యాప్‌లో యూజ‌ర్ల‌కు మ‌రిన్ని ఫీచ‌ర్ల‌ను అందుబాటులోకి తెచ్చింది. గ్రూప్ చాట్స్‌ను మ‌రింత సౌకర్య‌వంతంగా మార్చాల‌నే ఉద్దేశంతో ఈ కొత్త ఫీచ‌ర్ల‌ను ప్ర‌వేశ‌పెట్టింది. మెరుగైన పోల్స్‌, కొత్త @all మెన్షన్ ఆప్షన్, ఇప్పటికే ఉన్న గ్రూప్ నుంచి సులభంగా కొత్త గ్రూప్‌ను సృష్టించే సౌకర్యాన్ని తీసుకొచ్చింది. ఈ సందర్భంగా సంస్థ వివ‌రాల‌ను వెల్లడించింది. అమెరికాలో 100 మిలియన్లకు పైగా ప్రజలు వాట్సాప్‌ను ఉపయోగిస్తుండగా, ప్రపంచవ్యాప్తంగా ఈ ప్లాట్‌ఫామ్‌కు 3 బిలియన్లకు పైగా వినియోగదారులు ఉన్నారు. వాట్సాప్ తీసుకొచ్చిన కొత్త అప్‌డేట్‌లో భాగంగా గ్రూప్ చాట్స్‌లో పోల్స్‌కు మరిన్ని నియంత్రణలు అందుబాటులోకి వచ్చాయి. ఇకపై పోల్స్‌కు ముగింపు సమయాన్ని నిర్ణయించి, నిర్దిష్ట సమయం తర్వాత ఆటోమేటిక్‌గా ఓటింగ్‌ను ముగించవచ్చు.

పోలింగ్‌, ఎట్ ఆల్ మెన్ష‌న్ ఫీచ‌ర్లు..

అలాగే ఎవరు ఏ ఎంపికకు ఓటు వేశారో ఇతరులకు కనిపించకుండా ఓటర్ల పేర్లను దాచే అవకాశం కల్పించింది. పోల్ రూపొందించిన తర్వాత 15 నిమిషాల వరకు ప్రశ్నను సవరించే అవకాశం కూడా ఉంటుంది. దీంతో టైపింగ్ తప్పులను సరిదిద్దడం లేదా ప్రశ్నకు అదనపు వివరణను జోడించడం సులభమవుతుంది. మరో కీలక ఫీచర్‌గా @all మెన్షన్‌ను ప్రవేశపెట్టింది. ఇప్పటి వరకు ఒక్కో సభ్యుడిని విడివిడిగా ట్యాగ్ చేయాల్సి వచ్చేది. ఇకపై @all టైప్ చేస్తే ఒకేసారి గ్రూప్‌లోని అందరికీ నోటిఫికేషన్ పంపవచ్చు. పాఠశాలలు లేదా కార్యాలయాల మూసివేత సమాచారం, ఈవెంట్ గడువులు, చివరి నిమిషంలో జరిగే మార్పులు వంటి అత్యవసర సమాచారాన్ని వేగంగా అందించేందుకు ఈ ఫీచర్ ఉపయోగపడుతుంది. 32 మందికిపైగా సభ్యులు ఉన్న గ్రూప్‌లలో ఈ సౌకర్యం అడ్మిన్‌లకు మాత్రమే అందుబాటులో ఉంటుంది. గ్రూప్‌ను మ్యూట్ చేసినా @all నోటిఫికేషన్ పనిచేస్తుంది. అయితే వినియోగదారులు నోటిఫికేషన్ సెట్టింగ్స్‌లో ఈ అలర్ట్‌లను నియంత్రించ‌వచ్చు లేదా మ్యూట్ చేయ‌వచ్చు.

కొత్త గ్రూప్ క్రియేష‌న్ ఈజీగా..

ఇప్పటికే ఉన్న గ్రూప్ చాట్‌లోని సభ్యులతో కొత్త గ్రూప్‌ను సృష్టించే సౌకర్యాన్ని కూడా వాట్సాప్ అందుబాటులోకి తీసుకొచ్చింది. దీనివల్ల ప్రతి సభ్యుడిని మళ్లీ ఒక్కొక్కరిని జోడించాల్సిన అవసరం ఉండదు. ప్రత్యేక అంశాలపై చర్చలు, ఈవెంట్ ప్లానింగ్, లాజిస్టిక్స్ సమన్వయం లేదా ప్రధాన గ్రూప్‌లో సందేశాల రద్దీ లేకుండా వేర్వేరు చర్చలు నిర్వహించేందుకు ఈ ఫీచర్ ఉపయోగపడుతుంది. ఇప్పటికే వాట్సాప్ గ్రూప్ చాట్స్‌లో గ్రూప్ మెసేజ్ హిస్టరీ, సభ్యుల ట్యాగ్స్, ఈవెంట్ రిమైండర్స్ వంటి ఫీచర్లను ప్రవేశపెట్టిన సంగతి తెలిసిందే. తాజా ఫీచర్లతో గ్రూప్ నిర్వహణ మరింత సులభంగా మారనుంది. ఈ కొత్త గ్రూప్ చాట్ ఫీచర్లు ప్రపంచవ్యాప్తంగా వాట్సాప్ వినియోగదారులకు దశలవారీగా విడుదల‌వుతున్నాయని సంస్థ తెలిపింది. అందువల్ల అంద‌రు వినియోగదారులకు ఈ అప్‌డేట్లు క్రమంగా అందుబాటులోకి రానున్నాయి.