Donald Trump Iran Threat | “ఇక మంచివాడిగా ఉండేది లేదు”: డీల్‌కి ఒప్పుకోకపోతే ఇరాన్‌ను నాశనం చేస్తా.. డొనాల్డ్ ట్రంప్ హెచ్చరిక

Donald Trump Iran Threat | త్రినేత్ర.న్యూస్ : అమెరికా, ఇరాన్ మధ్య ఉద్రిక్తతలు మరోసారి తారాస్థాయికి చేరుకున్నాయి. హార్ముజ్ జలసంధి (Strait of Hormuz) కేంద్రంగా ఇరు దేశాల మధ్య ఆధిపత్య పోరు కొనసాగుతున్న వేళ, అమెరికా అధ్యక్షుడు డొనాల్డ్ ట్రంప్ ఇరాన్‌పై తీవ్ర స్థాయిలో విరుచుకుపడ్డారు. తాము ప్రతిపాదిస్తున్న ఒప్పందానికి ఇరాన్ అంగీకరించకపోతే పరిణామాలు చాలా తీవ్రంగా ఉంటాయని, ఇకపై తాను ఏమాత్రం ఉపేక్షించబోనని హెచ్చరించారు. ఈ మేరకు ఆయన తనకు చెందిన సోషల్ మీడియా ప్లాట్‌ఫామ్ 'ట్రూత్ సోషల్' (Truth Social) లో సుదీర్ఘమైన పోస్ట్‌ను షేర్ చేశారు.

కాల్పుల విరమణ ఉల్లంఘించారు: ట్రంప్ ఫైర్

హార్ముజ్ జలసంధిలో ఇరాన్ వ్యవహరిస్తున్న తీరుపై ట్రంప్ తీవ్ర ఆగ్రహం వ్యక్తం చేశారు. "నిన్న హార్ముజ్ జలసంధిలో ఇరాన్ కాల్పులు జరిపింది. ఇది మన కాల్పుల విరమణ ఒప్పందాన్ని పూర్తిగా ఉల్లంఘించడమే! ఫ్రాన్స్, యునైటెడ్ కింగ్‌డమ్‌కు చెందిన నౌకలే లక్ష్యంగా వారు ఈ కాల్పులు జరిపారు. ఇది ఏమాత్రం మంచి పద్ధతి కాదు" అని ట్రంప్ తన పోస్ట్‌లో పేర్కొన్నారు.

అమెరికా నావికాదళం ఇరాన్ పోర్టులను దిగ్బంధించిన (Blockade) నేపథ్యంలో, ఇరాన్ కూడా హార్ముజ్ జలసంధిని మూసివేస్తూ సవాల్ విసిరిన విషయం తెలిసిందే. దీనిపై స్పందించిన ట్రంప్.. "జలసంధి మూసివేత వల్ల ఇరాన్‌కే రోజుకు $500 మిలియన్ల నష్టం వాటిల్లుతోంది. అమెరికాకు ఎలాంటి నష్టం లేదు. వాస్తవానికి ఈ పరిస్థితుల వల్ల చాలా నౌకలు ఇప్పుడు అమెరికాలోని టెక్సాస్, లూసియానా, అలాస్కా పోర్టులకు వస్తున్నాయి" అని ఎద్దేవా చేశారు.

పవర్ ప్లాంట్లు, వంతెనలు నాశనం చేస్తాం

సమస్య పరిష్కారానికి పాకిస్థాన్‌లోని ఇస్లామాబాద్‌లో సోమవారం నుంచి రెండో విడత చర్చలు జరగనున్నాయి. ఈ నేపథ్యంలో ట్రంప్ తన వ్యాఖ్యల తీవ్రతను పెంచారు.

"మేము చాలా న్యాయమైన, సహేతుకమైన డీల్‌ను ఆఫర్ చేస్తున్నాం. వారు దాన్ని అంగీకరిస్తారని ఆశిస్తున్నాను. ఒకవేళ వారు దానికి ఒప్పుకోకపోతే... ఇరాన్‌లోని ప్రతి ఒక్క పవర్ ప్లాంట్‌ను, ప్రతి వంతెనను అమెరికా నాశనం చేస్తుంది. నో మోర్ మిస్టర్ నైస్ గై (ఇక మంచివాడిగా ఉండేది లేదు). ఈ డీల్‌కి అంగీకరించకపోతే.. గత 47 ఏళ్లలో ఇతర అధ్యక్షులు చేయాల్సిన పనిని ఇప్పుడు నేను చేస్తాను. ఇరాన్ కిల్లింగ్ మెషీన్‌ను అంతం చేసే సమయం ఆసన్నమైంది!" అని ట్రంప్ తీవ్ర హెచ్చరికలు జారీ చేశారు.

ఇస్లామాబాద్ వేదికగా రెండో విడత చర్చలు

యురేనియం సుసంపన్నతపై తక్షణ పరిమితులు విధించాలన్న అమెరికా డిమాండ్‌ను ఇరాన్ తిరస్కరించడంతో ఇస్లామాబాద్‌లో గత వారం జరిగిన తొలి విడత చర్చలు విఫలమయ్యాయి. ఇప్పుడు రెండో విడత చర్చల కోసం తన ప్రత్యేక ప్రతినిధులు స్టీవ్ విట్‌కాఫ్, జారెడ్ కుష్నర్‌లు సోమవారం సాయంత్రం ఇస్లామాబాద్ చేరుకుంటారని ట్రంప్ ధృవీకరించారు. అయితే, ఉపాధ్యక్షుడు జేడీ వాన్స్ ఈ దఫా చర్చలకు హాజరుకావడం లేదని స్పష్టం చేశారు.

ఒప్పందం ఇంకా దూరమే అన్న ఇరాన్.. ముగియనున్న గడువు

చర్చల విషయమై ఇరాన్ పార్లమెంట్ స్పీకర్ మొహమ్మద్ బాఘర్ గలీబాఫ్ స్పందించారు. "వాషింగ్టన్‌తో చర్చల్లో కొంత పురోగతి ఉన్నప్పటికీ, ఇంకా చాలా అగాధాలు, కొన్ని ప్రాథమిక పాయింట్లు అలాగే ఉన్నాయి. మేము తుది ఒప్పందానికి ఇంకా చాలా దూరంలో ఉన్నాము" అని ఆయన స్పష్టం చేశారు. అమెరికా తమ పోర్టులపై దిగ్బంధనాన్ని ఎత్తివేసే వరకు హార్ముజ్ జలసంధిలో ట్రాఫిక్ పరిమితంగానే ఉంటుందని తేల్చి చెప్పారు.

ఏప్రిల్ 22 నాటికి ఇరు దేశాల మధ్య కుదిరిన రెండు వారాల కాల్పుల విరమణ గడువు ముగియనుంది. ఈ లోపు ఒప్పందం కుదరకపోతే అమెరికా కఠిన ఆంక్షలు విధించడంతో పాటు, ఇరాన్ అణు, సైనిక స్థావరాలపై ప్రత్యక్ష దాడులకు దిగే అవకాశం ఉందని నిపుణులు భావిస్తున్నారు. భవిష్యత్తు పరిణామాలు ఎలా ఉంటాయోనని ప్రపంచ దేశాలు ఉత్కంఠగా ఎదురుచూస్తున్నాయి.