CDC | షుగ‌ర్ ఉంటే ముందుగా క‌ళ్ల ద్వారానే తెలుస్తుంది.. సీడీసీ నిపుణుల వెల్ల‌డి..

CDC | డయాబెటిస్ అంటే రక్తంలో చక్కెర స్థాయిలు పెరగడం మాత్రమే కాదు. చాలా సందర్భాల్లో ఈ వ్యాధి మొదటి హెచ్చరిక కళ్ల ద్వారానే కనిపిస్తుంది. అధికారికంగా డయాబెటిస్ నిర్ధారణ కావడానికి ముందే చూపులో మార్పులు రావడం మొదలవుతుందని వైద్య నిపుణులు చెబుతున్నారు. అమెరికాలోని సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (CDC) గణాంకాల ప్రకారం అక్కడ సుమారు 3 కోట్ల మందికి డయాబెటిస్ ఉంది. వీరిలో దాదాపు 90 శాతం మంది టైప్-2 డయాబెటిస్‌తో బాధపడుతున్నారు. ఈ వ్యాధి నరాలు, మూత్రపిండాలపై ప్రభావం చూపుతుందని అందరికీ తెలుసు కానీ, కళ్లే ముందుగా దెబ్బతినే అవయవమని చాలామందికి తెలియదు. కంటి వెనుక భాగంలో ఉన్న రెటినా అనే సున్నితమైన పొరలో అనేక సూక్ష్మ రక్తనాళాలు ఉంటాయి. ఇవే మనకు చూపును అందిస్తాయి. రక్తంలో చక్కెర స్థాయిలు ఎక్కువగా ఉంటే ఈ నాళాలు క్రమంగా దెబ్బతిని వాపు, లీకేజీ లేదా అడ్డంకులకు గురవుతాయి. దీనినే డయాబెటిక్ రెటినోపతి అంటారు. ఇది డయాబెటిస్‌లో అత్యంత ప్రమాదకరమైన ప‌రిస్థితుల‌లో ఒకటి.

ల‌క్ష‌ణాలు ఇవే..

పని చేసే వయస్సు క‌లిగిన డయాబెటిస్ రోగుల్లో మూడవ వంతుకు పైగా ఇప్పటికే కంటి సమస్యలు ఉన్నాయని నివేదికలు చెబుతున్నాయి. చాలామందికి చూపు బాగా తగ్గేవరకు తమకు ఈ సమస్య ఉందన్న విషయం తెలియకపోవడం మరింత ఆందోళన కలిగించే విషయం. డయాబెటిక్ రెటినోపతి ప్రారంభ దశలో ఎలాంటి నొప్పి లేకుండా, లక్షణాలు కూడా స్పష్టంగా కనిపించకుండా ముందుకు సాగుతుంది. అందుకే చూపు బాగానే ఉందని భావించి నిర్లక్ష్యం చేయడం ప్రమాదకరం. చికిత్స చేయకుండా వదిలేస్తే చూపు శాశ్వతంగా కోల్పోయే పరిస్థితి కూడా రావచ్చు. అయితే ముందుగానే గుర్తిస్తే వ్యాధి పెరగకుండా అడ్డుకోవచ్చు. డయాబెటిస్ వల్ల కళ్లలో కనిపించే మొదటి లక్షణాలలో చూపులో తేలియాడే చిన్న చుక్కలు లేదా దారాల్లాంటి ఆకారాలు కనిపించడం ఒకటి. ఇవి సాధారణంగా హానికరం కాకపోయినా, ఒక్కసారిగా ఎక్కువైతే రెటినాలో రక్తస్రావం జరుగుతున్న సంకేతం కావచ్చు. అలాగే మధ్యలో చీకటి మచ్చలు కనిపించడం, చూపు మసకబారడం, రాత్రి వేళ స్పష్టంగా కనిపించకపోవడం లేదా పక్క చూపు తగ్గిపోవడం వంటి లక్షణాలు కూడా రెటినోపతికి సూచనలు.

