Tecentriq | 7 నిమిషాల్లో క్యాన్సర్ చికిత్స.. భారత్‌లో కొత్త ఇంజెక్షన్ సంచలనం..

Tecentriq | భారత్‌లో క్యాన్సర్ చికిత్స రంగంలో కీలక ముందడుగు పడింది. ఊపిరితిత్తుల క్యాన్సర్ రోగుల కోసం కేవలం 7 నిమిషాల్లో ఇవ్వగల కొత్త క్యాన్సర్ ఇంజెక్షన్‌ను విడుదల చేశారు. టెసెంట్రిక్ పేరుతో వచ్చిన ఈ ఔషధాన్ని రోష్ ఫార్మా ఇండియా భారత్‌లో ప్రవేశపెట్టింది. సాధారణంగా గంటల పాటు ఆస్పత్రిలో ఐవీ ద్వారా ఇచ్చే ఇమ్యూనోథెరపీ చికిత్సకు బదులుగా, ఈ కొత్త ఇంజెక్షన్‌ను చర్మం కింద ఇవ్వడం వల్ల చికిత్స సమయం గణనీయంగా తగ్గనుంది. ఈ చికిత్స ప్రధానంగా నాన్-స్మాల్ సెల్ లంగ్ క్యాన్సర్ (ఎన్‌ఎస్‌సీఎల్‌సీ) బాధితులకు ఉపయోగపడుతుంది. ఇది భారత్‌లో కనిపించే ఊపిరితిత్తుల క్యాన్సర్ కేసుల్లో అత్యంత సాధారణ రకం. వైద్యుల అభిప్రాయం ప్రకారం ఈ కొత్త విధానం రోగులకు మరింత సౌకర్యాన్ని కల్పించడంతోపాటు ఆస్పత్రులపై ఒత్తిడిని కూడా తగ్గిస్తుంది. అయితే ఈ చికిత్సపై భారీ ఆశలు ఉన్నప్పటికీ, ధర మాత్రం పెద్ద చర్చకు దారి తీస్తోంది. ఒక్క డోస్ ధర సుమారు రూ.3.7 లక్షలు. చాలా మంది రోగులకు ఆరు డోసులు అవసరం అవుతాయి. దీంతో మొత్తం చికిత్స ఖర్చు లక్షల్లో కాకుండా కోట్లకు చేరే అవకాశం లేకపోయినా, మధ్యతరగతి కుటుంబాలకు ఇది తీవ్రమైన ఆర్థిక భారం అవుతుందని నిపుణులు చెబుతున్నారు.

ఇమ్యూనోథెర‌పీలో భాగంగా..

కాగా దేశంలో ప్ర‌స్తుతం ఇమ్యూనోథెరపీకి ప్రాధాన్యం పెరుగుతోంది. కీమోథెరపీలా నేరుగా క్యాన్సర్ కణాలపై దాడి చేయకుండా, శరీరంలోని రోగనిరోధక వ్యవస్థను క్యాన్సర్‌పై పోరాడేలా ఈ విధానం పనిచేస్తుంది. అందుకే చాలామంది రోగులు దీనిని మెరుగైన ప్రత్యామ్నాయంగా భావిస్తున్నారు. తీవ్రమైన దుష్ప్రభావాలు కూడా కీమోతో పోలిస్తే తక్కువగా ఉంటాయ‌ని వైద్యులు చెబుతున్నారు. ఈ కొత్త ఇంజెక్షన్‌లో అటెజోలిజుమ్యాబ్ అనే ఔషధాన్ని ఉపయోగిస్తున్నారు. ఇది పీడీ-ఎల్1 అనే ప్రోటీన్‌ను అడ్డుకుంటుంది. సాధారణంగా క్యాన్సర్ కణాలు ఈ ప్రోటీన్ సహాయంతో శరీర రోగనిరోధక వ్యవస్థ నుంచి దాగిపోతాయి. కానీ ఈ ప్రోటీన్‌ను బ్లాక్ చేసిన తర్వాత రోగనిరోధక కణాలు క్యాన్సర్‌ను గుర్తించి సమర్థంగా దాడి చేస్తాయి. ప్రత్యేకంగా ట్యూమర్‌లలో పీడీ-ఎల్1 స్థాయిలు ఎక్కువగా ఉన్న రోగులకు ఈ చికిత్స మంచి ఫలితాలు ఇస్తుంద‌ని వైద్యులు చెబుతున్నారు. నిపుణుల అంచనా ప్రకారం ఎన్‌ఎస్‌సీఎల్‌సీ రోగుల్లో దాదాపు సగం మందికి ఈ చికిత్స అనుకూలంగా ఉండే అవకాశం ఉంద‌ని తేలింది. క్యాన్సర్ వ్యాప్తిని తగ్గించడం, రోగుల జీవనకాలాన్ని పెంచడం వంటి అంశాల్లో ఈ థెరపీ మంచి ఫలితాలు చూపిందని వైద్య వర్గాలు పేర్కొంటున్నాయి.

