US-Israel-Iran War | అమెరికా ప్రతిపాదించిన 48 గంటల తాత్కాలిక కాల్పుల విరమణను తిరస్కరించిన ఇరాన్

• ఇరాన్ గగనతలంలో అమెరికాకు ఎదురుదెబ్బ
• బుషెహర్ అణు కేంద్రంపై దాడులు
• దుబాయ్‌లోని ఒరాకిల్ కంపెనీపై పడ్డ శకలాలు
• అమెరికా ప్రతిపాదనను తిరస్కరించిన ఇరాన్
• తీవ్రరూపం దాల్చిన అమెరికా-ఇరాన్ యుద్ధం

US-Israel-Iran War | త్రినేత్ర.న్యూస్ : ఫిబ్రవరి 28న ఇరాన్ సుప్రీం లీడర్ అలీ ఖమేనీ మరణంతో భగ్గుమన్న మిడిల్ ఈస్ట్ యుద్ధం.. గల్ఫ్ దేశాలను తీవ్ర భయాందోళనలకు గురిచేస్తోంది. ఒకప్పుడు సురక్షిత ప్రాంతాలుగా భావించిన గల్ఫ్ దేశాలు ఇప్పుడు ప్రత్యక్ష ముప్పును ఎదుర్కొంటున్నాయి. ఆర్థికంగా, భౌగోళికంగా ఈ యుద్ధ ప్రభావం మిడిల్ ఈస్ట్ దాటి ప్రపంచవ్యాప్తంగా విస్తరిస్తోంది.

బుషెహర్ అణు కేంద్రంపై దాడులు.. ఒకరి మృతి

శనివారం ఉదయం ఇరాన్ నైరుతి భాగంలోని బుషెహర్ అణు విద్యుత్ కేంద్రం సమీపంలో అమెరికా-ఇజ్రాయెల్ ప్రయోగించిన ప్రొజెక్టైల్ పడి ఒక భద్రతా సిబ్బంది మృతి చెందారు. అయితే, అణు కేంద్రం ప్రధాన సదుపాయాలకు ఎలాంటి నష్టం వాటిల్లలేదని సమాచారం. ఈ కేంద్రంపై దాడులు జరగడం ఇది నాలుగోసారి. ఈ దాడి అనంతరం రేడియేషన్ స్థాయుల్లో ఎలాంటి పెరుగుదల నమోదు కాలేదని అంతర్జాతీయ అణుశక్తి ఏజెన్సీ కూడా స్పష్టం చేసింది.

కుప్పకూలిన అమెరికా యుద్ధ విమానాలు.. పైలట్ కోసం గాలింపు

గత 35 రోజులుగా ఇరాన్ గగనతలంలో ఎలాంటి నష్టాన్ని చవిచూడని అమెరికాకు శనివారం ఎదురుదెబ్బ తగిలింది. ఇరాన్ దళాలు అమెరికాకు చెందిన ఎఫ్-15ఈ ఫైటర్ జెట్‌ను కూల్చివేశాయి. అందులో ఉన్న ఇద్దరు సిబ్బందిలో ఒకరిని అమెరికా రక్షించగా, మరొకరు అదృశ్యమయ్యారు. కోహ్గిలుయెహ్, బోయర్-అహ్మద్ ప్రావిన్స్‌లోని పర్వత ప్రాంతంలో తప్పిపోయిన పైలట్ కోసం ఇరు దేశాల దళాలు ముమ్మరంగా గాలిస్తున్నాయి. అటు గల్ఫ్ ప్రాంతంలోనూ అమెరికాకు చెందిన ఏ-10 గ్రౌండ్ అటాక్ ఎయిర్‌క్రాఫ్ట్‌ను కూల్చేసినట్లు ఇరాన్ మిలిటరీ ప్రకటించింది. అయితే ఆ పైలట్‌ను రక్షించినట్లు అమెరికా మీడియా వెల్లడించింది.

