Nyepi Festival Bali | బాలిలో హిందూ పండుగను అవమానించిన విదేశీ టూరిస్ట్.. ఏడాది జైలు శిక్ష విధించిన కోర్టు!

Nyepi Festival Bali | త్రినేత్ర.న్యూస్ : ఇండోనేషియాలోని బాలి (Bali) టూర్‌కు వెళ్లిన ఓ స్విట్జర్లాండ్ టూరిస్ట్‌కు అక్కడి న్యాయస్థానం ఊహించని షాక్ ఇచ్చింది. స్థానికంగా ఎంతో పవిత్రంగా జరుపుకునే హిందూ పండుగ 'న్యేపి' (Nyepi) నిబంధనలను ఉల్లంఘించడంతో పాటు, సోషల్ మీడియాలో అవమానకరమైన పోస్ట్ చేసినందుకు అతనికి ఏకంగా ఏడాది జైలు శిక్ష పడింది. పర్యాటకుల ప్రవర్తనపై బాలి అధికారులు ఎంత కఠినంగా ఉన్నారో చెప్పడానికి ఈ ఘటనే ప్రత్యక్ష ఉదాహరణ.

'డే ఆఫ్ సైలెన్స్' నిబంధనలు బ్రేక్..

లుజియన్ ఆండ్రిన్ జ్రాగెన్ (26) అనే స్విస్ యువకుడు ఈ ఏడాది బాలి పర్యటనకు వెళ్లాడు. మార్చి 19న అక్కడ 'న్యేపి' పండుగ జరిగింది. దీనినే 'డే ఆఫ్ సైలెన్స్' అంటారు. ముస్లిం మెజారిటీ ఉన్న ఇండోనేషియాలో.. బాలి మాత్రం హిందూ మెజారిటీ ప్రాంతం. ఈ పండుగ రోజున ఎవరైనా సరే ఇంట్లోనే ఉండాలి. పనులు, వినోద కార్యక్రమాలు చేయకూడదు. కనీసం ఇంటర్నెట్ వాడకాన్ని కూడా తగ్గిస్తారు. టూరిస్టులకు కూడా ఈ రూల్స్ కచ్చితంగా వర్తిస్తాయి.

ఫ్రస్ట్రేషన్‌తో వీడియో పోస్ట్..

హోటల్ సిబ్బంది ముందే చెప్పినప్పటికీ, ఆ యువకుడు రూల్స్ బ్రేక్ చేసి బయటకు వచ్చాడు. నిర్మానుష్యంగా ఉన్న బీచ్‌లో నడుస్తూ దాన్ని వీడియో తీశాడు. ఆ పరిస్థితిని "క్రేజీ" అంటూ బూతు పదాలు వాడుతూ ఇన్‌స్టాగ్రామ్‌లో (Instagram) పోస్ట్ చేశాడు. ఈ వీడియో వైరల్ కావడంతో స్థానికుల మనోభావాలు దెబ్బతిన్నాయి. వారు తీవ్ర ఆగ్రహం వ్యక్తం చేస్తూ పోలీసులకు ఫిర్యాదు చేయడంతో, అతన్ని వెంటనే అరెస్ట్ చేశారు.

తప్పు ఒప్పుకున్నా దక్కని కనికరం..

కోర్టు విచారణలో ఆ యువకుడు తన తప్పును అంగీకరించాడు. పండుగ రోజు ఎక్కడా ఫుడ్ దొరకకపోవడంతో ఆకలి, ఫ్రస్ట్రేషన్‌తోనే అలా చేశానని చెప్పాడు. "నేను చేసిన పనికి సిగ్గుపడుతున్నాను, బాలి ప్రజలకు క్షమాపణలు చెబుతున్నాను" అని వేడుకున్నాడు. అయినా సరే, అతని చర్యల వల్ల ప్రజల్లో తీవ్ర ఆగ్రహం వ్యక్తమైనందున అతనికి కోర్టు ఒక సంవత్సరం జైలు శిక్ష ఖరారు చేసింది.

బాలికి ప్రతి ఏడాదీ లక్షలాది మంది టూరిస్టులు వస్తుంటారు. అయితే, ఇటీవల కొందరు విదేశీయులు స్థానిక సంప్రదాయాలను ఉల్లంఘించడం పెరిగిపోయింది. ఈ నేపథ్యంలో టూరిస్టుల ఆగడాలకు చెక్ పెట్టేందుకు బాలి అధికారులు ఇలాంటి కఠిన చర్యలకు ఉపక్రమించారు.