శాశ్వ‌త అంధ‌త్వం వ‌చ్చే ప్ర‌మాదం

కొన్నిసార్లు కొద్ది క్షణాల పాటు చూపు పూర్తిగా మాయమయ్యే పరిస్థితి కూడా రావచ్చు. ఇలాంటి లక్షణాలు కనిపిస్తే డయాబెటిస్ ఉన్నా లేకపోయినా వెంటనే కంటి వైద్యుడిని సంప్రదించాల్సిందే. రక్తంలో అధికంగా ఉండే గ్లూకోజ్ రెటినాలోని సూక్ష్మ రక్తనాళాలను దెబ్బతీయడమే ఈ వ్యాధికి ప్రధాన కారణం. దెబ్బతిన్న నాళాలు రక్తం లేదా ద్రవాన్ని లీక్ చేయడం, కొత్తగా బలహీనమైన నాళాలు ఏర్పడటం వంటి పరిణామాలు చోటు చేసుకుంటాయి. దీని వల్ల వాపు, మచ్చలు ఏర్పడడం, రెటినా విడిపోవడం లేదా మధ్య భాగంలో ద్రవం చేరడం జరుగుతుంది. దీన్నే మాక్యులర్ ఎడిమా అంటారు. ఇవన్నీ చివరకు శాశ్వత అంధత్వానికి దారితీయవచ్చు. టైప్-1, టైప్-2 డయాబెటిస్ ఉన్నవారికి ఈ సమస్య వచ్చే అవకాశం ఎక్కువ. ముఖ్యంగా చక్కెర స్థాయిలను నియంత్రించుకోని వారు, 5 నుంచి 10 ఏళ్లుగా డయాబెటిస్ ఉన్నవారు, గర్భధారణ సమయంలో డయాబెటిస్ వచ్చిన మహిళలు, అధిక రక్తపోటు లేదా కొలెస్ట్రాల్ ఉన్నవారు మరింత ప్రమాదంలో ఉంటారు.

టైప్-2 డ‌యాబెటిస్ ఉన్న వారికి..

పరిశోధనల ప్రకారం టైప్-1 డయాబెటిస్ ఉన్న వారిలో సుమారు 75 శాతం మందికి ఏదో ఒక దశలో రెటినోపతి వస్తే, టైప్-2 డయాబెటిస్ ఉన్న వారిలో సగం మందికి మొదటి పదేళ్లలోనే ఈ లక్షణాలు కనిపిస్తాయి. డయాబెటిక్ రెటినోపతికి పూర్తిగా నివారణ లేదని వైద్యులు చెబుతున్నారు. అయితే ముందుగానే చికిత్స ప్రారంభిస్తే వ్యాధి ముదరకుండా అడ్డుకోవచ్చు. అసాధారణ రక్తనాళాల పెరుగుదలను అడ్డుకునేందుకు యాంటీ-వీఈజీఎఫ్ ఇంజెక్షన్లు, లేజర్ చికిత్సలు, తీవ్ర పరిస్థితుల్లో శస్త్రచికిత్సలు కూడా అందుబాటులో ఉన్నాయి. కానీ ఇవన్నీ ఫలించాలంటే డయాబెటిస్‌ను నియంత్రణలో ఉంచుకోవడం అత్యంత కీలకం. నిపుణులు ముఖ్యంగా జీవనశైలిలో మార్పులు చేసుకోవాలని సూచిస్తున్నారు. క్రమం తప్పకుండా వ్యాయామం చేయడం, ఆరోగ్యకరమైన ఆహారం తీసుకోవడం, బరువు నియంత్రణలో ఉంచుకోవడం ద్వారా రక్తంలో చక్కెర స్థాయిలను అదుపులో పెట్టుకోవచ్చు. అలాగే తరచూ బ్లడ్ షుగర్ పరీక్షలు, ఏటా కనీసం ఒకసారి కళ్లకు డైలేటెడ్ ఐ పరీక్ష చేయించుకోవడం ఎంతో అవసరం.

కంటి చూపు అనేది కేవలం చూడగలగడమే కాదు, మన మొత్తం ఆరోగ్యానికి అద్దంలాంటిదని వైద్యులు చెబుతున్నారు. కొందరిలో డయాబెటిస్ ఉందన్న విషయం కూడా ముందుగా కళ్ల సమస్యల ద్వారానే బయటపడుతుంది. అందుకే ఎలాంటి లక్షణాలు లేకపోయినా కళ్ల పరీక్షలను నిర్లక్ష్యం చేయకుండా, ముందస్తు జాగ్రత్తలతో వ్యవహరించడం ద్వారా అంధత్వం వంటి తీవ్రమైన పరిణామాలను నివారించవచ్చు.