వేగ‌వంతం, సౌక‌ర్య‌వంతం..

ఈ ఇంజెక్షన్‌లో అతిపెద్ద ప్రయోజనం వేగం, సౌకర్యం. ఇంతకుముందు ఐవీ ఇన్ఫ్యూషన్ ద్వారా ఇమ్యూనోథెరపీ తీసుకునే రోగులు గంటల పాటు ఆస్పత్రుల్లో ఉండాల్సి వచ్చేది. ఇప్పుడు చర్మం కింద, సాధారణంగా తొడ భాగంలో ఇంజెక్షన్ రూపంలో ఔషధాన్ని ఇస్తారు. మొత్తం ప్రక్రియ కేవలం 7 నిమిషాల్లో పూర్తవుతుంది. దీంతో ఆస్పత్రుల్లో వేచి ఉండే సమయం తగ్గుతుంది. రోగుల ఒత్తిడి తగ్గుతుంది. ముఖ్యంగా వృద్ధులు లేదా దూర ప్రాంతాల నుంచి చికిత్స కోసం వచ్చే వారికి ఇది పెద్ద ఉపశమనంగా మారుతుంది. ఈ ఇంజెక్షన్ ను ప్రధానంగా నాన్-స్మాల్ సెల్ లంగ్ క్యాన్సర్ రోగుల కోసం రూపొందించారు. అయితే ప్రతి రోగి దీనికి అర్హుడు కాదు. ముందుగా రోగి క్యాన్సర్ కణాల్లో పీడీ-ఎల్1 ప్రోటీన్ స్థాయిలను పరీక్షిస్తారు. ఈ స్థాయులు ఎక్కువగా ఉన్నవారికి చికిత్స ప్రయోజనం ఎక్కువగా ఉండే అవకాశం ఉంటుంది. క్యాన్సర్ దశ, రోగి ఆరోగ్య పరిస్థితి ఆధారంగా ఈ థెరపీని ఒంటరిగా లేదా ఇతర చికిత్సలతో కలిపి ఇస్తారు.

ఖ‌ర్చే మ‌రీ ఎక్కువ‌..

ఈ చికిత్సపై ఉన్న అతిపెద్ద ఆందోళన ఖర్చు. ఒక్కో డోస్ రూ.3.7 లక్షల వరకు ఉండటం, పలుమార్లు డోసులు అవసరమవడం వల్ల సాధారణ కుటుంబాలకు ఇది అందుబాటులో ఉండడం కష్టమవుతోంది. ఇమ్యూనోథెరపీ ఔషధాల అభివృద్ధికి అధునాతన పరిశోధనలు, సాంకేతికత అవసరమవుతాయి. అందుకే వీటి ధరలు అధికంగా ఉంటాయని క్యాన్సర్ నిపుణులు చెబుతున్నారు. ప్రస్తుతం భారత్‌లో ఆధునిక ఇమ్యూనోథెరపీ చికిత్సలు ఒక్కో సైకిల్‌కు రూ.1.5 లక్షల నుంచి రూ.4 లక్షల వరకు ఖర్చవుతున్నట్లు నివేదికలు సూచిస్తున్నాయి. ఆర్థిక భారం తగ్గించేందుకు రోష్ ఫార్మా ఇండియా బ్లూ ట్రీ పేరుతో ప్రత్యేక పేషెంట్ అసిస్టెన్స్ ప్రోగ్రామ్‌ను ప్రారంభించింది. అలాగే ఈ ఔషధాన్ని సీజీహెచ్ఎస్ పథకంలో కూడా చేర్చారు. దీంతో కొంతమంది రోగులకు రీయింబర్స్‌మెంట్ స‌హాయం లభించే అవకాశం ఉంటుంది. అయినా కూడా అధునాతన క్యాన్సర్ చికిత్స సామాన్య ప్రజలకు అందుబాటులోకి రావాలంటే ప్రభుత్వ జోక్యం మరింత అవసరమని వైద్య నిపుణులు అభిప్రాయపడుతున్నారు. త్వరిత చికిత్స, ఆస్పత్రిలో తక్కువ సమయం, రోగులకు మెరుగైన సౌకర్యం వంటి ప్రయోజనాల కారణంగా ఈ 7 నిమిషాల క్యాన్సర్ షాట్‌ను భారత్‌లో వైద్య రంగంలో ఒక కీలక మైలురాయిగా భావిస్తున్నారు.