US H-1B Visa Renewal Fees | H-1B, L-1 వీసా రెన్యువల్స్‌పై కొత్త ఫీజులు.. అమెరికాలో మన ఐటీ నిపుణులకు భారీ షాక్!

US H-1B Visa Renewal Fees | త్రినేత్ర.న్యూస్ : అమెరికాలో పనిచేస్తున్న విదేశీ నిపుణులకు, ముఖ్యంగా భారతీయ ఐటీ ఉద్యోగులకు (Indian IT professionals) డొనాల్డ్ ట్రంప్ (Donald Trump) అడ్మినిస్ట్రేషన్ భారీ షాక్ ఇవ్వబోతోంది. ఇప్పటిదాకా కేవలం కొత్త వీసాలకు మాత్రమే పరిమితమైన అదనపు ఫీజును.. ఇకపై వీసా రెన్యువల్ (Visa Renewal) చేసుకునే వారిపై కూడా మోపాలని నిర్ణయించింది. దీనివల్ల నైపుణ్యం కలిగిన విదేశీ ఉద్యోగులను అట్టిపెట్టుకోవాలనుకునే అమెరికన్ కంపెనీలకు ఖర్చులు భారీగా పెరగనున్నాయి. అత్యధికంగా H-1B వీసాలు రెన్యువల్ చేసుకునేది భారతీయులే కావడంతో ఈ నిర్ణయం మనవాళ్లకే అతిపెద్ద దెబ్బగా మారనుంది.

కొత్త రూల్ ఏం చెబుతోంది?

డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ (DHS) నిబంధనల ప్రకారం, ప్రస్తుతం అమెరికాలో ఒక కంపెనీ కొత్తగా H-1B లేదా L-1 వీసా పిటిషన్ (Petition) ఫైల్ చేసినా, లేదా ఒక ఉద్యోగి కంపెనీ మారినా (Change of employer) బేసిక్ ఫీజుతో పాటు అదనంగా "9-11 రెస్పాన్స్ అండ్ బయోమెట్రిక్ ఎంట్రీ-ఎగ్జిట్ ఫీజు" చెల్లించాలి. ఇది H-1B కి కనీసం 4,000 డాలర్లు, L-1 కి 4,500 డాలర్ల వరకు ఉంటుంది.

అయితే, ప్రతిపాదిత కొత్త నిబంధనల ప్రకారం.. పాత ఉద్యోగులు తమ వీసా గడువును పొడిగించుకునేందుకు (Routine extensions of stay) కూడా ఈ అదనపు ఫీజును కట్టాల్సిందే. ముఖ్యంగా అమెరికాలో 50కి పైగా ఉద్యోగులు ఉండి, అందులో సగం మంది కంటే ఎక్కువ H-1B లేదా L-1 వీసాలపై పనిచేస్తున్న కంపెనీలకు ఈ రూల్ వర్తిస్తుంది. రాబోయే కొద్ది వారాల్లోనే దీనిపై తుది నిర్ణయం వెలువడే అవకాశం ఉంది.

భారతీయులపైనే అత్యధిక ప్రభావం

ఈ కొత్త నిర్ణయం వల్ల భారతీయ నిపుణులపై ఆధారపడిన కంపెనీలు తీవ్ర ఇబ్బందులు ఎదుర్కోనున్నాయి. ఎందుకంటే, అమెరికాలో H-1B ఎక్స్‌టెన్షన్ పొందుతున్న వారిలో అత్యధికులు మనవాళ్లే. US సిటిజన్‌షిప్ అండ్ ఇమ్మిగ్రేషన్ సర్వీసెస్ (USCIS) డేటా ప్రకారం, 2025 ఆర్థిక సంవత్సరంలో మొత్తం 4,06,348 H-1B పిటిషన్లు ఆమోదం పొందాయి. ఇందులో 2,91,542 (దాదాపు 72%) కేవలం పాత ఉద్యోగుల రెన్యువల్స్‌కు సంబంధించినవే. ఆశ్చర్యకరమైన విషయం ఏంటంటే.. ఈ రెన్యువల్స్‌లో 2,26,359 (77.6%) మంది భారతీయులే! దీన్నిబట్టి ఈ ఫీజుల భారం మన వాళ్లను రిక్రూట్ చేసుకున్న ఐటీ కంపెనీలపై ఎంతలా పడుతుందో అర్థం చేసుకోవచ్చు.

బడా ఐటీ సంస్థలకు గట్టి దెబ్బ

అమెరికాలో టెక్ టాలెంట్‌ను నియమించుకునే అతిపెద్ద కంపెనీలకు ఈ కొత్త ఫీజులు తలనొప్పిగా మారనున్నాయి. నేషనల్ ఫౌండేషన్ ఫర్ అమెరికన్ పాలసీ (NFAP) లెక్కల ప్రకారం, 2025 ఫైనాన్షియల్ ఇయర్‌లో అమెజాన్ (Amazon) అత్యధికంగా 14,532 H-1B ఎక్స్‌టెన్షన్ అప్రూవల్స్ సాధించింది. ఆ తర్వాతి స్థానాల్లో టాటా కన్సల్టెన్సీ సర్వీసెస్- TCS (5,293), మైక్రోసాఫ్ట్ (4,863), మెటా (4,740), ఆపిల్ (4,610), గూగుల్ (4,509) ఉన్నాయి. విదేశీ బ్రాంచ్‌ల నుంచి మేనేజర్లు, ఎగ్జిక్యూటివ్‌లను అమెరికాకు రప్పించుకునేందుకు వాడే L-1 వీసాల రెన్యువల్ ఖర్చులు కూడా అమాంతం పెరగనున్నాయి.

అసలు ఈ ఫీజు ఎందుకు వసూలు చేస్తున్నారు?

అమెరికా ఎంట్రీ-ఎగ్జిట్ వ్యవస్థలో ఫేషియల్ రికగ్నిషన్ (Facial recognition), బయోమెట్రిక్ టెక్నాలజీల నిర్వహణకు నిధులు సమకూర్చడం కోసమే ఈ ఫీజును వసూలు చేస్తున్నారు. నిజానికి ఇది 2020లోనే ఫైనల్ అయినప్పటికీ.. కోర్టు కేసుల వల్ల ఆగిపోయింది. ఇప్పుడు దీన్ని తిరిగి అమలు చేయడం ద్వారా ఏడాదికి అదనంగా $157.3 మిలియన్ల ఆదాయం వస్తుందని DHS అంచనా వేస్తోంది. ఈ రూల్ అమల్లోకి వస్తే అమెరికా ఐటీ సెక్టార్‌లో నైపుణ్యం కలిగిన విదేశీ ఉద్యోగులను మెయింటైన్ చేయడం కంపెనీలకు చాలా ఖర్చుతో కూడుకున్న వ్యవహారంగా మారనుంది.