Bidesh Sikhyabruti scholarship | విదేశీ విద్యకు రూ.25 లక్షల సాయం.. ఎస్సీ, ఎస్టీ విద్యార్థులకు బంపరాఫర్

Bidesh Sikhyabruti scholarship | త్రినేత్ర.న్యూస్ : విదేశాల్లోని టాప్ యూనివర్సిటీల్లో చదువుకోవాలని కలలు కంటున్నారా? అయితే, ఒడిశా ప్రభుత్వం (Odisha Government) ప్రవేశపెట్టిన ఈ స్కీమ్ ఆ కలను నిజం చేయబోతోంది. ఆర్థిక ఇబ్బందుల వల్ల ఉన్నత విద్యకు దూరమవుతున్న షెడ్యూల్డ్ కులాలు (SC), షెడ్యూల్డ్ తెగల (ST) విద్యార్థులకు అండగా నిలిచేందుకు ఒడిశా సర్కార్ 'విదేశ్ శిక్షాబృత్తి' (Bidesh Sikhyabruti) అనే సరికొత్త స్కాలర్‌షిప్ పథకానికి శ్రీకారం చుట్టింది.

ఏడాదికి 50 మందికి అవకాశం..

ఈ అద్భుతమైన పథకం కింద ప్రతి ఏడాది 50 మంది ప్రతిభావంతులైన విద్యార్థులను ప్రభుత్వం ఎంపిక చేస్తుంది. విదేశాల్లో చదువుకోవడం అంటే మాటలు కాదు.. లక్షల్లో ఖర్చవుతుంది. అందుకే, ఎంపికైన విద్యార్థులకు ట్యూషన్ ఫీజులు, హాస్టల్ లేదా నివాస ఖర్చులు (Living expenses), విమాన ప్రయాణ చార్జీలు, ఇన్సూరెన్స్ తదితర ఖర్చుల కింద ఏడాదికి ఏకంగా రూ. 25 లక్షల వరకు స్కాలర్‌షిప్ రూపంలో అందజేయనున్నారు. ఇందుకు సంబంధించిన అధికారిక పోస్టర్‌ను ప్రభుత్వం విడుదల చేసింది. ఈ స్కీమ్ ద్వారా విద్యార్థులు పోస్ట్ గ్రాడ్యుయేట్ (Postgraduate), పీహెచ్‌డీ (Ph.D.) ప్రోగ్రామ్స్ చేయడానికి అవకాశం లభిస్తుంది.

కండిషన్స్ ఏంటి? ఎక్కడ చదువుకోవాలి?

విద్యార్థులు ఏ కాలేజీ పడితే ఆ కాలేజీలో కాకుండా, ప్రపంచస్థాయి గుర్తింపు ఉన్న విద్యాసంస్థల్లోనే చదవాలన్నది ప్రభుత్వ లక్ష్యం. అందుకే ఒక ప్రధాన నిబంధన పెట్టారు. విద్యార్థులు క్యూఎస్ వరల్డ్ యూనివర్సిటీ ర్యాంకింగ్స్ (QS World University Rankings) లో 'టాప్ 200' జాబితాలో ఉన్న అత్యుత్తమ విదేశీ యూనివర్సిటీలలో మాత్రమే ప్రవేశం పొంది ఉండాలి.

ఈ గ్లోబల్ ఇన్‌స్టిట్యూషన్స్‌లో చదువుకునే అవకాశం రావడం ద్వారా అణగారిన వర్గాల విద్యార్థుల భవిష్యత్తు పూర్తిగా మారిపోనుంది. సరైన గైడెన్స్, ప్రతిభ ఉంటే చాలు.. మీ డ్రీమ్ యూనివర్సిటీకి చేరుకోవడం ఇక ఎంతో సులభం!