London Parliament Square Protest | లండన్‌లో హైడ్రామా: సీఈసీకి వ్యతిరేకంగా ధ్రువ్ రాఠీ స్పీచ్.. పోటీగా ‘మోదీ.. మోదీ’ నినాదాలు!

London Parliament Square Protest | త్రినేత్ర న్యూస్ : భారత్‌లో ఎన్నికల కమిషన్ వ్యవహారశైలిపై రగులుతున్న వివాదం ఇప్పుడు ఏకంగా బ్రిటన్ రాజధాని లండన్‌కు పాకింది. భారత చీఫ్ ఎలక్షన్ కమిషనర్ (CEC) జ్ఞానేష్ కుమార్‌ను పదవి నుంచి తొలగించాలని, ఓటర్ల జాబితా ప్రత్యేక సవరణ (SIR)ను రద్దు చేయాలని డిమాండ్ చేస్తూ శనివారం (అక్టోబర్ 17, 2026) లండన్‌లోని పార్లమెంట్ స్క్వేర్ వద్ద ఉన్న మహాత్మా గాంధీ విగ్రహం దగ్గర భారీ నిరసన ప్రదర్శన జరిగింది. అయితే, దీనికి కౌంటర్‌గా మోదీ ప్రభుత్వ మద్దతుదారులు కూడా అక్కడికి చేరుకోవడంతో ఇరు వర్గాల పోటాపోటీ నినాదాలతో ఆ ప్రాంతం దద్దరిల్లింది.

ధ్రువ్ రాఠీ ప్రసంగం.. పోటీగా 'మోదీ' నినాదాలు

ప్రతిపక్ష కాంగ్రెస్ (ఇండియన్ ఓవర్సీస్ కాంగ్రెస్ యూత్ వింగ్), యూకేలోని భారత విద్యార్థి సంఘాల ఆధ్వర్యంలో 'స్టాప్ ఓట్ చోరీ' (Stop Vote Chori) పేరుతో ఈ నిరసన కార్యక్రమం నిర్వహించారు. ఇందులో ప్రముఖ సోషల్ మీడియా యాక్టివిస్ట్, యూట్యూబర్ ధ్రువ్ రాఠీ ముఖ్య వక్తగా పాల్గొన్నారు.

ఓవైపు ధ్రువ్ రాఠీ మైక్ పట్టుకుని ప్రసంగిస్తుండగా.. గాంధీ విగ్రహానికి అవతలి వైపున ఉన్న ప్రభుత్వ మద్దతుదారుల బృందం 'మోదీ.. మోదీ' అంటూ పెద్ద పెట్టున నినాదాలు చేసింది. ఒకరి గొంతు ఒకరికి వినిపించకుండా ఇరు వర్గాలు పోటీపడి నినాదాలు చేయడంతో వాతావరణం ఒక్కసారిగా వేడెక్కింది. వెంటనే రంగంలోకి దిగిన లండన్ మెట్రోపాలిటన్ పోలీసులు ఇరు వర్గాలు దగ్గరకు రాకుండా అడ్డుకుని పరిస్థితిని అదుపు చేశారు.

"విదేశీ జోక్యం వద్దు.. సీఈసీని మార్చాల్సిందే": ధ్రువ్ రాఠీ

ఈ సందర్భంగా ధ్రువ్ రాఠీ హిందీలో ప్రసంగిస్తూ.. "మాకు ఎలాంటి విదేశీ జోక్యం అవసరం లేదు. ఇక్కడ ఉన్న భారతీయులు, ఎన్నారైలను (NRIs) ఉద్దేశించి మాట్లాడేందుకే నేను పార్లమెంట్ స్క్వేర్‌కు వచ్చాను. మన దేశంలో జరుగుతున్న 'ఓట్ చోరీ' (ఓట్ల దొంగతనం) గురించి అందరికీ తెలియజేయడం చాలా ముఖ్యం. కేంద్ర ప్రభుత్వంతో పాటు ప్రతిపక్ష నేత (LoP) ఏకాభిప్రాయంతో ఎన్నుకునే వ్యక్తిని కొత్త చీఫ్ ఎలక్షన్ కమిషనర్‌గా నియమించిన మరుక్షణమే ఈ నిరసనలు ఆగిపోతాయి" అని స్పష్టం చేశారు.

ఆయన ప్రసంగానికి ముందు ఆందోళనకారులు 'ఇంక్విలాబ్ జిందాబాద్', 'వందేమాతరం' నినాదాలు చేయడంతో పాటు భారత రాజ్యాంగ పీఠికను (Preamble) చదివారు. ఈ నిరసనకు సేవ్ డెమోక్రసీ, ఎస్ఎఫ్ఐ (SFI) యూకే, సౌత్ ఏషియా సాలిడారిటీ గ్రూప్ వంటి సంస్థలు మద్దతు తెలిపాయి.

రంగంలోకి మోదీ మద్దతుదారులు

మరోవైపు ఈ ఆందోళనకు కౌంటర్‌గా 'ఇండియా డయాస్పోరా (ID) యూకే' సంస్థ.. "లండన్‌లోని భారత్ ప్రేమికులందరూ తరలిరావాలి" అంటూ అత్యవసర పిలుపునిచ్చింది. ఆ సంస్థ వ్యవస్థాపకుడు హిర్దేశ్ గుప్తా మాట్లాడుతూ.. "బలమైన, ఐక్యమైన, అభివృద్ధి చెందిన భారత్ నిర్మాణం కోసం ప్రధాని మోదీజీకి, ఆయన ప్రభుత్వానికి యూకేలోని ప్రవాస భారతీయులంతా భుజం భుజం కలిపి అండగా నిలుస్తారు" అని తెలిపారు.

అసలు వివాదం ఏంటి?

భారత్‌లో 'కాక్రోచ్ జనతా పార్టీ' (CJP) చేస్తున్న డిమాండ్లకు మద్దతుగా మంగళవారం జరిగిన 'ఎమర్జెన్సీ ప్రొటెస్ట్', శుక్రవారం (అక్టోబర్ 16) లండన్‌లోని భారత హైకమిషన్ కార్యాలయం ఎదుట జరిగిన ఆందోళనల కొనసాగింపుగా శనివారం ఈ భారీ నిరసన జరిగింది.

సీఈసీ జ్ఞానేష్ కుమార్‌ను తొలగించాలని, ఓటర్ల జాబితా సవరణ (SIR) ప్రక్రియను ఆపేయాలని ఆందోళనకారులు డిమాండ్ చేస్తున్నారు. అయితే, మరణించిన వారు, డూప్లికేట్ ఓట్లు, ఇళ్లు మారిన వారి పేర్లను తొలగించి ఓటర్ల జాబితాను పక్కాగా అప్‌డేట్ చేసేందుకే ఈ సవరణ చేపట్టినట్లు కేంద్ర ఎన్నికల సంఘం చెబుతోంది.