Jaggery | షుగ‌ర్ లెవ‌ల్స్ పెర‌గొద్దంటే.. బెల్లాన్ని ఇలా తిన‌వ‌చ్చు..!

Jaggery | తీపి తినాలనే కోరిక చాలా మందికి ఉంటుంది. కానీ అదే సమయంలో ఆరోగ్యం కూడా ముఖ్యమే కదా. అలాంటి వారికి బెల్లం ఒక అద్భుతమైన ప్రత్యామ్నాయం. ఇది కేవలం చక్కెరకు బదులు మాత్రమే కాదు, ఖనిజాలతో నిండినది, శరీరానికి నెమ్మ‌దిగా శక్తిని అందించేది, రిఫైన్డ్ షుగర్ ఇవ్వలేని సహజమైన కారమెల్ లాంటి రుచిని ఇచ్చేదిగా ప్ర‌సిద్ధి చెందింది. జ‌ర్న‌ల్ ఆఫ్ ఫుడ్ ప్రాసెసింగ్ అండ్ టెక్నాల‌జీలో ప్రచురితమైన ఒక అధ్యయనం ప్రకారం, ప్రపంచంలో బెల్లం ఎక్కువగా ఉత్పత్తి చేసే దేశం భారత్ అని వెల్ల‌డైంది. ఇక్కడ బెల్లాన్ని ఘనరూపంలో, ద్రవరూపంలో, పొడి రూపంలో విస్తృతంగా ఉపయోగిస్తారు. ఇది సంప్రదాయ ఆహారాల్లోనే కాదు, ఆయుర్వేద చికిత్సల్లో, పరిశ్రమలలో కూడా ఉపయోగపడుతోంది. బెల్లం శరీరానికి నిరంతర శక్తిని ఇస్తుంది, శ‌రీరంలో ఐర‌న్ స్థాయిలను మెరుగుపరుస్తుంది, శరీరాన్ని శుభ్రపరచడంలో సహాయపడుతుంది.

చింత పండు లేదా వెల్లుల్లి మిశ్ర‌మంలో..

కొన్ని చిన్న మార్పులతో బెల్లాన్ని మీ రోజువారీ ఆహారంలో చేర్చుకుంటే తీపి సహజంగా ఉంటుంది, ఆరోగ్యం సుర‌క్షితంగా ఉంటుంది. షుగర్ లెవెల్స్ ఒక్కసారిగా పెర‌గ‌కుండా జాగ్ర‌త్త ప‌డ‌వ‌చ్చు. టీ లో చిటికెడు బెల్లం వేస్తే తీపి మాత్రమే కాదు, ఓ అద్భుత‌మైన‌ రుచి వస్తుంది. అల్లం, యాలకులతో కలిపితే జీర్ణక్రియకు కూడా మేలు చేస్తుంది. సాధారణ చక్కెరతో పోలిస్తే ఈ టీ మరింత సాంత్వనగా అనిపిస్తుంది. పచ్చి చట్నీ, చింతపండు చట్నీ లేదా వెల్లుల్లి మిశ్ర‌మం.. వీటిలో కొద్దిగా బెల్లం కలిపితే రుచి స‌రిగ్గా ఉంటుంది. రుచి పెర‌గ‌డంతోపాటు శక్తి కూడా నిరంత‌రాయంగా ల‌భిస్తుంది. ఇక ఓట్స్, చిరు ధాన్యాల జావ‌, ఉప్మా లాంటి బ్రేక్‌ఫాస్ట్‌లలో చక్కెరకు బదులుగా కరిగించిన బెల్లం వాడండి. ఇది రుచితో పాటు ఐర‌న్‌, మెగ్నిషియం వంటి పోష‌కాల‌ను అందించి మిమ్మ‌ల్ని ఆరోగ్యంగా ఉంచుతుంది.

ప‌ల్లీలు, కొబ్బ‌రితో..

వేయించిన గింజలు, ప‌ల్లీలు, కొబ్బరితో బెల్లం కలిపి చేసుకునే ఇంటి స్నాక్స్ మధ్యాహ్నం ఆకలికి అద్భుతంగా ప‌నిచేస్తాయి. ఇవి షుగర్ లెవ‌ల్స్‌ను పెంచ‌వు. ఆక‌లిని నియంత్రిస్తాయి. అలాగే భోజనం తర్వాత జీర్ణక్రియకు కూడా సహాయపడతాయి. గుజరాతీ ఖట్టీ-మీటీ పప్పు వండితే అందులో కొద్దిగా బెల్లం వేస్తే మసాలాల తీవ్రత తగ్గి రుచి పెరుగుతుంది. మసాలా ఎక్కువగా ఉన్న భోజనాలను తిన్న‌ తర్వాత పొట్ట‌కి ఉపశమనం ఇస్తుంది. అట్టా బిస్కెట్లు, రాగి మఫిన్స్ వంటి ఇంట్లో చేసుకునే బేకింగ్‌ల‌లో చక్కెర స్థానంలో బెల్లం వాడవచ్చు. ఇది తీపికి రుచిని ఇస్తుంది, కొంత పోషక విలువను కూడా అందిస్తుంది. బెల్లం అనేది తీపి మాత్రమే కాదు, అది సహజమైన, పోషకమైన, సమతుల్యమైన ఆహారంగా కూడా ప‌నిచేస్తుంది. చిన్న మార్పులతో దీన్ని రోజువారీ ఆహారంలో చేర్చుకుంటే తీపి కూడా ల‌భిస్తుంది. ఆరోగ్యం కూడా మెరుగు ప‌డుతుంది.