ఇతర ప్రాంతాల్లో బాంబుల మోత

పెట్రోకెమికల్ హబ్: నైరుతి ఇరాన్‌లోని మహ్షహర్ స్పెషల్ పెట్రోకెమికల్ జోన్‌పై అమెరికా-ఇజ్రాయెల్ దాడులు చేశాయి. మూడు ప్రధాన కంపెనీలు దెబ్బతిన్నాయి. శనివారం ఉదయం డ్రోన్ల దాడి కారణంగా టెహ్రాన్‌లో పలు భారీ పేలుళ్లు సంభవించాయి. ఇరాక్‌లోని బస్రా సమీపంలో విదేశీ చమురు కంపెనీల నిల్వ కేంద్రాలపై డ్రోన్ దాడి జరిగి మంటలు చెలరేగాయి. బహ్రెయిన్‌లో అడ్డుకున్న డ్రోన్ల శకలాలు పడి నలుగురు గాయపడ్డారు. దుబాయ్‌లోని ఒరాకిల్ భవనంపై కూడా శకలాలు పడినా ఎవరికీ గాయాలు కాలేదు.

భారీగా ప్రాణనష్టం.. కాల్పుల విరమణకు ఇరాన్ తిరస్కరణ

ఆరు వారాలుగా సాగుతున్న ఈ యుద్ధంలో ఇప్పటివరకు ఇరాన్‌లో 3,500 మంది, ఇజ్రాయెల్‌లో 19 మంది, అమెరికాలో 13 మంది మృతి చెందారు. లెబనాన్‌ రాజధాని బీరుట్‌పై ఇజ్రాయెల్ దాడులు ముమ్మరం చేయడంతో అక్కడ ఏకంగా 1,300 మందికి పైగా ప్రాణాలు కోల్పోయారు.

పాకిస్థాన్, టర్కీ, ఈజిప్ట్ దేశాలు మధ్యవర్తిత్వం వహిస్తూ శాంతి చర్చలకు ప్రయత్నిస్తున్నప్పటికీ.. అమెరికా ప్రతిపాదించిన 48 గంటల తాత్కాలిక కాల్పుల విరమణను ఇరాన్ తిరస్కరించింది. ఈ మేరకు ఇరాన్ విదేశాంగ మంత్రి అబ్బాస్ అరాఘ్చీ తీవ్ర స్థాయిలో విరుచుకుపడ్డారు. బుషెహర్ అణు ప్లాంట్‌పై దాడులు కొనసాగితే, రేడియేషన్ కారణంగా టెహ్రాన్‌కు కాకుండా గల్ఫ్ దేశాల రాజధానులకే ప్రాణాపాయం ఉంటుందని హెచ్చరించారు. మరోవైపు, అమెరికా రక్షణ మంత్రి ఉన్నతాధికారులను తొలగించిన నేపథ్యంలో, జనరల్స్‌ను కాదు ఏకంగా అధ్యక్షుడు డొనాల్డ్ ట్రంప్‌నే పదవి నుంచి తొలగించాలని ఇరాన్ సీనియర్ అధికారి మోహ్సెన్ రెజాయీ డిమాండ్ చేశారు.

హార్ముజ్ జలసంధిలో వాణిజ్య నౌకల కదలికలు

యుద్ధం కారణంగా మూతపడిన కీలకమైన హార్ముజ్ జలసంధి గుండా క్రమంగా నౌకల రాకపోకలు మొదలవుతున్నాయి.

భారత్‌కు ఊరట: ఎల్‌పీజీ సరఫరాతో వస్తున్న 'గ్రీన్ సాల్వి' అనే నౌక అంతర్జాతీయ జలాలను కాకుండా.. ఒమన్ సముద్ర ప్రాదేశిక జలాల సరిహద్దుల గుండా ఒక కొత్త రూట్ ద్వారా హార్ముజ్ జలసంధిని విజయవంతంగా దాటి భారత్ వైపు పయనమైంది.

ఇతర దేశాల నౌకలు: పశ్చిమ ఐరోపాకు చెందిన ఫ్రెంచ్ కంటైనర్ షిప్, జపాన్‌కు చెందిన ఎల్‌ఎన్‌జీ ట్యాంకర్ కూడా జలసంధిని దాటాయి. టర్కీకి చెందిన రెండో నౌక సైతం ప్రయాణించినట్లు అధికారులు ధృవీకరించారు.