Captain Smit Machchhar | భారత పైలట్ స్మిత్ మచ్చర్‌ను ఆస్పత్రిలో పరామర్శించి ప్రశంసించిన దుబాయ్ యువరాజు

• గాల్లోనే పైలట్‌పై దాడి
• చావు అంచుల దాకా వెళ్లి 174 మంది ప్రాణాలు కాపాడిన భారత కెప్టెన్
• ఆస్పత్రికి వెళ్లి సత్కరించిన దుబాయ్ క్రౌన్ ప్రిన్స్ 

Captain Smit Machchhar | త్రినేత్ర న్యూస్ : మిడ్-ఎయిర్‌లో ఊహించని విపత్తు ఎదురైనా, శరీరం రక్తసిక్తమైనా పట్టువిడవకుండా 170 మందికి పైగా ప్రయాణికుల ప్రాణాలను కాపాడిన భారతీయ పైలట్ కెప్టెన్ స్మిత్ మచ్చర్‌పై ప్రపంచవ్యాప్తంగా ప్రశంసల జల్లు కురుస్తోంది. ఫ్లైదుబాయ్ (Flydubai) విమానంలో జరిగిన భయానక ఘటనలో తీవ్రంగా గాయపడి ఆసుపత్రిలో చికిత్స పొందుతున్న ఆయనను దుబాయ్ క్రౌన్ ప్రిన్స్, యూఏఈ రక్షణ మంత్రి షేక్ హమ్దాన్ బిన్ మహమ్మద్ బిన్ రషీద్ అల్ మక్తూమ్ స్వయంగా పరామర్శించారు.

స్మిత్ మచ్చర్‌ను పరామర్శించిన ఫొటోలను సోషల్ మీడియా ప్లాట్‌ఫామ్ 'ఎక్స్' లో పంచుకుంటూ షేక్ హమ్దాన్ భావోద్వేగ సందేశాన్ని రాసుకొచ్చారు.

"ధైర్యం, బాధ్యత, మానవ ప్రాణాల రక్షణకు కెప్టెన్ స్మిత్ మచ్చర్ అసలైన నిదర్శనం. మా తరఫున, దేశ నాయకత్వం తరఫున ఆయనకు నిండు మనసుతో కృతజ్ఞతలు తెలుపుతున్నాం. కరుణ, శాంతి, జీవనానికి ప్రతీకగా నిలిచే యూఏఈ ప్రయాణంలో స్మిత్ భాగమైనందుకు మేం గర్విస్తున్నాం" అని దుబాయ్ యువరాజు కొనియాడారు.

అసలేం జరిగింది?

సెప్టెంబర్ 30న దుబాయ్ నుంచి ఇజ్రాయెల్‌లోని టెల్ అవీవ్ నగరానికి ఫ్లైదుబాయ్ విమానం (Flight FZ1073) బయల్దేరింది. విమానం గాల్లో ఉండగా ఒమన్‌కు చెందిన కో-పైలట్ హమామ్ అల్-హమామి ఒక్కసారిగా ఉగ్రరూపం దాల్చాడు. కాక్‌పిట్‌లో ఉన్న ముఖ్య పైలట్, ముంబైకి చెందిన భారతీయ కెప్టెన్ స్మిత్ మచ్చర్‌పై కత్తితో విచక్షణారహితంగా దాడి చేసి తీవ్రంగా గాయపరిచాడు.

అనంతరం విమాన కంట్రోల్స్ లాగేసి, విమానాన్ని ఒక్కసారిగా వేల అడుగుల లోతుకు తీసుకెళ్తూ కూల్చివేసేందుకు (సూసైడ్ క్రాష్) యత్నించాడు.

ప్రాణాలొడ్డి కాక్‌పిట్ తలుపు తెరిచిన భారత కెప్టెన్

తీవ్ర రక్తస్రావం జరుగుతున్నప్పటికీ కెప్టెన్ స్మిత్ మొక్కవోని ధైర్యంతో కో-పైలట్‌ను అడ్డుకున్నారు. చావుబతుకుల మధ్యనే పోరాడుతూ విమానం కాక్‌పిట్ ఎమర్జెన్సీ డోర్‌ను అన్‌లాక్ చేయగలిగారు. విమానం ఒక్కసారిగా తీవ్ర కుదుపులకు లోనవ్వడం గమనించిన క్యాబిన్ క్రూ, విమానంలో ప్రయాణిస్తున్న కొందరు ప్రయాణికులు వెంటనే కాక్‌పిట్‌లోకి దూసుకెళ్లి దుండగుడైన కో-పైలట్‌ను నిలువరించారు.

ఆ తర్వాత విమానంలో ప్యాసింజర్ సీట్లలో ఉన్న మరో ఆఫ్-డ్యూటీ పైలట్ సాయంతో విమానాన్ని అదుపులోకి తెచ్చి, సౌదీ అరేబియాలోని తబూక్ ఎయిర్‌పోర్టులో అత్యవసరంగా సురక్షితంగా ల్యాండ్ చేశారు. కొద్ది క్షణాలు ఆలస్యమైనా విమానం గాల్లోనే విచ్ఛిన్నమయ్యే ప్రమాదం ఉండేదని ఏవియేషన్ నిపుణులు విశ్లేషించారు.

ఉగ్రవాద కోణంపై విచారణ

సౌదీలో ప్రథమ చికిత్స అనంతరం కెప్టెన్ స్మిత్‌ను మెరుగైన వైద్యం కోసం యూఏఈకి తరలించారు. ప్రస్తుతం ఆయన ఆరోగ్యం నిలకడగా ఉంది. కాగా, దాడికి పాల్పడిన కో-పైలట్‌ను అదుపులోకి తీసుకుని విచారిస్తున్నారు. ప్రాథమిక విచారణలో ఇది ఉగ్రవాద చర్యేనని యూఏఈ ప్రాసిక్యూషన్ విభాగం పేర్కొంది. తీవ్ర గాయాలతోనూ సమయస్ఫూర్తితో వ్యవహరించి 174 మంది ప్రయాణికులు, సిబ్బంది ప్రాణాలను నిలబెట్టిన భారత పైలట్ కెప్టెన్ స్మిత్‌ను యావత్ ప్రపంచం రియల్ హీరోగా ప్రశంసిస్తోంది.

During a visit to Captain Smit Machchhar… the flydubai pilot who embodied the highest degrees of courage, responsibility, and care for human life.

From us, and from the leadership of the nation, he has our full appreciation and praise.

We are proud that he is part of our… pic.twitter.com/QgpQxdcK5C

— Hamdan bin Mohammed (@HamdanMohammed) October 3, 2026